Регионса юралысьлӧн администрацияын чукӧртчылӧм дырйи Коми Республикаса правительствоӧн веськӧдлысьӧс вежысь Сергей Емельянов висьталіс культура да спорт юкӧнын 2025 воын збыльмӧдан медшӧр проект-уджтасъяс йылысь.
Сідз, культура министерство дасьтӧ выль проект – войтыркостса «Кандинский» фестиваль. Сійӧс нуӧдасны Коми Республика лунӧ августын. Сэки татчӧ воласны нималана пианист Денис Мацуев, Санкт-Петербургысь Борис Эйфман нима академическӧй театр. Сергей Емельяновлӧн корӧм серти Мариинскӧй театрӧн веськӧдлысь, Мюнхенса филармоническӧй оркестрса главнӧй дирижёр Валерий Гергиев отсалас волыны Мариинскӧй да Большой театръясысь артистъяслы.
Кыдзи пасйис Сергей Емельянов, регионын дасьтӧны сідз шусяна креатив индустриялысь медводдза школа. Та вылӧ сьӧм вичмӧдасны федеральнӧй бюджетысь. Школасӧ мӧвпалӧны восьтыны локтан воӧ.
Чукӧртчылӧм дырйиыс сёрниыс вӧлі и Айму вӧсна Ыджыд тышын Вермӧмсянь 80 во тырӧмлы сиӧм гаж нуӧдӧм, а сідзжӧ регионын культура озырлун видзӧм-сӧвмӧдӧм йылысь. Сідз, Кулӧмдін районын Уллянаса манастырын кӧсйӧны дзоньтавны туй морт керка.
Кыпӧдлісны и Печораын Кулаков нима спорт дворечын капремонт вӧчӧм йылысь юалӧм. Кыдз тыдовтчӧма, вичмӧдӧм сьӧмыс та могысь оз тырмы, колӧ нӧшта нёль миллион шайт. Регионса спорт министерство видлалас такӧд йитӧдын шыӧдчӧмсӧ. <>
Екатерина Микушева.