Республикаса правительстволӧн быд вежонся чукӧртчылігӧн видзӧдлісны, кыдзи регионын дасьтысьӧны Ыджыд Вермӧмсянь 80 во тыригкежлӧ.
Мылдін районын олысьяс дӧзмӧмаӧсь, мый 2021 воын мемориал дзоньталігӧн вежӧмаӧсь пӧвъяссӧ, кӧні Великӧй Отечественнӧй войнаса геройясӧс вӧлі пасйӧма тыр ним-вич-овнас.
Сы пыдди сувтӧдӧмаӧсь сӧмын ова да ним-вичысь медводдза шыпаса пӧвъяс. И Печора йылын олысьяс корӧмаӧсь бергӧдны воддзасӧ – Айму вӧсна Ыджыд тышын усьӧмаясӧс тыр ним-вич-овӧн пасйӧмаяссӧ.
–Ме тшӧтш чайта, мый тадзи вӧчны эз позь, – шуис республикаӧн веськӧдлысь Ростислав Гольдштейн да тшӧктіс регионса правительствоӧн веськӧдлысьӧс вежысь Сергей Емельяновлы нюжмасьтӧг вайӧдны пӧрадокӧ Мылдін посёлокса «Некодӧс абу вунӧдӧма, нинӧм абу вунӧма» мемориалысь пӧвъяссӧ.
Быд кар-районын апрель 1 лунӧдз войнаса ветеранъяслы да тылын уджалысьяслы лоӧ сетӧма «80 лет Победы в Великой Отечественной войне 1941-1945 гг.» казьтылана медаль.
Республикаын тайӧ наградасӧ шуӧма сетны 910 мортлы, кызвыныс медальсӧ босьтӧмаӧсь нин.
Сідзжӧ матысса кадӧ дзоньталасны Айму вӧсна Ыджыд тышса ветеранъяслысь оланінъяс да налӧн керкаясӧ пыранінъяс. Сыктыв районса Заозерье посёлокын олысь ветеранлӧн керкаын колӧ дзоньтавны вевт да пач, тайӧ уджсӧ вӧчасны гожӧмнас.
Правительствоӧн веськӧдлысьӧс вежысь Екатерина Грибковалӧн кывъяс серти, Победасянь юбилея воӧ войнаса ветеранъяслысь оланін дзоньталӧм кузя рӧскодсӧ вештӧм могысь республикаса бюджетын компенсациясӧ артыштӧма матӧ 100 сюрс шайт.
Ыджыд Вермӧм пасйӧм кузя оргкомитетысь торъя котыр туяліс, мый нин вӧчӧма Победа лун кежлӧ дасьтысигӧн Россияса президентлӧн да Коми Республикаса юралысьлӧн индӧдъяс серти.
Тыдовтчис, мый дас куим керкаысь, кӧні олӧны ветеранъяс да кытчӧ колӧ ӧшӧдны налӧн ним-ова пасъяс, вӧчӧмаӧсь тайӧс сӧмын куимас.
Сыктывкарысь да Сыктывдін районысь кындзи став кар-районас Айму вӧсна Ыджыд тышын воюйтысьяслы сетӧмаӧсь «Почёта гражданин» ним.
Юркарын да Сыктывдінын тайӧс вӧчасны март помӧдз.
<> Гижӧдсӧ дасьтіс Павел СИМПЕЛЕВ. Снимокъясыс ӧтуввезйысь.