Гожӧмнас Лена олӧ пӧчыс ордын, бать-мамыс ыстісны сійӧс ыджыд карысь сиктӧ да. Лунтыръясӧн нывка бабыскӧд ӧтлаын ноксьӧ град йӧрын: то ёг весалӧ, то ӧгурцы киськалӧ. А медся ёна сійӧ радейтӧ вотны тусь – медводз клубника чукӧртас, а сёрӧнджык, кисьмасны да, сэтӧр, ӧмидз, крыжовник, ирга. Ӧктӧ вомас и дозйӧ. Радейтӧ нывка и чипанъясӧс вердны, а медъёна – чукӧртны да пырт-ны гортӧ чипан кольксӧ.
Лунтыр Лена уджалӧ да ворсӧ, но корсюрӧ нывкаӧс босьтлӧ и гажтӧм, мам-батьыс тӧд вылас усьлӧны да. Сэк сійӧ ылӧдлӧ асьсӧ чӧскыдторйӧн. Корӧ бабыслысь сьӧм да мунӧ лавкаӧ. И бабыс сійӧс повтӧг лэдзӧ – лавкаыс ӧд ныр уланыс и эм, керкакӧд орччӧн. Пырас Лена, мыччас вузасьысьлы сьӧм да чуньнас индалӧ, мый сылы колӧ. Коркӧ петушокӧс корас, коркӧ – чупа-чупс, а тшӧкыдджыка босьтлывлӧ кӧлач. Радейтӧ не сымда кӧлачсӧ, мыйта помадкасӧ, кодӧс еджыд кеньӧн моз кисьтӧма кӧлач вылас.
Локтӧ Лена лавкаысь, сдачасӧ, эм кӧ, пӧчыслы сетӧ, а чӧскыдторсӧ оз и петкӧдлы – сійӧ сылӧн абу нин.
Бабыс ас кежас чуймалӧ: «Мыйла гӧснечыс нывкалы недыр кежлӧ тырмӧ? Кор удитӧ сёйны? Лавкаӧдз ӧд некымын воськов и эм». Чуймалӧ кӧть, но оз юав. Сёйис кӧ и сёйис, мед сӧмын оз гажтӧмтчы.
Мукӧддырйиыс, овлӧ, и дырджык Лена оз лок. Сэк бабыс петӧ да дзиръя дорсянь видзӧдӧ. Казялӧ: нучкаыс бара нин Чёпкаӧс паныдалӧма да сыкӧд ворсӧ. Чёпка нима пон олӧ баб керкаыслы паныд. Збыльвылас шуӧны сійӧс Стёпкаӧн, но нывкалӧн артмӧ Чёпка. А мӧдыслы и сідз лӧсьыд, мед сӧмын вердасны да ворсасны сыкӧд. Видзӧдыштас баб – ставыс бур, да бӧр пырас. Недыр мысти пырас и Лена.
Ӧтчыд нывка пырис ывлаысь да тэрыба пуксис юны чай. Ырскӧ чашкасьыс да шуалӧ:
– Вот эськӧ чайнас кӧ кӧлач вылысь помадкасӧ сёйны.
– Мыйла сӧмын помадкасӧ? – стрӧга юалӧ бабыс.
Сылы оз кажитчы, мый Лена помадкасӧ нюлӧ, а кӧлачсӧ кольӧ.
– А ме сӧмын помадкасӧ радейта, а кӧлачсӧ ог, – ылӧдчытӧг висьтасьӧ Лена.
– А кӧлачсӧ коді сёяс? Кодлы нӧ пиньтуйтӧ колян?
– Чёпкалы. Сійӧ кӧлачсӧ помадкатӧгыс радейтӧ. Ми пыр сідз сёям – ме помадкасӧ, а сійӧ кӧлачсӧ.
Вӧлисти баблӧн синмыс воссис – вот мыйла нывкалӧн чӧсмасянторйыс некор гортӧдз оз волы!
Любовь СТАРЦЕВА (Кудымкар)
Комиӧдіс Алёна Ельцова
«Би кинь» журналысь, кодӧс позьӧ судзӧдны пошта пыр, позьӧ ньӧбны «Ордым» лавкаын. Медым лыддьыны электроннӧй версия, личкӧй татчӧ. Эмӧсь кӧ юалӧмӧяс, гижӧй komi-kerka@ya.ru.