Урпилӧн олӧмас тайӧ вӧлі медводдза тулыс. Дас ӧти вежон вылӧ нин петіс чужӧмсяньыс. Öніӧдз оліс мамыскӧд. А сэсся воис кад овны ӧтнаслы. Мамыс, дерт, позсьыс эз вӧтлы. Но налӧн рӧдлы вирас нин пырӧма, мый дас сайӧ вежон олӧм бӧрын кад воӧ эновтны мамсӧ, чой-воксӧ. Быттьӧ эмӧсь кӧ найӧ. Урпи-лӧн тай найӧ вӧліны жӧ. Оз и тӧд, шогсис эз мамыс налӧн мунӧмысь. Кытчӧкӧ тай чеччалігтыр ачыс воши-а. Гашкӧ, пуяс сайсянь кыйӧдіс на, кыдзи урпияныс мӧдӧдчасны ас олӧмас, мыйджык кутасны вӧчны мамсьыс янсӧдчӧм бӧрын. А урпиян ышмисны да кутісны кытчӧсюрӧ чеччавны. Таӧдз позсьыс петавлісны жӧ ворсыштны да котралыштны. Но мамыс бӧр вӧтлывліс гортас. А ӧні со ас кежсьыныс колис, да ставныс рузі-пельӧ разалісны. Урпи веськӧдчис керкаяслань. Некодысь повтӧг чеччаліс. Сійӧ вӧлі зэв нин пельк, но дзик на вежӧртӧм.
Тайӧс казяліс пӧрысь рака. И мӧвпыштіс: оз кӧ кут видзӧдны урпи бӧрся, вермас лоны ыджыд лёктор. Рака вель нин дыр оліс да эз нин ӧтчыд отсав татшӧм йӧюкъясыслы, кодъяс ас олӧмас петігӧн дзик вӧйӧсь.
Урпи пусянь пуӧ чеччалігтыр воис дзик сикт дорӧдзыс. Рака лэбигтыр вӧтчис сы бӧрся. И ылісянь казяліс каньӧс, коді куйліс кильчӧ вылын. Сійӧ вуграліс, но кадысь кадӧ восьтлывліс веськыд син пӧвсӧ да видзӧдліс, мый вӧчсьӧ сы гӧгӧрын. И казяліс эз лэбалысь ракаӧс, а пожӧм вылысь урпиӧс. Кань быттьӧ зэв дышпырысь сувтіс да веськӧдчис пожӧмлань.
«Со кутшӧм пашкыр бӧжа, – тыдалӧ, мӧвпыштіс урпи. – Дзик менам мамлӧн кодь».
И кутіс пу йывсяньыс лэччыны увланьӧ. Дыр нин эз ворслы ма-мыскӧд да, телепит вӧлі дурыштны. Гашкӧ, пожӧмлань кыссьӧмӧнмоз локтысьыс нюлыштас сійӧс, кыдзи вӧчліс мамыс. Со нин кань пусяньыс дзик матын. Урпи повтӧг лэччӧ вочаавны локтысьӧс. Тайӧ эз во сьӧлӧм вылас ракалы. Сійӧ лёкысь кравӧстіс да уськӧдчис пожӧмлань. Кань сыысь эз повзьы. Выліті лэбалігтырйи ракаыс кравзіс да. А урпи повзис, кирснитіс-кайис пу йывланьӧ. Кань лӧгпырысь видзӧдліс рака вылӧ да босьтчис кавшасьны вывлань. Урпи казяліс тайӧс да лэччыштіс воча.
– Мый кар-р-ран?! – горӧдіс сылы рака да борднас лёкысь шлапкӧдчигтыр матыстчис пожӧмлань. Быттьӧ кӧсйис пырны шӧракостас. Öні нин и кань, и урпи повзисны сыысь. Мый босьтан татшӧмыдлысь? Со кыдзи кравзӧ да. Вермас и синтӧ кокыштны. Кань чеччыштіс му вылӧ, урпи кавшасис пу йылӧдзыс. Рака эз жӧ ылӧ вешйы, пуксис орчча пу вылӧ да босьтчис видзӧдны кань да урпи бӧрся.
Сӧмын на кань выльысь матыстчис пожӧм дорӧ, рака пыр жӧ босьтчис кравзыны. Урпи повзьӧмысла эз жӧ лэччышт вочасӧ.
Коли час джын кымын. Кань некымынысь на босьтчыліс пу вылӧ кавшасьны, но ракаыд бара уськӧдчыліс борднас мый вынсьыс шлапкӧдчигтыр. И лёкысь кравзіс. Урпилы, тыдалӧ, дышӧдіс виччысьны, кор ӧвсяс тайӧ лэбачыс, медым ворсыштны му вывсянь сы вылӧ дзоргысь пемöскӧд, да чеччыштіс мӧд пу вылӧ. Сэсся пыр водзӧ и водзӧ муніс. Кӧнкӧ, корсьны ас кодьяссӧ, медым пӧттӧдз дурны. Рака эськӧ босьтчыліс кыйӧдчыны сы бӧрся, но кор казяліс, мый урпи дурӧ нин ас кодьыскӧд, пыр жӧ и лэбис мӧдлаӧ. Талун вылӧ сылӧн могыс уна на.
Алексей Попов.
Серпасалiс Кристина Левенко.