Регыд нин лымйыс сылас, муыс шоналас, да быдсикас гут-гагйыс ловзяс. «Кыйсьыны» петас и сідз шусяна иксода клещ (вӧрса лудік). Таво тӧлыс вӧлі лымъя, но ёнасӧ эз кынты. Та вӧсна, специалистъяслӧн висьталӧм серти, татшӧм гагйыс вермас рӧдмыны мукӧд воын серти унджык.
Кыдзи сыысь видзчысьны? Мый вӧчны, казялінныд кӧ кучикад сатшкысьӧм да вирӧн польдчӧм гагсӧ?
Республикаса юралысьлӧн Общественнӧй приёмнӧйын «веськыд йитӧда» телефон пыр сёрниыс вӧлі буретш та йылысь.
Комиын Роспотребнадзор управлениеысь эпидемиология юкӧнӧн веськӧдлысь Марина Петухова:
–Мӧйму гагйыс сатшкысьлӧма вир-яяс 3.416 мортлы, на лыдын 230-ыс – 14 арӧсысь ичӧтджык челядь. Тайӧ 2023 воын серти 31,8 прӧчентӧн унджык. Лёк вируса гагйыс воысь-во содӧ. Кызь во нин туялам вӧрса лудіксӧ, да та мындаыс эз на вӧвлы.
Сійӧ овлӧ энцефалита либӧ боррелиоза (Лайм висьӧма). Тшыг верстьӧ гагйыс медся ёна курччасьӧ апрель-июньын. Кор энь клещыс пӧтас вирнас, заводитӧ пуктавны кольк. Сӧмын на чужӧм да верстьӧ лудікыс горшасьӧны и август-октябрын, медым тшӧгыштны тӧвся кузь ун водзын.
Гӧгӧрвоана, абу став гагйыс вируса. Мӧйму энцефалит казялім 15 мортлысь, Лайм висьӧм – 17-лысь. 2023 воын дас морт висьмӧма энцефалитӧн, а 22 – боррелиозӧн. Туялӧм лудікысь комын прӧчентыс вӧлі боррелиоз вируса, и сӧмын кыкыс – энцефалита, нӧшта ӧти прӧчентӧн – моноцитарнӧй эрлихиоза да анаплазмоза.
Гӧгӧрвоана, энцефалитысь медся бура дорйӧ вакцина. Уколасьны колӧ вӧлі арнас нин. Мӧд уколсӧ вӧчӧны 5-7 тӧлысь мысти. Сӧмын сэки лоас бур иммунитет.
Но позьӧ уколасьны и ӧні, а сэсся нӧшта кык вежон мысти. Дерт, татшӧм прививкасьыс им-мунитетыд оз сэтшӧма ёнмы, но век жӧ кутшӧмакӧ позяс дорйысьны. Во мысти бара ковмас уколасьны.
Вӧрӧ, вадорӧ мунігӧн колӧ пасьтавны югыд рӧма дӧрӧм-гач, медым казявны лудіксӧ. Куртка юрйывсӧ, сос да кок помъяссӧ колӧ топыда кизявны-топӧдны, медым некӧн эз вӧв восьсаин. Гагйыс кавшасьӧ морт вылӧ улісянь. Юртӧ да сьылітӧ колӧ топыда гаровтны кӧсынка-чышъянӧн. Раскӧ пырӧм водзын позьӧ резны асьтӧ аэрозоль-репеллентӧн.
Кыдз позьӧ тшӧкыдджыка колӧ видзӧдавны паськӧмтӧ, а пӧрччысьӧм бӧрын – кучиктӧ. Бур, кодкӧ кӧ тшӧтш отсалас тайӧс вӧчны. Вӧрысь да видз вылысь воӧм бӧрын сюся видзӧдалӧй и понтӧ.
Вӧрса лудікысь дорйысьны вермас и меставывса администрация. Быд во тулыснас парк, шойна да пу-раска мукӧд шойччанін резӧны акарицид химия сорасӧн. Мӧйму сентябрсянь тайӧс вермас вӧчны сӧмын организация-котыр, кодлӧн эм та могысь торъя лицензия. Град-йӧрын да дачаын химия сорассӧ позьӧ резны и аслыд. Но таӧдз колӧ ытшкыны турунсӧ, идравны став лӧп-ёгсӧ, керавны кос пу-рас. Таысь ӧтдор химия сорассӧ резӧм водзвылын нуӧдӧны дератизация, бырӧдӧны шыр-крыса, ӧд медсясӧ на вылын ветлӧ гагйыс.
СПИД-лы да мукӧд кӧвъясян висьӧмлы паныд водзсасян да профилактика нуӧдан республикаса шӧринысь главнӧй врачӧс вежысь, Коми Республикаса минздравысь главнӧй внештатнӧй эпидемиолог Нина Овчинникова:
–Вӧрса лудік кӧвъясьӧ сиктын, дачаын да вӧр-ваын. Водзын майся кузь шойччан лунъяс. Тӧдӧмысь, унаӧн бара ас выланыс гортас ваясны гагсӧ.
Висьмыны позьӧ и гортысь петавтӧг. Гагсӧ вермасны вайны ывлаысь кань-пон. Найӧ асьныс оз висьны энцефалитнас, но вермасны сійӧс «козьнавны» кӧзяиныслы. Клещ веськалӧ керка-патераӧ и паськӧмӧн, дзоридзӧн да с.в.
Профилактика прививкасӧ дон босьттӧг вӧчӧны ставлы, коді олӧ эндемия районын, локтӧ сэтчӧ командировкаӧ, отпускӧ. Мукӧдыс вермасны жӧ уколасьны, но таысь ковмас мынтысьны… Уколасьны колӧ видз-му овмӧсын да парма-ягын зільысьлы, муӧн вӧдитчысьлы, геологлы, биару да мусир труба, туй, электролиния нюжӧдысьлы, топографлы, вӧралысьлы, чери кыйысьлы, ту-ристлы, стройотрядса студентлы да мукӧдлы. Бур, прививкасӧ кӧ вӧчас 95 прӧчент йӧзыс.
Республикаын талун дас сідз шусяна эндемия район, кӧні паськалӧма вӧрса лудікыс. Тайӧ медсясӧ лунвыв да шӧр районъяс. Мӧйму декабрын на дінӧ содіс Удора район. Энцефалит казялӧмаӧсь нин Ухтаын, Сосногорскын да Мылдін районын.
Мӧйму энцефалитсӧ казялӧмаӧсь дас ӧти муниципалитетын, а квайтас – боррелиоз. Поводдяыс вежсьӧ, тӧв-гожӧмыс воысь-во пыр шоныдджык. Звер-пӧтка овмӧдчӧ-поздысьӧ войвывланьынджык, а буретш на вылын гагйыс и «путешествуйтӧ». Та вӧсна эндемия районыс мӧдас содны-паськавны Войвыв кытшлань.
Республикаса инфекция больничаысь врач-инфекционист Сергей Казаковцев:
–Туялӧмаӧсь, вӧрса лудікыс боррелиозысь, энцефалитысь, эрлихиозысь да анаплазмозысь ӧтдор ас вылас вермас кыскавны кызь сикас инфекция.
Арбовирус вуджӧ гаг курччигӧн. Та дырйи сійӧ лэдзӧ дульсӧ, медым морт либӧ пемӧс эз кыв дойсӧ. А дулльыскӧд тшӧтш вирас вуджӧ вирус. Та вӧсна тшӧкыда гаг курччӧмсӧ мортыс оз и казяв да оз и тӧд, мый вирас веськаліс нин инфекция.
Вируса энцефалит – тайӧ ёсь инфекция, коді медводз мӧрччӧ мортлы юр вемас да шӧр веяс. Тшӧкыда сійӧ биа висьӧм кодь. Та вӧсна быд врачлы майсянь октябрӧдз кынтӧм вылӧ норасьысь висьысьӧс колӧ ыстыны петкӧдчыны инфекционистлы.
Лайм висьӧм – зэв лёк инфекция, вуджӧ спирохетаӧн – Borrelia бактерияӧн. Сійӧ мӧрччӧ кучикӧ, ки-кок кусыньӧ, сьӧлӧмӧ да шӧр вейӧ. Боррелиозысь некутшӧм прививка абу.
Вируслӧн сідз шусяна инкубация кадыс, гаг курччӧмсяньыс чорыда висьмытӧдз – 10-14 лун. Овлӧ, мортыс мӧдӧ нёрпавны и 25-60 лун мысти. Йӧлӧн веськалӧм вирус вермас водтӧдны вольпасьӧ и 2-3 лун мысти.
Казялӧмаӧсь, кымын вылӧджык сатшкысяс гагйыс, шуам, сьыліӧ либӧ киняулӧ, сымын ӧдйӧджык мортыс висьмас.
Курччӧмаӧс кынтӧ, температураыс чеччыштӧ 39 градусӧдз, мортыслӧн бергалӧ юрыс, сійӧс вукӧдӧ, сьылі, пельпом, морӧс, кос да ки-кок сӧнӧръясыс доймӧны, чужӧмыс, овлӧ, и мукӧдлаті гӧрдӧдӧ.
Вӧрса лудікыс зэв ичӧтик, 1-3 миллиметр кузьта. Энь гагйыс, сатшкысяс кӧ, вермас куим лун ӧшавны, кытчӧдз вирнас оз польдчы сантиметрӧдз. Айыс абу сэтшӧм горш, сійӧ медсясӧ уялӧ кучикӧдыс да та дырйи вермас некымынысь курччыны. Вирсӧ юӧ некымын дас минут. Клещыс кӧ боррелияа, курччӧминыс гӧрдӧдас, а сэсся пыкӧсыс мӧдас паськавны.
Россияын паськалӧма Европаса, Сибырса да Ылі Асыввывса вирус. Комиын рӧдмӧма Сибырсаыс.
Энцефалитысь медбура дорйӧ вакцина. Республикаса став олысьсӧ кӧ уколалам, вӧрса лудік йылысь позяс вунӧдны. Весиг паркын да шойнаын оз ковмы резсьыны акарицид химия сорасӧн. Уколавны колӧ и войвыв районъясын олысьясӧс. На пиысь кодсюрӧ гожӧмнас шойччӧ республика лунвылын. И вакцинатӧг налы гаг курччӧмыс мӧрччас ёнджыка. 5-6 прӧчентыс вермас воны инвалид выйӧдз, а Удора районысь ӧти морт таысь весиг кувсис.
Челядьлӧн республикаса клиника больничаысь врач-травматолог-ортопед Даниил Гоппе:
–Энцефалитысь позьӧ уколавны арӧса кагаӧс. Мӧйму 230 челядьысь, кодъяслы пысасьліс лудікыс, сӧмын 11-ыслы вӧчлӧмаӧсь прививка. Татшӧм серпасыс некытчӧ туйтӧм!
Мый вӧчны, сатшкысис кӧ вӧрса лудік?
Неылын кӧ эм поликлиника, ФАП, травмпункт, бурджык шыӧдчыны сэтчӧс специалист дінӧ. Сэні гагсӧ кыскасны да лабораторияын тӧдмаласны, эм-ӧ сылӧн вирус-бактерия.
Но позьӧ видлыны кыскыны гагсӧ и аслыд. Бур, эм кӧ ки улад вӧсньыд пинцет. Позьӧ лудіксӧ небыдика гӧрддзавны юр дорӧдыс сунисӧн да надзӧник ӧтарӧ-мӧдарӧ бергӧдлӧмӧн кыскыны. Нетшыштны оз позь, гагйыс вермас орны, да хобота юрыс коляс дояс.
Курччӧминсӧ колӧ кӧтӧдны 70 прӧчента спиртӧн, йодӧн либӧ одеколонӧн. Та бӧрын мыськыны китӧ майтӧгӧн. Перйӧм гагсӧ пуктыны стеклӧ дозмукӧ да нуны Коми Республикаын гигиена да эпидемиология шӧринса микробиология лабораторияӧ. Ставсӧ тайӧс колӧ вӧчны уна вылӧ куим лунӧн.
Курччӧм мортыс кӧ эз уколасьлы энцефалитысь, сылы вӧчасны серопрофилактика – уколаласны мортлӧн иммуноглобулинӧн, а казяласны кӧ боррелиоз – антибиотикӧн.
Уколсӧ вӧчӧм бӧрын мортыслы сетӧны справка-сертификат да юӧртӧны, кор нӧшта ковмас волыны ревакцинация вылас.
<> Николай Размыслов. Снимокыс авторлӧн.