Усинск районса Щельябӧж да Мутнӧй Материк сиктъясын «ЛУКОЙЛ» компанияӧн вичмӧдӧм сьӧм вылӧ кыпӧдӧмаӧсь врачебнӧй амбулаторияяс, кӧні лоӧ восьтӧма тшӧтш и лунся стационарлысь палатаяс.
Войвывса тайӧ кык ылі сиктас бурдӧдчанінъясыс ёна нин важмӧмаӧсь, стрӧитлӧмаӧсь найӧс пуысь кольӧм нэмся 70-80-ӧд воясӧ да оз нин лӧсявны медицина дорӧ ӧнія кадыслӧн корӧмъяслы.
–Йӧзлысь, торйӧн нин Ылі Войвылын олысьяслысь, дзоньвидзалунсӧ видзны да ёнмӧдны зэв тӧдчана кыдз регионса да муниципалитетъясса веськӧдлысьяслы, сідз и миян компаниялы, – висьталіс «ЛУКОЙЛ-Коми» ООО-ысь генеральнӧй директорӧс йӧзкӧд йитӧдъяс кузя вежысь Евгения Лясковская. – Щельябӧжын да Мутнӧй Материкын олысьяслы медицина отсӧгыс колӧ, кыдз шуласны, тані да ӧні. Та вӧсна и шуӧма вӧлі Коми Республикаса правительство да «ЛУКОЙЛ» компания костын ёртасьӧм йылысь сёрнитчӧм серти кыпӧдны тайӧ кык ылі сиктас ӧнія выль бурдӧдчан амбулаторияяс.
Пӧдрада компанияысь исполнительнӧй директор Павел Черепановлӧн кывъяс серти, Щельябӧжын да Мутнӧй Материкын выль амбулаторияясыс пӧшти дасьӧсь нин, мед могмӧдны сэні сиктсаясӧс медицина услугаясӧн. Вайӧма нин ӧнія выль бурдӧдчан оборудование да аппаратъяс, пелькӧдӧма ӧшинь увъяс. Ӧні дасьтӧны медучреждениеяссӧ восьтӧм могысь колана документ-кабала.
Кыкнан амбулаторияас лӧсьӧдӧма стоматология да физиотерапия кабинетъяс, лунся стационарын куйлысьяслы палата.
Стрӧйбаясыс автономнӧйӧсь, сэтчӧ сувтӧдӧма дизеля генераторъяс, кодъяс сетасны амбулаторияясас югыд би, электросетьын кӧ сійӧ кусас. Сідзжӧ автономнӧя кутас воны ва.
Амбулаторияясас волыны некутшӧм падмӧг-мытшӧд оз ло и вермытӧмъяслы: налы лӧсьӧдӧма пандусъяс, а сідзжӧ торъя санузелъяс.
Таысь ӧтдор, матысса тӧлысьясӧ нин Щельябӧжын эштӧдасны сэтчӧс медикъяслы служебнӧй оланін: кык патераа выль керка.
Снимокъясыс «ЛУКОЙЛ-Коми» ООО-лӧн пресс-службаысь.
«Коми му» газетысь, кодӧс позьӧ судзӧдны пошта пыр, позьӧ ньӧбны «Ордым» лавкаын. Медым лыддьыны электроннӧй версия, личкӧй татчӧ. Эмӧсь кӧ юалӧмӧяс, гижӧй komi-kerka@ya.ru.