2023 вося февраль 21 лунӧ Россияса президент Владимир Путин Федеральнӧй Собрание дорӧ шыӧдчигӧн казьтыштіс спецоперацияын доймӧм-ранитчӧмаяслы, налӧн семьяяслы отсалан тэчас лӧсьӧдӧм йылысь. А апрель 3 лунӧ 232-ӧд номера индӧдӧн шуис котыртны ставроссияса «Защитники Отечества» фонд.
Воддза вося июнь 1 лунӧ фондса филиалъясыс воссисны странаса 89 регионын, тшӧтш и Комиын. Коді сэтчӧ вермас шыӧдчыны да мыйӧн отсаласны? Мый вӧчӧмаӧсь нин да кутшӧм тӧжд-мог колӧ на збыльмӧдны?
Тайӧ да мукӧд юалӧм вылӧ республикаса юралысьлӧн Общественнӧй приёмнӧйын вочави-дзис «Айму дорйысьяс» фондлӧн татчӧс юкӧнӧн веськӧдлысьӧс вежысь Анатолий Фирдман.
–Анатолий Сергеевич, кодлы отсалӧ «Айму дорйысьяс» фондыс?
–Президентлӧн индӧдын стӧча пасйӧма кодлы. Медводз, тайӧ ветеранъяс, кодъяс спецоперация дырйи воюйтісны ДНР-ын, ЛНР-ын да Украинаын 2022 вося февраль 24 лунсянь, а сідзжӧ Запорожье да Херсон обласьтъясын 2022 вося сентябрь 30 лунсянь. Мӧд-кӧ, фонд отсалӧ налы, кодъяс воюйтісны 2014 вося май 11 лунсянь ДНР-са Вооружённӧй вынъясын, ЛНР-са Народнӧй милицияын да республикаясса мукӧд сикас воинскӧй тэчасъясын. И, коймӧд-кӧ, фонд борд улӧ веськалӧны став тайӧ ветеранъясыслӧн семьяясыс, воюйтысьыс кӧ пуктіс юрсӧ тыш-косьын либӧ гортас воӧм бӧрын кувсис служба дырйиыс ранитчӧмысь.
Фонд юкӧнын уджалӧ 43 морт, на пиысь 34-ыс – социальнӧй координатор. Тайӧ специалистъясыс зільӧны быд кар-районын. Кӧнсюрӧ кыкӧн, унджыклаас – ӧтиӧн. Сыктывкарын СВО-са ветеранъяслы да налӧн семьяяслы отсасьӧ медуна специалист.
Во чӧжӧн республикаса олысьяссянь миянӧ воис матӧ 8.6 сюрс шыӧдчӧм, кызвынсӧ могмӧдім нин, мукӧд кузяыс уджалам на.
–Мыйӧн вермас отсавны социальнӧй координатор?
–«Айму дорйысьяс» фонд юкӧнӧ позьӧ шыӧдчыны оз сӧмын кутшӧмкӧ торъя могӧн. Шуам, отсавны нюжӧдны ас керкаӧ биару. Тані ӧтчыдысь волігӧн, кыдз шуӧны, «ӧти ӧшинь пыр», позьӧ босьтны уна сикас отсӧг.
Социальнӧй координаторлӧн эм став позянлуныс быд боксянь збыльмӧдны СВО-са ветеранлысь тӧжд-могсӧ. Мыйкӧ кӧ оз артмы, сійӧ шыӧдчӧ мукӧд ведомство-министерствоӧ. И кыдз петкӧдлӧ олӧмыс, став мытшӧдсӧ позьӧ ӧдйӧ венны, и колана отсӧгыс воӧ дженьыд кадӧн.
Медсясӧ шыӧдчӧны ветеран удостоверенньӧла. Таысь ӧтдор фонд юкӧнса специалист отсалас ветеранлы да семьяыслы шыӧдчыны психолог, юрист дорӧ, судзӧдны колана лекарство, протез-коляска, санаторий-курортӧ путёвка, ранитчӧмаӧс ыстас реабилитируйтчыны республикаса больничаӧ, госпитальӧ да мукӧд бурдӧдчанінӧ, а сідзжӧ босьтны регионсянь сьӧма отсӧг, велӧдчыны мӧд специальносьтӧ да инасьны удж вылӧ, инвалидносьт урчитӧм могысь прӧйдитны медкомиссия.
Спецоперацияын воюйтысьлы отсаласны мездысьны вот, кредит, коммунальнӧй услуга кузя уджйӧзысь, босьтны патера, му участок, ыстыны челядьсӧ шойччыны да бурдӧдчыны гожся лагерӧ, пырны велӧдчыны вузӧ. Кутшӧмкӧ помка вӧсна ковмылӧ отсавны мортыслы демобили- зуйтчыны, шедӧдны сылы отпуск, рӧдвужыслы ветлыны ранитчӧма дорӧ госпитальӧ.
Дерт, ковмылӧ вӧчны и шогӧ уськӧдан удж – отсавны гуавны усьӧмаӧс, лӧсьӧдны-пелькӧдны гу гӧгӧрыс да сувтӧдны памятник. Бӧръя кадӧ юӧртӧг вошӧмаяслӧн рӧдвужлысь босьтам ДНК да ыстам Ростов обласьтӧ, кӧні видзӧны тӧдмавтӧм на боечьяслысь коляссӧ.
Сиктсалӧн корӧмыс корсюрӧ торъялӧ юркарсаысь. Сідз, корӧны отсавны поткӧдлыны пес, дзоньтавны керка вевт, вайны ва, пуктыны картупель.
Дерт, быдӧнлы отсалам, та могысь ӧтувтчӧны ведомство-организацияын зільысьяс, волонтёръяс, студентъяс да школаын велӧдчысьяс. Комиын медико-социальнӧй экспертиза бюрокӧд, удж, занятосьт да йӧзӧс социальнӧя доръян министерствокӧд да Социальнӧй фондкӧд ӧтув могмӧдам СВО-са ветеранъясӧс протез-коляскаӧн.
Социальнӧй фонд та могысь сетӧ электроннӧй сертификат, а миян эм позянлун содтыны колана мындаӧдз сьӧмсӧ. Чукӧртам кабала-документ да ыстам Москваӧ. Вочакыв воӧм бӧрын вештысям протез-коляска вӧчысьлы да вайысьлы.
Протез-коляскала шыӧдчыліс 1.672 морт. На пиысь 24 ветеранлы эг на вермӧй отсавны. Татшӧм оборудованиесӧ вӧчӧны Россияса предприятиеяс. Ставроссияса «Айму дорйысьяс» фонд да миян филиал уджалӧны аукцион-конкурсын вермӧм фирмакӧд.
Сёрнитчим и Новороссийскысь предприятиекӧд, кӧні вӧчасны миян зонъяслы протезъяс. Ки-коксӧ ставныслысь нин мерайтісны. Колана кабала-документсӧ дасьтам зэв ӧдйӧ. Но кодсюрӧ норасьӧны, зэв пӧ дыр виччысьнысӧ. Колӧ гӧгӧрвоны, мый протезӧн вӧдитчытӧдз колӧ, медым ки-кокныс та могысь бурдіс.
Фонд отсалӧ татшӧмъясыслы мыйсюрӧ вежны-дзоньтавны керка-патераас, медым коляскаӧн позис сэні лючки вӧдитчыны. Та могысь шыӧдчыліс 38 морт. Керка-патераас вӧчам пандус, ванна-душын да асмогасянінын лӧсьӧдалам воропъяс, унатор вежлалам пусян-нуръясянінас да с.в.
–А тіян дорӧ вермас шыӧдчыны, шуам, кутшӧмкӧ ЧВК-ын воюйтысь?
–Спецоперация вылысь воӧмаысь, сылӧн да усьӧмалӧн семьяясысь ӧтдор фонд отсалӧ кыдз мобилизуйтӧмалы, контрактниклы, доброволечлы, сідз и ЧВК-ын воюйтысьлы.
Миян абу некутшӧм моральнӧй право кодыськӧ ӧвтыштчыны, та понда ставныслы отсалам. Тшӧтш и Афганистанса да Чечняса ветеранъяслы. Та могысь фонд бердын восьтім РФ-са оборона министерстволӧн военно-социальнӧй шӧринлысь представительство. Миянкӧд орччӧн пукалӧ сэтчӧс специалист.
И ЧВК-са боечьяслӧн шыӧдчӧм серти чукӧртам став колана кабала-документсӧ да ыстам оборона министерствоӧ. Сэсянь миянлы воӧны дась удостоверенньӧяс. Отсӧгла шыӧдчыліс «Вагнер», «Редут» да мукӧд ЧВК-ысь матӧ 1.5 сюрс морт, нӧшта куимсёысь унджыкӧн виччысьӧны на колана документ-кабаласӧ.
Бӧръя кадӧ унаӧн шыӧдчӧны «Шторм Z» торъя подразделениеын воюйтысьяс кузя. Сэтчӧ медсясӧ босьтавлісны йӧзсӧ дзескыдінысь. И оборона министерство оз лыддьы найӧс контрактникӧн да доброволечӧн.
Сыктывкарын «Шторм Z»-ын воюйтысьяс кузя мунӧ суд. Сылысь кывкӧртӧдсӧ виччысьӧны Россия пасьталаын.
–Мый вӧчӧ фондныд, медым спецоперацияса ветеранъяс эз усьны ловнас?
–Медым найӧ эз кольны ӧтнаныс, вӧзъям налы пырӧдчыны уна сикас общественнӧй уджтасӧ, туйдны-велӧдны челядьӧс радейтны Аймунымӧс, историянымӧс да пӧль-пӧч традицияяс.
СВО-са ветеранъяс окотапырысь уджалӧны том йӧзкӧд, нуӧдӧны спортын, культураын да му- кӧд сикас гаж-ордйысьӧм. Школаясын ветеранъяс нуӧдісны мужество урокъяс, медтӧдчанатор йылысь сёрни да лекция. Тайӧ уджнас шымыртісны 19,5 сюрс велӧдчысьӧс.
«Zа Ней» клубын аньяс ёртасьӧны, висьтавлӧны-юксьӧны воюйтысь верӧсъясныслӧн, пияныслӧн подвигъяс йылысь. Клубас нуӧдӧны уна сикас тренинг, творчествоа мастер-класс, специалистъяслысь консультация да мукӧдтор.
Фонд кырымаліс государственнӧй тэчасъяскӧд да общественнӧй котыръяскӧд сё кызь сёрнитчӧм. Юридическӧй отсӧг дасьӧсь сетны республикаса нотариальнӧй да адвокат палатаяс, юрист ассоциация, усьӧмаяслӧн семьяяслы отсаласны регионса аньяслӧн союз, Комиын Россияса Социальнӧй фонд юкӧн, удж, занятосьт да йӧзӧс социальнӧя доръян министерство, ветеран котыръяс, а сідзжӧ Сыктывкарса госуниверситетысь юридическӧй клиника да госслужба академия.
Медтӧдчанаыс, медым спецоперация вылысь воӧмаяс да налӧн рӧдвужыс майшасьтӧг шыӧдчисны миян дорӧ, а ми нин быд боксянь отсалам налы.
* * *
Сыктывкарын «Айму дорйысь» фондыс Первомай уличаса 11-ӧд номера керкаын. Сійӧ восьса ӧкмыс час асывсянь квайт час рытӧдз. Субӧтаӧ да вӧскресенньӧӧ ӧкмыс асывсянь вит час рытӧдз. Позьӧ звӧнитны 8(8212)28-52-98 номера телефон пыр. Таысь ӧтдор позьӧ шыӧдчыны ӧтуввезса «Телеграм» да «ВКонтакте» пыр. <>
Николай РАЗМЫСЛОВ. Снимокъясыс авторлӧн да ӧтуввезйысь.