Республикаса юркарын пыр унджык ань окотитӧ босьтны машинаӧн ветлан D категорияа право. На пӧвстысь ӧти – Арина Сергеева. Сійӧ висьтасис машина радейтӧм, гуся кӧсйӧмсӧ збыльмӧдӧм да автобусӧн ӧнія удж йывсьыс.
Ичӧтдырся гуся кӧсйӧм
–Машина дорӧ пӧсь муслунӧй менам ичӧтдырсянь нин, – паніс сёрнисӧ Арина. –Дзолясянь окотапырысь видзӧді автомобильяслы сиӧм передачаяс: тӧдмаси машина пытшкӧсӧн, марка-сикасъясӧн, туй вылын лоӧмторъясӧн. Быдмышті да татшӧмсяма юӧръяссӧ корсялі ӧтуввезйысь нин.
B категорияа правосӧ ныв босьтӧма кызь куим арӧсӧн. А таӧдз гуся мӧвп-кӧсйӧмсӧ ас кежсьыс пӧжӧма. Сэки олӧма Санкт-Петербургын, велӧдчӧма сэтчӧс колледжын. Арина висьталӧ, ыджыд карад пӧ экзаментӧ зэв сьӧкыд сдайтнытӧ, да и машинаыс сэні эськӧ эз ковмы. Со Комиӧ бергӧдчӧм бӧрас и шуӧма збыльмӧдны могсӧ.
Велӧдчынысӧ заводитӧма 2020 вося мартын, да бара на падмӧг… Тӧлысь помас пандемия вӧсна ставнысӧ йӧршитісны гортас, и велӧдчӧмыс джӧмдӧма. Кольӧма сӧмын виччысьны. Машинаӧн ветлан правоыс сэки семьяас некодлӧн на абу вӧлӧма да, мамыс бабыскӧд тшӧтш виччысьӧмӧн виччысьӧмаӧсь Ариналысь экзамен сдайтӧмсӧ.
Эскыны ас вын-сямӧ
–Но и та вылын мытшӧдъясыс эз помасьны, – водзӧ висьтасьӧ Арина Сергеева. –2021 воын пандемиякӧд йитӧдын кутшӧмсюрӧ кокньӧдъяс йӧзӧдісны да, вобыд ковмис котравны-зільны ассьым могӧс збыльмӧдӧм ради. Тайӧ вӧлі збыльысь ыджыд шыпассянь Мог! Асьныд мӧвпыштлӧй: менам вежсис кык автошкола, ветлыны велӧдан вит машина да нёль инструктор. Экзаменсӧ сдайті важ правилӧяс серти на, а кар кузя ветлӧмсӧ – быдса квайтысь! Бур, мый ме зэв асныра: шуи кӧ мыйкӧ вӧчны, ог лэдзчысь. Дженьыда кӧ, туй выв правилӧяссӧ видлі сдайтны витысь, автодромсӧ – кыкысь да кар кузя ветлӧмсӧ – квайтысь. Тӧдсаясӧй весиг шуӧны нин вӧлі, эновтчы пӧ, тайӧ тэныд абу вын сертиыд. Но ме эг сетчы! И мукӧдыслы тшӧтш шуа: эскӧй асланыд вын-сямӧ!
Бӧръяысь экзаменсӧ Арина сдайтӧма мам чужан лунас. Ныв полӧма шогӧ уськӧдны матысса мортсӧ, весиг абу кӧсйӧма мунны экзамен вылас. Но транспортӧн ветлыны ыджыд кӧсйӧмыс венӧма. И ӧд ставыс артмӧма! Арина Сергеева зэв шоныда казьтылӧ Эжваса автошколаысь инструктор Виктор Забоевӧс, аттьӧ пӧ сылы зэв тӧлка велӧдӧмсьыс – тайӧ ӧнӧдз туй вылын вет-лігӧн отсалӧ.
Рультӧ крепыдджыка кут!
Мӧд лунас нин нывлы сетӧмаӧсь шопералан правосӧ, да сійӧ босьтчӧма корсьны аслыс лӧсялана машина. Сьӧмсӧ сы вылӧ козьналӧмаӧсь пӧль-пӧчыс. Автомобильсӧ ньӧбӧма вит лун мысти нин да дзик пыр пуксьӧма руль сайӧ. Полӧм ни майшасьӧм пӧ эз вӧв. Сӧмын окота вӧлӧма тӧдмавны, кы-дзи иномаркаыс кутӧ асьсӧ туй вылын. А кык лун мысти шойччан лунӧ мамыс корӧма Аринаӧс нулыны сійӧс лавкаӧ.
–Ывлавылын март: гӧгӧр ставыс сылӧ, шлапкӧ-лымъялӧ, туй вылын – рок. Ставӧн кытчӧкӧ тэрмасьӧны, а ме тӧлкӧн эг на велав «визулас» пырны-веськӧдчынысӧ. Сійӧ лунас менӧ кыкысь шыбӧлитӧдіс. Зэв ёна повзи, но машина рульсӧ крепыда куті! Тайӧ вӧлі вермӧм! Чуймӧдана, но шыблӧдлігас мамӧй весиг синнас эз лапнитлы. «Ой, ме тайӧ олӧмас нинӧмысь нин ог пов!» – шуис бӧрыннас.
Вӧляникысь Ариналӧн содӧма сям-кужанлуныс. Кутӧма журъявны-новлӧдлыны ёртъяссӧ, уджъёртъяссӧ, рӧдвужсӧ. Тӧлысь мысти петӧма Сыктывкар – Ухта трасса вылӧ матыссаясыскӧд. Ӧтарӧсӧ лючки воӧдчӧмаӧсь, а со мӧдарӧсӧ повзьымӧнъя лолӧма. Туй чукыль сайысь друг воча петӧма ӧтпырйӧ некымын фура ордъян легковушка. Шуд вылӧ, большегрузъясысь ӧти шопер казялӧма тэрмасьысьсӧ да лэдзӧма колоннаас ас водзас. Тадзи вывті повтӧм шоперыд лэбыштӧма бокиті.
Контролёр пыдди шопер
Кольӧмвося сентябрын Ариналы син улас усьӧма ӧтуввезйын «Комиавтотрансӧ» контролёрӧс корсьӧм кузя юӧр. Ветлӧма та кузя сёрнитчыны да, сылы вӧзйӧмаӧсь велӧдчыны автобусӧн веськӧдлыны. Тадзи контролёралігкості и велӧдчӧма D категория босьтӧм могысь (таысь вештысьӧма предприятие).
–Нинӧм сьӧкыдыс таын эз вӧв. Тырмымӧн вӧлі волыны автобусӧн веськӧдлыны велӧдан быд занятие вылӧ да сюся кывзыны инструкторӧс. А экзаменсӧ сдайті … первойсяньыс. Ставыс артмис! Таысь вӧлі нӧшта на нимкодь, сідзкӧ, мися, олӧм-уджын лӧсялана туйвизь бӧрйи! – нюмъялӧ Арина. –Колӧ шуны, асшӧр компанияясын тшӧтш дон босьттӧг велӧдӧны да могмӧдӧны уджӧн. А миян предприятие сетӧ позянлун страхуйтчыны медицина боксянь да ветлыны клиникаясӧ бурмӧдны дзоньвидзалун дон вештытӧг.
Ме ас местаын
–Талун ме новлӧдла йӧзӧс 10-ӧд номера маршрутын (кӧрт туй вокзалсянь аэропортӧдз). Сійӧ дженьыд, но йӧзыслы зэв колана. Вывті унаӧн оз ветлыны, но йӧзыс век эм, – шуӧ нывбаба. Да пасйӧ, казялі пӧ, аньыд автобуснад ветлӧ ӧкуратнӧйджыка, оз тэрмась ни оз нетшкысь. – Ог тӧд, кыдзи мукӧдыслӧн, а менам «десяточкаӧн» ветлӧны медся аслыспӧлӧс да варов йӧз!
Арина висьталӧ, йӧзыс пӧ аддзӧны менӧ руль сайысь да юасьӧны, сьӧкыд абу уджавнысӧ, ыджыд-ӧ нажӧткаӧй, да кыті мунӧ автобусыс. Мукӧддырйиыс пӧ сувтланінын урчитӧм кад виччысигкості висьтавлӧны ас йывсьыныс. Эмӧсь и ӧти и сійӧ жӧ кадӧ быд лун ветлысьяс.
–Найӧ чолӧмасьӧны автобусын ӧта-мӧдныскӧд, юасьӧны, кыдзи луныс коли. А ме кыла тайӧс, и сьӧлӧм-лов вылын лолӧ шоныд. Аддза нюмнысӧ да гӧгӧрвоа, мый уджӧй налы колана, и ме ас местаын.
Елена Музыкант.
<> Комиӧдіс Елена Плетцер. Снимокъясыс Купава Волковалӧн.