Бӧръя квайт восӧ «Монди СЛПК» лэдзӧма Комиын юясӧ дона чери рӧдысь 1,7 миллионысь унджык арпи. Кыдзи пасйӧны компанияын, татчӧс юясын чери рӧдмӧдӧм тшӧтш лоӧ налӧн могӧн.
И сідз, таво гожӧм «Монди СЛПК» лэдзӧма Эжваӧ 250.000-ысь унджык кебӧс арпи. Кытчӧджык лэдзны, водзвыв сёрнитчӧмаӧсь «Коми войтыркӧд». Содтӧд на 9.000 татшӧм дона арпиянсӧ лэдзӧмаӧсь Княжпогост районса Серегов дорӧ Емва юӧ.
Дона арпиянсӧ «Монди СЛПК» быдтӧма Мылдін районса Еремейын да Удора районса Косланын. Тайӧ сиктъясас эм «Главрыбвод» ФГБУ-лӧн филиал. Черисӧ рӧдмӧдӧны-видзӧны торъя инкубаторъясын.
Кыдзи пасйылім нин, «Монди Сыктывкарса ЛПК» Комиын черисӧ рӧдмӧдӧ уна во нин. Кебӧсӧн кындзи озырмӧдӧны республикаса юяс и комӧн.
–Чери искусственнӧя быдтӧмыс да ваӧ лэдзӧмыс тӧдчана экологиялы и ю-тыыслы. А юясыд кӧ чериаӧсь, таысь нимкодь и йӧзыслы. А «Монди СЛПК», кыдз кывкутысь компания, зільӧ та могысь, – висьталіс чери кыйӧм кузя Рытыв-Войвыв федеральнӧй агентстволӧн Коми Республикаын государственнӧй контроль, надзор да чери видзан юкӧнӧн веськӧдлысьлысь удж вӧчысь Николай Величко.
2019 воын юясӧ арпиян лэдзалӧмӧ тшӧтш пырӧдчӧмаӧсь «Монди СЛПК»-ысь шӧр экологӧс вежысь Елена Стафеева, республикаса ихтиологъяс, а сідзжӧ чери кыйӧм кузя федеральнӧй агентстволӧн Рытыв-Войвыв управлениеын, Коми Республикаса видз-му овмӧс министерствоын, «Главрыбвод» ФГБУ-лӧн Коми филиалын зільысьяс.
–«Монди СЛПК»-лы зэв тӧдчана видзны вӧр-ва. А юясын чери рӧдмӧдӧм – тайӧ компаниялӧн медшӧр могъясысь ӧти нырвизь, – шуис предприятиеса главнӧй эколог Дмитрий Очеретенко.
«Коми му» газетысь, кодӧс позьӧ судзӧдны пошта пыр, позьӧ ньӧбны «Ордым» лавкаын. Медым лыддьыны электроннӧй версия, личкӧй татчӧ. Эмӧсь кӧ юалӧмӧяс, гижӧй komi-kerka@ya.ru.