Россияын котыртісны том йӧзлы ставмирса фестиваль
Дзик неважӧн на Комиысь делегация ветліс том йӧзлӧн ставмирса фестиваль вылӧ. Сочиса «Сириусын» миян регионсянь водзмӧстчис 36 пырӧдчысь да 25 волонтёр. А ставсӧ Краснодар край вочааліс 25 сюрс мортӧс.
Ставмирса гажас пырӧдчисны 18-35 арӧса том йӧз, наысь кындзи вӧлі кык школьник. А волонтёравны вермисны 18 арӧс тыртӧмаяс (Комиысь медся ыджыд арлыдаыслы вӧлі 66).
Сочиса фестиваль вылӧ ветлыны уси шуд и Сыктывкарса том йӧз шӧринӧн веськӧдлысь Таисия Рочевалы.
– Ме пырӧдчи уна гаж-фестивальӧ, но татшӧм ыджыд да уна войтыра вылас веськалі медводдзаысь на, – шуӧ Таисия. – Фестиваль ӧтувтліс ставмирса том йӧзӧс да петкӧдліс: быд войтырлӧн культураыс торъялӧ, но мӧвпалӧмыс да аскиа лунсӧ аддзӧмыс – дзик ӧткодьӧсь.
Тайӧ ыджыд аддзысьлӧмсӧ котыртісны, медым петкӧдлыны став мирыслы, мый Россия – быдӧнкӧд ёртасьны дась восьса страна.
Выль лун – выль тема
Фестивальӧ пырӧдчыны окотитысьяс медводз ордйысисны конкурсын: шыӧдчисны, дасьтісны портфолио, гижисны эссе да видеоролик. Содтӧд пырӧдчисны амбассадорӧн лоны кӧсйысьяс. И буретш амбассадорӧн вӧлі Таисия.
– Пӧшти вежон ми олім торъя олӧм. Быд лун – выль тема. Шуам, март мӧдӧд луныс вӧлі сиӧма мирлӧн судьба вӧсна кывкутӧмлы. Национальносьт, культура да политика нырвизь вылӧ видзӧдтӧг фестивальӧ быд пырӧдчысь гӧгӧрвоис: мед быдлаын вӧлі мир – колӧ ӧтувтчыны, – пасйис Таисия. – Март коймӧд лунӧ нимӧдім национальносьтъяс. Быд войтырлӧн – аслас кыв-культура, и таын сылӧн мичлуныс да мирын коланлуныс. Март нёльӧд лунсӧ сиим позянлунъяс петкӧдлӧмлы: мортыс вермӧ велӧдчыны, бурдӧдчыны, вӧдитчыны колана юӧрӧн, технологияӧн… Март витӧд лунӧ нимӧдім семья да челядьӧс, ӧд Россияын олысьяслӧн ӧні эм позянлун бура быдтысьны да сӧвмыны водзӧ. Фестивальсӧ кыпыда сигӧртім март квайтӧд лунӧ – сэки миян водзын висьтасис Владимир Путин. Сыкӧд аддзысьлӧмсӧ виччысисны унаӧн, и эз весьшӧрӧ. Странаӧн веськӧдлысь бура да лӧсьыда миянкӧд сёрнитіс, гӧгӧрвоӧдіс уна тема, позянлун да тӧдчӧдіс: том йӧз киын – аскиа луныс, а сідзкӧ, миянлы колӧ водзмӧстчыны да видлыны ӧтувтчыны, ӧтсӧгласӧн корсьны вочакывъяс, мед быдӧнлы вӧлі лӧсьыд овны да сӧвмӧдны асьсӧ.
Фестивальлӧн вӧлӧма и талисман – Чебурашка, ичӧтсянь быдӧнлы тӧдса мультфильмысь герой. Сійӧ абу ставныс кодь, но такӧд тшӧтш Чебурашка восьса выльыслы, кӧсйӧ ёртасьны да эскӧ, мый быд лун вайӧ сӧмын бур.
Томулов гаж уджтасыс вӧлӧма зэв паськыд: лекция, мастер-класс, «гӧгрӧс пызан», делӧвӧй ворсӧм, роч да суйӧрсайса нималана спикеръяскӧд ёрта сёрни, поэтическӧй проект, концерт-шоу, перформанс, кинопоказ, КВН, спорткӧд йитчӧм аддзысьлӧмъяс, спортса легендаяскӧд быдлунъя зарядка, ГТО, художествоа гимнастика фестиваль, матч-забег, уна сикас выставка.
Сӧвмыны позянлун
– 2017 воын ме вӧлі волонтёрӧн том йӧзлӧн да студентъяслӧн ставмирса фестиваль дырйи, – водзӧ сёрнитіс Таисия. – Таво вӧлі пырӧдчысьӧн да амбассадорӧн. Водзӧ вылӧ, гашкӧ, коркӧ и котыртысьяс лыдын лоа.
Таисия – Мокчойын чужлӧм изьваса морт. Велӧдчӧма Сыктывкарын Питирим Сорокин нима госуниверситетын, ӧні водзӧ босьтӧ тӧдӧмлун татчӧс жӧ магистратураын.
– Радейта ёртасьны да видлыны выльсӧ. Тайӧ, гашкӧ, и сетӧ позянлун меным сӧвмыны, – юксис мӧвпъяснас томулов шӧринӧн веськӧдлысь. – Со ветлі фестиваль вылӧ – и окота выль форматъяс видлыны аслам уджын.
Суйӧр сайысь ёртъяс
Фестивальса оргкомитет Россияса регионъясысь воысьяслы сетӧма мукӧд странаысь гӧсьтъяс вылын шефство. Коми Республикаса делегация быдторйын отсасьӧма Францияысь да Люксембургысь том йӧзлы.
– Ми накӧд ёна ёртасим, быдлаӧ ветлім, ӧттшӧтш уджалім-гажӧдчим. Унаӧн на пӧвстысь тӧдісны роч кыв, и тайӧ миянлы ёна отсаліс, – висьтасис Таисия. – Фестивальыс петкӧдліс, мый быд мортлы колӧ мир, ёртъяс, бур олӧм, уна позянлун. Татшӧмсяма форматыс меным воис сьӧлӧм вылӧ, ӧд сымындатор позис аддзыны, быдлаӧ пырӧдчыны, унатор кывзыны-сюркнявны пель саяд.
А кыдз амбассадор ме быд лун висьталі аслам соцсетьын фестиваль йылысь, восьті выльторъяс, отсалі пырӧдчысьяслы.
Ме зэв шуда морт, мый веськавлі сэтчӧ, аддзи выль ёртъясӧс, сы мында час коллялі накӧд ӧтув – олім быдса олӧм, козьналім ӧта-мӧдлы паметя козинъяс. Медбӧръя лунӧ вӧлі SHAMANлӧн концерт, кып сьылӧм да президенткӧд аддзысьлӧм. И тайӧ луныс пыр кежлӧ жӧ коляс син водзам
Надежда Пунегова.
Снимокъясыс Таисия Рочевалӧн.