Оліс ӧти сиктын ӧти зонка. Збой этш да гажа олансер вӧснаыс шуисны сійӧс Би киньӧн. Сиктсаяс радейтісны зонкаӧс быд пӧрйӧ отсӧг вылӧ локтӧмысь.
Ӧтчыд гортас мунігӧн Би кинь паныдаліс орччӧн олысь бабӧс. Пӧрысь мортлӧн чужӧм вылас тыдаліс майшасьӧм. Зонка некор на эз аддзыв бабушӧс татшӧм жугыльӧн. Сійӧ пырысь-пыр котӧртіс пӧрысь мортлань да юаліс, мый лоис. Бабуш та вылӧ и шуӧ:
– Висьмис менам Машук нучкаӧй, а лекарствоӧй бырис. Выльысь кӧсъя вӧчны, да он на и босьт! Лекарство вылас колӧ дивӧ-дзоридз. Сӧмын ӧтилаын сійӧ быдмӧ. Тыяс да гуранъяс пыр медсьӧд вӧрас колӧ мунны. Туйыс зэв кузь да сьӧкыд. Ачым ог нин во сэтчӧдз, кокӧй слабмис. И отсӧг вылӧ корны некодӧс. Быд здук колана. Тайӧ лекарствотӧгыс Машуклы пыр лёкджык и лёкджык.
– Эн шогсьы, – висьталӧ Би кинь. – Ме тэныд отсала! Ветла и вая! Тайӧ меным тшаква!
Бабуш долыдмис да бурӧн-ладӧн висьтасис, кыдзи аддзыны дзоридзсӧ.
Кузь туйӧ пасьтасис-чукӧртчис Би кинь, босьтіс нопторйӧ нянь да ва, мӧдіс. Ӧти лун муніс, мӧд лун муніс, коймӧдӧс. Уна мичаин да шензьӧ-данатор аддзыліс. Муніс зонка лудъясті да вӧръясӧд. Паныдаліс лэбалысь тигрӧс да носорогӧс. Муса пемӧсъяс кутасьӧмысь буретш ворсісны. Ичӧтик юяс да гырысь тыяс вуджигӧн тӧдмасис кыз рушкуа васакӧд да дзользян гӧлӧса русалкакӧд. Джуджыд гӧра йылӧ кайигӧн кывзіс сылысь гулыд мургӧмсӧ. «Ӧв-вӧ, ӧв-вӧ», – сьылісны из юръясыс. А пӧрысь кырныш мыш вылас пуксьӧдӧмӧн вуджӧдіс Би киньӧс вӧйласян нюр пӧлӧн.
Би кинь ӧзйис бабушлы да Машуклы отсавны кӧсйӧмӧн, та вӧсна быд
выль тӧдса отсаліс Би киньлы сьӧкыд туйын. Коркӧ-некоркӧ воӧдчис зонкаыд медсьӧд вӧрӧдз. Дыр шӧйтіс Би киньным пуяс костӧд, корсис дивӧ-дзоридз. Вынтӧммис дзикӧдз. Шондісӧ син улысь воштіс. Пемыдыс повзьӧдіс. Зонка шогӧ усис. Збыль ӧмӧй оз артмы отсавны нывкалы? Сьӧд вӧрсьыс оз и сяммы петны, вошас да бырас.
Друг сё вося джуджыд коз сайын кыліс шуракылӧм да эрзӧм. Муртса-муртса, и скӧр кӧин кынӧмпӧт корсяс сы пайысь. Аддзӧ зонка, ад горш звер нювсьӧмӧн да дульва резӧмӧн сылань нин локтӧ. Би кинь йӧжгыльтчис да дзебсис бадь сайӧ, ассьыс помсӧ виччысьӧ. Друг ыджыд руд ош кыськӧ петіс да уськӧдчис кӧин вылӧ. Лапанас вартіс, да ёсь пиняыд ылӧдз тутіс-лэбис. Дойысла да забеднӧысла кӧин омлявны мӧдіс, а сэсся и пышйис-усйысис на дінысь.
Ошсӧ шуисны Миша. Гӧна пель чуймис! Татшӧм ичӧт зонка татшӧм смел! Ӧтнасӧн сьӧд вӧрӧ воис. Ош висьтасис: «Дивӧ-дзоридз прӧста сідз оз сюр, йӧз синмысь пыдӧ дзебӧма». А кор тӧдмаліс, кодлы да мыйла колӧ отсӧгыс, ачыс и нуӧдіс дзоридзӧдзыс.
Ылысянь нин Би кинь аддзис медсьӧд вӧрыслысь кельыда югзьӧмсӧ. Матыстчис да аддзӧ: вӧрса діторйын быдмӧны мичасьыс-мича, ярсьыс-яр дивӧ-дзоридзьяс. Зонка нюммуніс, копыртчис ӧти дзоридзлань, нетшыштіс, дзебис питшӧгас да пырысь-пыр мӧдӧдчис бӧр туйӧ.
Миша кӧсйысис нуӧдны Би киньӧс гортӧдзыс. Мунігчӧж варгисны-сёрни-тісны кык выль ёрт. Весиг торйӧдчыны эз кӧсйыны. Миша овмӧдчис Би кинькӧд орчча керкаас.
Бабуш ёна и радліс, кор аддзис Би кинь киысь дивӧ-дзоридз. Сы здукас и босьтчис вӧчны нучкаыслы лекарство. Миша ош сыкості гӧсти-тӧдіс куимнан выль тӧдсасӧ юмов маӧн да чӧскыд ӧмидзӧн.
Машук бурдіс да, ёртасьӧмныс ёнмис. Нывка, Би кинь да Миша пыр вӧліны ӧтлаынӧсь: уджын и ворсӧмын. И отса-сисны, дерт, ӧта-мӧдлы да сиктса став олысьлы.
Комиӧдіс Алёна Старцева.
Серпасаліс Софья Елина.