Таво миян страна пасйӧ Великӧй Отечественнӧй войнаын Вермӧмсянь 80 во. Россияын йӧзӧдӧма Айму дор-йысь да Комиын герой во. Миянлы эм кодӧс нимӧдны, эм кодӧн гӧрдитчыны.
Победа дорӧмӧ донъявны позьтӧм пай пуктісны миян землякъяс. Войвыв кытш сайын фашистъяслы паныд тышкасисны и кӧра-даддя батальонъяс. Налысь подвигсӧ водзӧ нимӧдӧм-нэммӧдӧм могысь таво мартын регионса национальнӧй политика министерстволӧн водзмӧстчӧмӧн лоӧ котыртлӧма Изьва да Усинск районъясӧ пресс-тур.
Казьтыштам, ноябрь 20 лунӧ Комиын да Ненеч кытшын шуӧма казьтывны Великӧй Отечественнӧй войнаса кӧра-даддя фронтӧвикъясӧс. 1941 воын буретш тайӧ лунас вӧлі котыртӧма медводдза кӧр норта да каюр подразделенньӧ.
Войкытш дорйыны мӧдӧдӧмаӧсь тундраысь уна сюрс кӧр да накӧд тшӧтш саам, ненеч, коми пастукъясӧс, и быдӧнлӧн налӧн вӧлӧма фронт вылын аслас туй…
Ефим
33 арӧса Ефим Максимович Вокуевӧс война суис тундраын, кытчӧ сійӧ мӧдӧдчыліс Мокчойын чужлӧм, енэж рӧма синма Анна том гӧтырыскӧд.
1942 вося тулысын нин красноармееч Вокуев вӧлі 7-ӧд номера кӧра-лызя батальонын ездӧвӧйӧн.
Анна гӧтырыс абу тӧдлӧма грамота да кызвын кадсӧ уджалӧма, та вӧсна и зэв гежӧда гижлывлӧма верӧсыслы…
Март 13 лунӧ Мурмансксянь Ефим ыстӧма гӧтырыслы письмӧ: «Нюра! Нӧштаысь кора, эн вунӧдчы письмӧ йывсьыд, либӧ ме тшӧтш ог кут гижны». И тайӧ збыль лоӧма бӧръя письмӧ. 1942 вося майын лызя 6-ӧд номера бригада, кӧні служитӧма Ефим, веськалӧма чорыд тышӧ. Большая Западная Лица ю бокын 1942 вося май 1 лунӧ Ефим Вокуевлӧн олӧмыс орӧма. 2010 воын красноармеечӧс выль пӧв дзебисны Нарьян-Мар карын братскӧй гуын.
Степан
1941 вося декабрын изьвасаяскӧд ӧти эшелонын мунісны тышкасьны вӧрӧглы паныд и Усинскысь кӧр видзысьяс. На лыдын вӧлі ыджыд опыта каюр, Лыжавом сиктысь Степан Васильевич Хозяинов.
Мужичӧй веськаліс медся Войвыв муясӧ, Мурманск кар дорӧ, кӧні кӧръясӧн колльӧдліс миномётнӧй рота, новліс боеприпас да петкӧдаліс тышкось мунанінысь ранитчӧм салдатъясӧс.
1944 воын арнас Войкытш мездігӧн кӧр норта дивизиякӧд муніс тундраті 300 километр. Сійӧ жӧ вонас октябрь 13 лунӧ чорыда ранитчис тышын. Неуна сёрӧнджык Степанлы сетісны «За отвагу» медаль.
Анатолий
Анатолий Иванович Рожкин – вир сертиыс роч да ловру сертиыс войвывса морт – вуджліс овны Нарьян-Марӧ Архангельск обласьтысь.
Сэтчӧс муясысь мужичӧй аддзис помасьлытӧм тӧвся вой, кӧр видзысьяслысь повтӧмлун, тундра вын. Тані жӧ Анатолий Иванович лои заслуженнӧй велӧдысьӧн да гижис ненеч буквар. Карел фронт вылын сійӧ ӧдйӧ сибаліс мукӧд кӧр видзысь, коми да ненеч мужичӧйяс дорӧ, регыдӧн быдмис рядӧвӧй каюрсянь взводӧн веськӧдлысьӧдз. Старшина Рожкинлӧн юрнуӧдӧм улын салдатъяс петкӧдісны кӧръясӧн тундраысь 22 усьӧм самолёт. 1943 воын Анатолий Ивановичӧс пас-йисны «За боевые заслуги» медальӧн. Ыджыд арлыдаӧн нин мужичӧй вуджис овны Комиӧ, Сыктывкарӧ. Анатолий Рожкинлӧн бӧръя кывъясыс вӧліны: «Печора, река…» <>
Павел Морозов. (Юрий Каневлӧн «Оленная армия» небӧг серти)
Комиӧдіс Мария Игушева.