«Связь времён» – татшӧм нима уджтас збыльмӧдӧны Комиысь енбиа войтыр да Санкт-Петербургын, мукӧд регионын олысь миян землякъяс.
Уна сикас мог индӧма сэні пӧртны олӧмӧ: котыртны-нуӧдны коми кывйӧн тӧдмӧдан да йӧзкостса шылада инструментъясӧн ворсны велӧдан мастер-классъяс, нэмӧвӧйся коми культура видзысь-сӧвмӧдысьяскӧд аддзысьлӧмъяс.
А медыджыд могыс – гижны коми сьыланкывъяса «Круг шӧрын» фолк-альбом.
Татшӧм нима жӧ сьыланкыв (кытшӧн ветліг-йӧктігӧн юрган сьылансӧ фольклор туялысьяс гижлӧмаӧсь 1959 воын Сыктывдін районса Шыладор грездын) дасьтӧмаӧсь да, ӧні нин сійӧс по-зьӧ кывзыны «ВКонтактеын» «Проект «Связь времён» лист бокысь. Сьылӧ Валентина Лебедева.
Кӧрткерӧс районса Пӧддельнӧйын чужлӧм тайӧ аньыс олӧ-уджалӧ Санкт-Петербургын, мӧйму лоис «Василей» конкурсын вермысьӧн.
А альбомсӧ восьтас Сыктывдін районса Ыб сиктын гижлӧм «Дас кык ая-пиа» сьылан.
–Фолк-альбомӧ лоӧ пыртӧма мортлысь чужӧмсяньыс став олӧмсӧ петкӧдлан коми йӧзкостса сьыланкывъяс, – висьталіс Валентина Лебедева. – Но юргасны найӧ выльмӧдӧмӧн нин, мед и том йӧз окотапырысь найӧс кывзісны.
Олӧм кытшыс тыдовтчӧ и уджтас логотип-пасын: пыжын сулалӧны кык том ань, ворсӧны сигудӧкӧн, а найӧс кытшолӧн вевттьӧ-видзӧ Эжва йывса орнамент-серъясысь ӧшкамӧшка.
Пассӧ мӧвпыштӧма Кулӧмдін районса Ӧлек грездын чужлӧм Анастасия Вологжанина.
Сійӧ вӧчас быд сьыланкывлы серпас, а сэсся петкӧдлас найӧс Санкт-Петербургын «Круг шӧрын» фолк-альбом нимӧдан чукӧртчылӧм дырйи.
«Связь времён» уджтас сертиыс коми йӧзкостса шылада инструментъяс – чипсан-пӧлян, сигудӧк – вӧчны босьтчис Александр Забоев. А февральын нин сійӧ тӧдмӧдас питерсаӧс ворсанторъяснас да петкӧдлас, кутшӧм шыяс найӧ лэдзӧны.
* * *
«Связь времён» уджтас збыльмӧдӧны Росмолодёжлӧн гранта сьӧм вылӧ.
Павел Симпелев. Снимокъясыс Валентина ЛебедевалӦн гортса архивысь.