С. Я. Маршак нима челядьлы национальнӧй библиотекаӧ волісны Коми-перым кытшысь гӧ сьтъяс – туялысь, Россияса гыжысь котырӧ пырысь Любовь Афонасьевна Косова да дизайнер-верстайтчысь, журналист Анастасия Михайловна Хорошева.
Коми-перымсаяс абу сӧмын миян суседъяс, но и матысса рӧдвуж, миян кывъясным зэв ӧткодьӧсь. Тайӧс позис казявны, кор Арианна нима нывкалысь Венсул кань йылысь гижӧдсӧ аддзысьлӧм дырйи вуджӧдісны коми-перым да коми-зырана кывъяс вылӧ. Ставӧн тӧдчӧдісны, мый уна кыв ӧткодь.
Гӧсьтъяскӧд сёрни зэв бура артмис. Аддзысьлӧм дырйи унатор тӧдмалім Коми-Перым кытш, челядьлы да том йӧзлы литература журналъяс, а сідз жӧ Любовь Старцевалӧн (Любовь Косовалӧн псевдонимыс) олӧм да творчество йылысь.
Любовь Афонасьевна висьталіс, мый заводитіс гижны школаас на, а сылӧн сочинениеясыс вуджлісны классысь классӧ – сідзкӧ, сэки нин сылысь творчествоыс радейтісны. Любовь Афонасьевнаӧс ёнджыка быдтӧма бабыс. Ичӧтдырйиыс сюся кывзылӧма сылысь висьтъяссӧ, но шог пӧ, мый эг гиж сылысь висьтасьӧмсӧ да мукӧддырйи эг сюся кывзы.
Интереснӧ, Любовь Косова абу сразу бӧрйӧма ӧнія уджсикассӧ. Медводз уджалӧма стрӧитчан организациян да электроприборнӧй заводын. 1987 воын вуджӧма коми-перым небӧг лэдзанінӧ, лоӧма художествоа литература редакторӧн. 1999 восянь уджалӧма общественнӧй наукаяслӧн коми-перым юкӧнын.
Медшӧр гижӧма верстьӧлы кывбуръяс, а ӧні уджалӧ челядьлы гижӧдъяс вылын. 2006 воын авторлӧн петӧма челядьлы «Чӧскыт козин» висьтъяса небӧг. Тайӧ небӧгсӧ автор козьналіс и миян библиотекалы, ӧні позяс тӧдмасьны тайӧ небӧгыскӧд «Ошпи» залын.
Аддзысьлӧм кежлӧ выставка дасьтігӧн библиотекаса уджалысьяс казялісны «Коми-пермяцкая детская литература» 2008-ӧд воын йӧзӧдӧм библиография указатель. Авторлысь творчество серти небӧгъяссӧ корсим буретш тайӧ индӧд отсӧгӧн. Уналы лои тӧдчана коми да коми-перым кывъяс вылын «Уна рӧма сикӧтш» кывбуркуд, кытчӧ пырӧма Любовь Старцевалӧн Пера да Зарань йылысь гижӧдыс.
Кывбурсӧ лыддьӧм бӧрын ныв-зонмӧс аслыспӧлӧса ворсӧдім: зонкаяс лоины Пераӧн, петкӧдлісны ассьыныс вын бедь кыскӧмын, а нывкаяс – Зараньӧн, тӧдмавлісны коми нӧдкывъяс.
Небӧгъяслӧн дизайнер-верстайтысь, журналист Анастасия Михайловна Хорошева челядьлы зэв жӧ кажитчис. Сійӧ петкӧдліс Коми-перым кытшса периодика петасъяс, а сідзжӧ тӧдмӧдіс том авторъяслӧн творчествоӧн.
С.Я. Маршак нима библиотекалӧн директор Марина Юрьевна Круглова аттьӧаліс гӧсьтъясӧс кыпыд аддзысьлӧмысь да корис Коми-Перым кытшысь гижысь челядьӧс пырӧдчыны регионъяскостса ичӧт поэтическӧй марафонӧ, библиотекаыс сійӧс котыртӧ быд во поэзия лунӧ – март 21 лунӧ.
Алена НЕСТЕРОВА, библиотекаса юкӧнӧн веськӧдлысь.
«Йӧлӧга» газетысь, кодӧс позьӧ судзӧдны пошта пыр, позьӧ ньӧбны «Ордым» лавкаын. Медым лыддьыны электроннӧй версия, личкӧй татчӧ. Эмӧсь кӧ юалӧмӧяс, гижӧй komi-kerka@ya.ru.