Гажа тулыс воис. Регыд пансяс гӧра-кӧдза кад. Страда. Кутшӧм сьӧлӧмкылӧмъясӧн виччысьӧны сiйӧс республикаса видз-му овмӧсъясын? Мый колӧ тӧдны продовольственнӧй безопасносьт йылысь миянлы ставнымлы? Кутшӧм позянлун эм «Коми войтырлӧн» отсавны аграрийяслы бертны талунъя мытшӧдъяссӧ?
Та йылысь кольӧм пекничаӧ, март 14 лунӧ, паськыд сёрни мунiс «Коми войтыр» ӧтмунӧмса исполкомлӧн чукӧртчылігӧн. Газетын гижӧд сетӧ позянлун сӧмын дженьыдика тӧдмӧдны лыддьысьысьясӧс став тӧжд-майшасьӧмнас, мыйӧн юксисны исполкомлӧн чукӧртчылӧм вылӧ сиктса овмӧсъясысь воӧмаяс да чинаяс.
Медводз пасъя, мый чукӧртчылӧмыс вӧлi Выльгорт сиктын Коми Республикаса видз-му овмӧс техникумын. Ми кытшовтiм сэтысь став гараж-мастерскӧйсӧ, лабораторияяс, велӧдчан жыръяс. Техникумын эм ветклиника, асланыс «Кунсткамера». Сёрнитiм студентъяскӧд. Налы позьӧ эскыны: техникумын унатор вӧчӧны патриотъясӧс быдтӧм могысь!
Медуна тӧждыс, дерт, вичмис видз-му овмӧсса министр Сергей Николаевич Елдинлы. Сылы коліс и висьтасьны, мыйӧн государство вермӧ отсавны сиктса овмӧсъяслы кутчысьны вывтi нин вельмӧм рынокын, и вочавидзны налы, кодъяслы субсидияыс ӧнӧдз на абу воӧма, кӧть тулысыс тэрмӧдлӧ нин кӧйдыс, мувердас да ломтас-мавтас заптыны.
Исполкомсалӧн эм Сергей Николаевич вылӧ надеяыс, ӧд сiйӧ коми морт, сиктысь петӧмыдлӧн ӧд сьӧлӧмыс висьӧ сиктсаяс вӧсна. Да и восьса, оз ӧтдортчы йӧзкӧд аддзысьлӧмысь, кылӧ найӧс. Сӧмын тай ставсӧ, мый гӧгӧрвоӧ да мый кӧсйӧ, ӧтпырйӧ вежны оз вермы весиг министр.
Миян республикаын уна овмӧс уджалӧ агрохолдингӧ ӧтувтчӧмӧн, и ми зэв сюся кывзiм «Коми холдинг компанияӧн» веськӧдлысь Матвей Евгеньевич Гегешкоӧс. Планъясыс гырысьӧсь, кӧсйӧны отсавны и ӧнiялы, и выль овмӧсъяслы кыпӧдчыны. Кыдз шуласны, олыштам да аддзам… Мед эськӧ артмас!
Зэв коланаӧн ме лыддя сэтшӧм сёрни, сы йылысь кӧ позяс шуны: тайӧ стратегическӧй видзӧдлас, ӧд шуӧмсӧ кӧ удайтчас пӧртны олӧмӧ, сэки уна во кежлӧ лоӧ бурмӧдӧма войвывса овмӧсъяс, и том йӧз унджыкӧн кутасны локны овны-уджавны сиктӧ.
Стратегическӧй мӧвпъяссӧ ме кылi Изьва районысь ыджыд опыта предприниматель, «Коми войтыр» исполкомӧн веськӧдлысьӧс вежысь Олег Михайлович Терентьевлӧн сёрниысь.
Олег Михайлович, кыдз государственник, гӧгӧрвоӧ, мый ми вочасӧн вермам воштыны ассьыным продовольственнӧй безопасносьтнымӧс да пыр унджык кутам сёйны пальма выя вӧлӧга. А ӧд эм позянлуныс ас йӧв-яйӧн овны. Колӧ вежны государствосянь овмӧсъяслы, да торйӧн нин войвыв районсалы, отсӧг юклӧм вылӧ видзӧдлассӧ.
Кӧрткерӧс районса администрацияӧн веськӧдлысь Константин Анатольевич Сажинлӧн эм вӧзйӧм Россияса тшупӧдӧ шыӧдчӧмӧн дорйыны ичӧт сикт-грездлысь аскиа лунсӧ, ӧд найӧ эз веськавны государствосянь отсӧг сетан уджтасӧ. Сэнi сёрниыс мунӧ сӧмын «опорнӧй» сиктъяс йылысь. А «Ухта-97» племхозысь дояр Леонид Валентинович Ларичев чайтӧ, мый колӧ видз-му овмӧсъяссӧ сетны меставывса асвеськӧдлӧм улӧ да вӧчны наысь сельхозкооперативъяс.
Збыльысь, исполкомлысь тайӧ чукӧртчылӧмсӧ позьӧ ставнас шуны стратегическӧйӧн. Та мында овмӧсӧн веськӧдлысь да радӧвӧй уджалысь миян некор на эз чукӧрмывлы. И юалӧмъясыс налӧн дзик олӧмсьыныс петӧны да зэв стӧчӧсь.
Сідз, Сыктыв районса Чуклӧмысь Наталья Александровна Гусятникова юалӧ: «Кыдзи артмӧ, мый Сыктывкарса йӧв переработайтан завод примитӧ миян овмӧсысь йӧвсӧ 28 шайтысь, а кор бӧр вайӧны сiйӧс Чуклӧмса лавкаӧ, доныс содӧ 102 шайтӧдз? А нӧгыльлуныс сэні чинӧма нин».
Кӧрткерӧс районса Одыбысь Татьяна Васильевна Ларуковаӧс майшӧдлӧ, мый ӧнӧдз абу субсидия, и налы нинӧм вылӧ ньӧбны кӧйдыс да мувердас.
Алексей Иванович Габов тшӧктӧ корсьны дикоросъясысь сёян-юан вӧчан производство паськӧдӧм да кӧр ку песан удж лӧсьӧдӧм могысь позянлун.
Ыджыдвиддзысь Надежда Владимировна Макарова лача кутӧ, мый Россияын бӧр вынсьӧдасны оланпас, мед велӧдчанiн помалӧм бӧрын том специалистъяс кӧть нин куим во быть уджаласны производство вылын.
Видз-му овмӧс техникумса директорӧс вежысь Надежда Леонидовна Турова сёрнитiс дзик нин чукӧртчылӧм помланьын. Ми ас синмӧн аддзим, кыдзи сьӧлӧмсянь зiльӧны наставникъяс, мед том йӧз эз повны сиктса сьӧкыд уджысь, ӧд выль технологияяс воӧны и сиктӧ. Но, дерт, колӧ, медым техникум панысь-учредитель ыджыдджык ӧдӧн выльмӧдiс лабораторияяс, манипуляторъяс, «сюсь» макетъяс, сэки кокньыдджык лоӧ чукӧстны сэтчӧ велӧдчыны ыджыд вежӧра, зiль том йӧзӧс.
Став тӧдчана вӧзйӧмыс пырасны исполкомлӧн помшуӧмӧ. Баласӧ сылысь, дерт, вӧлi водзвыв лӧсьӧдӧма. Исполком кежлӧ дасьтысигӧн лои кытшовтӧма Кулӧмдiн, Мылдiн, Кӧрткерӧс районъясысь овмӧсъяс.
Миян веськӧдлысь Олег Амвросиевич Лажанев котыртліс видз-му овмӧсса министр Сергей Елдинкӧд, Каналан Сӧветса депутатъяскӧд некымын аддзысьлӧм. Содтӧд исполкомса секретар Иван Валерьевич Касев 2024 воын районъясын нуӧдӧм коми войтырлӧн конференцияясса кывкӧртӧдъясысь корсис видз-му овмӧс сӧвмӧдӧмлы инмана индӧдъяс. Таысь ставсьыс да тшӧтш и коми войтырлӧн XIII съездса резолюцияысь буретш и артмис исполкомлы вынсьӧдӧм вылӧ дасьтӧм кывкӧртӧд сюрӧсыс.
Но миян удж оз помась ки лэптӧмӧн да кырымпас пуктӧмӧн. Кӧть кутшӧм ыджыд вына гижӧдыд, вежсьӧмсӧ сiйӧ ачыс оз вӧч. Та вылӧ колӧ кад, вын, сям пуктыны. Уджалам, ёртъяс!
Аттьӧалам Коми Республикаса видз-му овмӧс техникумысь ыджыд котырсӧ миянӧс татшӧм бура примитӧмысь. Миянлы вӧлi нимкодь уджавны на ордын. Кутам отсавны, мед сиктса мывкыд да уджач томулов локтасны велӧдчыны техникумӧ.
***
Исполкомлысь помшуӧм, а сiдзжӧ министр Сергей Николаевич Елдинлысь да «Коми холдинг компанияӧн» веськӧдлысь Матвей Евгеньевич Гегешколысь презентация позяс аддзыны «ВКонтактеын» «Коми войтыр» котырлӧн лист бокысь. <>
Мария Кузьбожева. Снимокъясыс ӧтуввезйысь.