Февраль 14 лунӧ Коми Республикаса академическӧй опера да балет театрын лоӧ енбиа артистка, вокалистъяслӧн войтыркостса конкурсъясын лауреат да дипломант, «Онегин» национальнӧй премияа лауреат, Коми Республикаса правительстволӧн премияа да С.Ермолин нима театральнӧй конкурсса лауреат Галина Петровалӧн бенефис.
Дас вит во нин сійӧ гажӧдӧ аслас петкӧдчӧмӧн искусство радейтысьясӧс. Тшупӧда рыт кежлас дасьтӧ Жорж Бизелысь «Кармен» опера.
Казьтыштам, «Кармен» операсӧ (дирижёр-постановщикыс Азат Максутов, режиссёр-постановщикыс Илья Можайский) миян театрысь артистъяс медводдзаысь петкӧдлісны 2016 воын Данфермлинын (Шотландия) суйӧрсайса гастроль дырйи. Галина Петрова ворсіс пӧсь вира чиганка Карменӧс.
А сэсся тайӧ сылӧн рольыс лои медся яръюгыдъяс лыдын. Кармен куын енбиа артистка петавліс сцена вылӧ комынысь унджыкысь, ворсіс и ас сцена вылын, и Великобританияса театръ-ясын, а сідзжӧ Архангельскын «Оперные сезоны» фестивальын, Улыс Новгородса А.С.Пушкин нима опера да балет театрын.
А нӧшта бӧрӧджык кӧ косавлыны, Галина Петрова медводдзаысь ворсӧма Карменӧс 2012 вося ноябрын (постановкасӧ дасьтӧма Ия Бобракова).
Кармен – медся радейтана партияясысь ӧти. Буретш тайӧ рольсьыс Галина Петроваӧс пасйӧмаӧсь С.Ермолин нима республикаса театральнӧй конкурсын «Лучшая женская роль» нимпасын. Артисткалӧн зэв бура артмӧ петкӧдлыны вӧля радейтысь, збой да пӧсь вира чиганкаӧс, код вӧсна косьмӧ мужичӧйяслӧн сьӧлӧмыс. Сійӧ повтӧм да, сы гӧгӧр ставыс пуӧ.
Бизелӧн опера шедеврын буретш Кармен и вӧчӧ ставсӧ яръюгыдӧн да ыззьӧданаӧн, сюрӧсыс сы гӧгӧр гартчӧма да.
–Пыдди пуктана видзӧдысь, ме виччыся тіянӧс бенефис вылӧ, кодӧс сиа аслам творчествоын дас витӧд тшупӧда паслы.
Ме бара на ворса пӧсь вира да повтӧм сьӧлӧма, радейтны кужысь Карменӧс, – шыӧдчӧ искусство радейтысьяс дорӧ Галина Петрова.
Жорж Бизелӧн «Кармен» операын сыкӧд петкӧдчасны ёртъясыс да уджъёртъясыс, на лыдын Алексей Петров, Елена Лодыгина, Анастасия Морараш, Андрей Ковалёв, Дарья Гапонова, Михаил Ярмольский, Максим Палий, Сергей Журков.
А Хозелысь партиясӧ сьылас Санкт-Петербургса Мариинскӧй театрысь солист, миян радейтана земляк Михаил Макаров.
Дирижёралас маэстро Максим Качалов.
Колӧ пасйыны и сійӧс, мый Галина Петровалӧн бенефис водзын лоӧ «Когда театр становится жизнью» творческӧй аддзысьлӧм.
Искусство радейтысьясӧс артистка виччысьӧ февраль 10 лунӧ. Галина Петрова висьталас аслас олӧм да творчество, радейтана партияяс йылысь, вочавидзас видзӧдысьяслӧн юалӧмъяс вылӧ.
Енмыс козьналӧма Галина Петровалы мича меццо-сопрано гӧлӧс. Артисткалӧн репертуарын нелямын сизим роль-партия.
Енбиа артистка вермӧ сьывны операын, опереттаын да мюзиклын, а сідзжӧ челядьлы мойдын. Кутшӧм кӧть постановкаын оз ворс, мастера артмӧ.
Да и ачыс сійӧ, ен сыкӧд, мича ань. Видзӧдысь нимкодясьӧ сылӧн статьӧн и ворсан сямӧн. Вермас артистка и нормӧдны, и ыззьӧдны.
Эмӧсь сылӧн творческӧй кудйын и буретш меццо-сопранолы гижӧм сідз шусяна «гача партияяс».
Енбиа артистка уджӧ босьтчӧ сьӧлӧмсяньыс, ассьыс быд геройӧс вӧчӧ тӧдчанаӧн да вунӧдлытӧмӧн.
Ошкӧны Галина Петроваӧс оз сӧмын Сыктывкарын да миян республикаса мукӧд кар-районын олысьяс. Бура тӧдӧны да нимкодясьӧны сылӧн сьылӧм-ворсӧмӧн Чебоксарыын, Москваын, Саранскын, Ижевскын, Йошкар-Олаын, Кировын, Улыс Новгородын, Архангельскын, а сідзжӧ суйӧр сайын, Великобританияын искусство радейтысьяс.
<> Екатерина МАКАРОВА. Снимокъясыс Коми Республикаса опера да балет театр архивысь.