Видео | Юрист дорӧ – ӧтуввез пыр

Тавося майын Комиын государственнӧй юридическӧй бюро да республикаса юралысьлӧн Общественнӧй приёмнӧй босьтчисны збыльмӧдны регионын олысьяслы юридическӧй отсӧг дон босьттӧг сетӧм кузя ӧтувъя уджтас. Проектыслӧн аслыспӧлӧслуныс сыын, мый регионса олысьяслы ыджыд сяма юристъяс дорӧ майшӧдлана юалӧмъяснас позьӧ шыӧдчыны скайп пыр, да та могысь оз нин ков волыны Сыктывкарӧ. Кыдзи котыртӧма тайӧ уджсӧ да мый колӧ тӧдны Общественнӧй приёмнӧйӧ шыӧдчысьяслы  та йылысь сёрнитім приёмнӧйысь эксперт-специалист Мария Юшковакӧд.

Мария Васильевна, «ВКонтакте» везйын выльторъяс видзӧдалігӧн син улӧ усис юӧр, республикаса юралысьлӧн Общественнӧй приёмнӧйын пӧ вермасны дон босьттӧг скайп пыр сетны юридическӧй отсӧг. Висьтыштӧй, коді сетӧ татшӧм отсӧгсӧ онлайнын?

–Збыльысь, ӧнi кар-районын олысьяслӧн лои унджык позянлун мынтысьтӧг шыӧдчыны юристъяс дорӧ отсӧгла. Тавося май тӧлысьын государственнӧй юридическӧй бюро да Коми Республикаса юралысьлӧн администрациялысь удж могмӧдан шӧрин кырымалicны ӧтувъя удж кузя сёрнитчӧм. Сы серти республикаса юралысьлӧн Общественнӧй приёмнӧйясын госюрбюроысь юристъяс вермӧны отсавны скайп пыр Комиын олысьяслы.

Кыдзи котыртӧма тайӧ уджсӧ?

–Торъя график серти Общественнӧй приёмнӧйын уджалысьяс юӧртӧны онлайн-консультация вылӧ гижӧдчӧм йылысь газетъясын либӧ «ВКонтакте» группаясын. Тадзи гижӧдчысьлы индӧм кадӧ колӧ локны Общественнӧй приёмнӧйӧ, медым скайп пыр сёрнитны госюрбюроысь юристкӧд.

Дон босьттӧг шыӧдчыны позьӧ дзик быдӧнлы?

–Оланпас серти, мынтысьтӧг юридическӧй отсӧг сетсьӧ вермытӧмлы, пенсионерлы, уна челядя семьялы, ветеранлы. Ставнас лыддьӧгнас позьӧ тӧдмасьны республикаса юстиция министерстволӧн сайтын, госюрбюроын либӧ звӧнитны Общественнӧй приёмнӧй службаӧ.

Кутшӧм юалӧмӧн позьӧ шыӧд-чыны?

–Оланiн, жилищно-коммунальнӧй услугаясӧн могмӧдӧм, пенсия да пособие индӧм, алимент перйӧм кузя да сідз водзӧ. Приём вылӧ гижӧдчигӧн Общественнӧй приёмнӧйын уджалысьяс висьталасны шыӧдчысьлы, вермасны-ӧ отсавны госюрбюроысь юристъяс сылӧн юалӧм кузяыс.

Кутшӧм документъяс колӧны та могысь?

–Паспорт да кокньӧдӧн вӧдитчӧм кузя эскӧдана документ. Став тайӧ кабаласӧ колӧ петкӧдлыны Общественнӧй приёмнӧйын уджалысьлы, кодi сканируйтас найӧс да ыстас госюрбюроӧ электроннӧй пошта пыр. Та дырйи  тшӧтш пасъя, мый став документсӧ ыстӧны торъя электрон-нӧй канал пыр сідз шусяна персональнӧй даннӧйяс видзӧм кузя оланпас серти.

А мортыс кӧ юристлы став колана кабаласӧ ваяс онлайн-консультация вылӧ?

–Консультация дырйи колана став кабаласӧ тшӧтш сканируйтӧны да ыстӧны госюрбюроӧ. Но бурджык вӧчны тайӧс водзвыв, медым юрист скайп пыр йитчытӧдз на вермис тӧдмасьны наӧн да бурджыка отсавны.

Мыйӧн юрист вермӧ отсавны шыӧдчысьлы онлайнын татшӧм «аддзысьлӧм» дырйиыс?

–Сійӧ туйдас-висьталас, мый да кыдзи колӧ вӧчны, кутшӧм кабала дасьтыны да кытчӧ сійӧс ыстыны-нуны. Колӧ кӧ отсавны гижны кутшӧмкӧ официальнӧй шыӧдчӧм, элясьӧм да мукӧд кабала, либӧ колӧ кӧ петкӧдчыны ёрдын, сэк госюрбюроысь специалистъяс уджалӧны нин мортыскӧд веськыда, рочӧн кӧ, напрямую.

Ёна-ӧ колана татшӧм выль уджаланногыс? Кыдзи донъялӧны выльпыртӧмсӧ йӧзыс?

–Кык тӧлысьӧн ӧкмыс муниципалитетын онлайн-консультацияяс дырйи юристъяс отсалicны нин комын гӧгӧр мортлы. Ставӧн шуӧны, мый уджсӧ тадзи котыртӧмыс зэв кивыв, торйӧн нин сиктса войтырлы, ӧд оз нин ков локны юркарӧ да корсьны юристӧс. Йитӧдыс зэв бур, и ӧта-мӧдӧс позьӧ лючки аддзыны да кывны. Татшӧм «аддзысьлӧмъ-яс» отсӧгӧн позьӧ оз сӧмын дорйыны право, но и видзчысьны сійӧс торкалӧмысь.

Мария Васильевна, казьтыштӧй нӧшта ӧтчыд, кытысь сиктса войтыр вермасны тӧдмавны матысса кадӧ онлайн-консультация йылысь?

–Та кузя юӧрыс йӧзӧдсьӧ республикаса юстиция министерстволӧн сайтын да Общественнӧй приёмнӧйлӧн «ВКонтакте» группаясын. Шуам, тӧрыт скайп пыр консультациясӧ вӧлі котыртлӧма Кулӧмдiн районса Общественнӧй приёмнӧйын, а август 14 лунӧ лоӧ Луздор районын. Луздорын олысьяслы позьӧ гижӧдчыны приём вылӧ 8(82133)2-34-30 телефон пыр. И медбӧрын пасъя, мый юристъяскӧд йитчылігӧн сёрниыс  мунӧ сӧмын рочӧн.

Сёрнитіс Инесса Орёл.

«Коми му» газетысь, кодӧс позьӧ судзӧдны пошта пыр, позьӧ ньӧбны «Ордым» лавкаын. Медым лыддьыны электроннӧй версия, личкӧй татчӧ. Эмӧсь кӧ юалӧмӧяс, гижӧй komi-kerka@ya.ru.

Видео | Юрист дорӧ – ӧтуввез пыр

«Коми му» газетысь, кодӧс позьӧ судзӧдны пошта пыр, позьӧ ньӧбны «Ордым» лавкаын. Медым лыддьыны электроннӧй версия, личкӧй татчӧ. Эмӧсь кӧ юалӧмӧяс, гижӧй komi-kerka@ya.ru.

Пролистать наверх