Мырдӧн некод эз ысты
Передӧвӧйӧ мунтӧдз Георгий кӧні сӧмын абу уджалӧма: шопералӧма, сварщикалӧма, весиг парикмахералыштны вевъялӧма. Но кутшӧмкӧ здукӧ гӧгӧрвоӧма, ог кӧ пӧ ветлы тыш-кось мунанінас, кыдзи йӧзыслы синмас видзӧдны кута? Мужичӧй шуӧ, некод пӧ менӧ сэтчӧ мырдӧн эз ысты. Ачым шуи, чукӧртчи и муні. Веськалӧма Донецк Народнӧй Республикаса Бахмутланьын пехота подразделениеӧ.
–Сідз артмис, мекӧд ӧти кадӧ сэтчӧ мунісны тшӧтш медбур ёртӧй, дядьӧй да чожӧй, – казьтылӧ Георгий. – Найӧ веськалісны коді кытчӧ: кодкӧ артиллерияӧ, мӧд – пехотаӧ, коймӧд – штурмӧвикӧ. Накӧд йитӧдсӧ кутны позянлуныс эз вӧв да, став выльторсӧ тӧдмавлі мамсянь. Звӧнитчылі гежӧдика, а сійӧ нин юӧртліс рӧдвуж-воинъяс йылысь. Ме тӧді, мый фашистлы паныд кӧнкӧ тышкасьӧны тшӧтш и матыссаясӧй, да лов вылын вӧлі кокньыдджык.
СВО мунанінын Носков збыльмӧдӧма уна сикас мог, а недыр мысти и отделениеса командирӧн индӧмаӧсь. Висьталӧ, боечьяскӧд пӧ век ӧти кывйӧ воӧдчылім, службасӧ найӧ нуисны кывкутӧмӧн.
–Миянлы тшӧкыда вайлісны гуманитарнӧй отсӧг: шебрас, футболка, кӧлуй да мукӧд коланатор. Волывлісны и челядьӧн гижӧм ышӧдана-шоныд кывъяса открыткаяс: «Ми эскам тіянлы, эскам Победаӧ, аттьӧ службасьыныд! Тыр-бурӧн бергӧдчӧй гортаныд». Видзим гижӧдъяссӧ морӧс зептын сьӧлӧм бердын вежа ӧбраз пыдди. Веськыда шуа, челядьӧн гижӧм открыткаясыс передӧвӧйын збыльысь шонтісны сьӧлӧмнымӧс…
Георгий висьталӧ, боечьяс дорӧ пӧ волывлісны и священникъяс: резлісны вежа ваӧн асьнымӧс и техника, кевмысисны, сеталісны омӧльысь видзан ичӧтик ӧбраз да киӧ кӧрталан лента. Мужичӧй шуӧ, татшӧм лента дорас пӧ сы выйӧдз велавсьӧма, гортӧ воӧм мысьт весиг эз вӧв окота разьнысӧ.
–Енмыс менӧ видзис – 2023 вося тулысын бергӧдчи гортӧ дзоньви-дзаӧн, – кывкӧрталӧ Георгий.
Велӧдӧ томӧс и арлыдаджыкӧс
–Спецоперация вылысь воӧм бӧрын сайкалі-реабилитируйтчи да пыри СВО-са ветеранъяс ассоциацияӧ. Ӧні ДОСААФ-ын инструкторала – дасьта зонъясӧс военнӧй тактика боксянь, – висьталӧ Георгий Носков. – Велӧда-туйда торъя военнӧй операция вылӧ мунны лӧсьӧдчысьясӧс. Минобороныкӧд контракт кырымалысьяс пӧвстын эмӧсь и комын арӧсӧдз зонъяс, и ветымын арӧсӧ матыстчысьяс. Овлӧ, локтӧны дзик опыттӧм войтыр, но велӧдчыны кӧсйӧмыс зэв ыджыд. И тайӧ медтӧдчана. Татшӧмъяссӧ велӧдам автомат тэчӧмсянь восьсаинын тыш нуӧданногӧдз. Эмӧсь и водзынджык контракт серти служитӧм, но «пӧсь точкаӧ» веськавлытӧмъяс. Бара жӧ колӧ дасьтыны найӧс ӧнія кадлы лӧсялана ногӧн.
Полигонын котрӧдлӧм-лыйсьӧм кындзи Георгий аддзӧ аскиа боечьяслы ловру кыпӧдан бур кывъяс. Ачыс сэн вӧлі да, юксьӧ передӧвӧйын олан-тышкасянногын гусяторъяснас.
Сям-кужанлунсӧ казявны
–Велӧдігӧн ми видзӧдам, кодлӧн мый бурджыка артмӧ. Кодкӧ кужӧмӧн веськӧдлӧ БПЛА-ӧн, кодыськӧ бур связист петас. Быдӧнлӧн эм кутшӧмкӧ сям, и командирлы колӧ казявны сійӧс. Аскиа боечьяс кузя кывкӧртӧднымӧс юӧртам СВО вылӧ нуны бӧръян-ыстанінын зільысьяслы, а найӧ нин сэсся помшуӧны, кодӧс кутшӧм войскаӧ индыны, – висьталӧ герой.
Кадысь кадӧ Георгий да уджъёртъясыс дорӧ волывлӧны школьник-студент котыръяс. Найӧ пӧ окотапырысь видлӧны-тӧдмалӧны ставсӧ: разьӧны-тэчӧны ӧружие, юасьӧны служба йылысь.
«Лента» сайын луныс — быдса олӧм
Кыдз тӧдса, СВО вылысь локтӧм бӧрын быд боечлы урчитӧма реабилитация. Уна воин вӧліны куланвыйынӧсь, кодкӧ чорыда ранитчис, кодкӧ воштіс ёртъяссӧ…
Налы ставныслы колӧ отсӧг да тӧжд. А кодлыкӧ тырмымӧн кутыштлӧм да «Ми гӧрдитчам тэӧн» шуӧм. Мед сӧмын тайӧ кывъясыс вӧліны сьӧлӧмсянь – воюйтӧмаыд ылӧдчӧмтӧ здукӧн казялӧ.
–Сэні, «лента» саяс, кадыс дзик мӧд нога мунӧ. Ӧти лунас сымдатор овлӧ, быдса олӧм кежлӧ тырмас, – юксьӧ видзӧдласнас вомъёрт. – Та понда, веськыда шуа, ог гӧгӧрво йӧзсӧ, кодъяслӧн став луныс ӧткодь: удж – горт – удж. Ог омӧльт найӧс, но гӧгӧрвоны татшӧмсӧ сьӧкыд. Найӧ оз зільны мыйкӧ вежны олӧмсьыс, тадз кӧ пӧ лӧсьыд, мыйла кытчӧкӧ мӧдлаӧ чепсасьнысӧ? А СВО вылад ставыс мӧд нога. Сэн быд здук зэлалӧмыд, кывкутан ӧд он сӧмын ас, но и ёрт вӧснаыд. Тэ сайын тшӧтш и орччаыдлӧн олӧмыс.
Кодсянькӧ кывлі, эм пӧ сэтшӧм «феномен тягучей жизни». Йӧзыс пӧ олӧны руын моз, вӧчӧны ӧти и сійӧ жӧ торсӧ, и та дырйи оз мӧвпыштчывны, мый ради тайӧс вӧчӧ-ны. А меным, мӧдарӧ, быд лун колӧ мыйкӧ выльтор, выль аддзысьлӧм, юалӧм, помшуӧм, ачымӧс венӧм…
Лов личӧдыс — спорт
Торъя военнӧй операцияӧ пырӧдчӧм бӧрын Георгий, аслас висьталӧм серти, вужвыйӧныс вежсьӧма. Унатор донъялӧ мӧд ногӧн. Шуам, войдӧр кӧ ёрт чукӧрын вермӧма курыдтор видлыны, ӧні войт оз ю. Гӧгӧрвоӧма, мый колӧ кутчысьны дзоньвидза оласногӧ да, водзмӧстчӧ спортын. Бӧрйӧма пауэрлифтинг, аддзӧма сьӧлӧм сертиыс тренерӧс. Тадзи и бергалӧ: тренировка, ордйысьӧм, бара тренировка да выль старт…
Неважӧн ордйысигӧн Георгий Носков вӧчӧма первой разряд шедӧдӧм могысь став упражнениесӧ. Тайӧ нӧшта ӧти неыджыд вермӧм да водзӧ вылӧ ышӧдӧм. А таысь кындзи мужичӧй бассейнӧ на ветлӧ, кӧть эськӧ водзыннас уявнысӧ абу кужӧма. Дерт, и СВО вылысь мукӧд воӧмаӧс ышӧдӧ пырӧдчыны спортӧ.
Ас пытшкад вӧйтчыны оз позь
–Тыш-кось мунанінысь воӧмаӧс ми корам пырӧдчыны СВО-са ветеранъяс ассоциацияӧ, – висьталӧ Георгий. – Ышӧдам водзмӧстчыны унджыклаын, велавны мирнӧй олӧмӧ. Шуам, ыстывлам нуӧдны мужество урок школаясын, дерт, и ордйысьӧмын сям-кужанлунсӧ видлыны. Унаӧн асьныс босьтчӧны чукӧртны гуманитарнӧй отсӧг. Ӧти кывйӧн, колӧ пыр мыйкӧ вӧчны, а оз вӧйтчыны ас пытшкад.
«Айму дорйысьяс» фондын дон босьттӧг сетӧны отсӧг психологъяс да, колігӧн ыстылам воинъясӧс сэтчӧ. Ми быдӧнӧс кутам син улын, чуйдам вӧчны то ӧтитор, то мӧдтор: шуам, талун школаӧ ветлыны, аски – психолог дорӧ, аскомысь спортын вын-эбӧс песыштны. Тадзи вочасӧн и велалӧны гражданскӧй олӧмас.
Елена Музыкант.
<> Комиӧдіс Елена Плетцер. Снимокъясыс Георгий НосковлӦн гортса архивысь.