Кӧртын – олӧмыс да лолыс

Ӧні ми олам лыдтӧм-тшӧттӧм быдсикас юӧр пӧвстын: реклама, ысталана выльторъяс, соцсетьын дженьыдик гижӧдъяс. Кад тырмытӧмыс тшӧктӧ овны котӧрӧн. Талун позьӧ велӧдчыны, уджавны, тӧдмасьны выль йӧзкӧд гортысь петавтӧг.  И тшӧкыдджыкасӧ ми аддзысьлам тӧдсаяскӧд ог «ловйӧн», а телепон экран пыр.   А петалам кӧ йӧзӧ, то сӧмын выль снимок вӧчӧм либӧ соцсетьын выль гижӧд дасьтӧм могысь.

Но тайӧ ставыс пасьмунӧ-пазалӧ-вунӧ Кӧрткерӧсӧ мастер-дорччысьяслӧн фестиваль вылӧ веськалігӧн. Изьва кӧ – тайӧ «Луд», а Чилимдін – «Горка», то Кӧрткерӧс – тайӧ кузнечьяс! Фестиваль дырйиыс кадыс кывтӧ-мунӧ мӧд ног. Сійӧ важся мельничаын моз бергӧдлӧ тэнӧ кытшӧн-кы-тшӧн, важсӧ ӧніяыскӧд сорлалӧмӧн. Тані гӧгӧр – ловъя йӧз, кодъяс кӧсйӧны сёрнитны тэкӧд, видзӧдлыны тэныд синмад.

Фестиваль муӧ воигӧн медводз веськалан сикт-грездса подворьеясӧ, кӧні регыдӧн видзӧдавны ставсӧ оз артмы. Тані окота мӧвпавны, окота юасьны, окота сывъявны йӧзсӧ да висьтавны сьӧлӧмсянь аттьӧ татчӧ асланыс да тэнад чужанінлысь история вайӧмысь. Сё воысь важджык гортса эмбурӧ инмӧдчылігӧн, коми сёян-юанӧн тэрмасьтӧг чӧсмасигӧн гӧгӧрвоан, мый некутшӧм италияса пицца ни японияса ролл он ӧткодяв асланым вӧлӧгакӧд.

Кытысь татшӧм сьӧлӧмкылӧмыс? Вочакывйыс ясыд: миян пытшкын ставыс пӧль-пӧчсянь вуджӧмтор! Сӧмын тай ми тшӧкыда ог казялӧй тайӧ йитӧдсӧ…

Подворье – тайӧ важ да ӧнія костын аслыспӧлӧс пос. Традиция видзӧмӧн сикт-грездса войтыр оз кольччыны и талунъясьыс. Фестиваль дырйи унаӧн котыртлісны томуловлы квест, петкӧдлісны-вӧзйисны экология боксянь сӧстӧм паськӧм да эмбур.

Быд сикт-грездлӧн аслас история, кодлӧн подулас эм тшӧтш легенда-предание. И тайӧ – миян озырлун, мыйӧн позьӧ да колӧ ошйысьны!

Фестиваль вылӧ волысьяс оз нин ӧти во вензьыны сикт нимлы подув пуктысь Кӧрт Айка кузя. Тайӧ мортыс збыльысь ветлӧма миян му вывті, грабитӧма да виалӧма йӧзӧс, дорӧма кӧртысь эмбур да ӧружие, мыйӧн ёна повзьӧдлӧма татчӧс войты-рӧс, ӧд сыӧдз найӧ кӧрт йыв-сьыс нинӧм абу тӧдлӧмаӧсь. Медбӧрын скӧр тун пӧгибнитӧма вежа Перымса Степанкӧд тышын.

Сэк жӧ некымын во сайын Кӧрт Айка йылысь чужис выль легенда-мойд. Сы серти сійӧ – кыськӧ воӧм кузнеч, коді велӧдӧма татчӧс войтырӧс вӧдитчыны кӧртӧн. Та кузя Россияса кузнечьяслӧн союзӧ да Рытыв-Войвывса дорччысьяслӧн гильдияӧ пырысь Александр Борисович Сушников шуӧ, мый Кӧрт Айка збыльысь вермис лоны повзьӧдлана скӧрӧн. Ӧд дорччан уджыс зэв сьӧкыд. Кӧртӧ кузнеч пуктӧ ассьыс став шогсӧ да дойсӧ, май-шӧдлана мӧвпъяссӧ. Кӧртыс пӧ – лов бурдӧдысь. А рӧзбойниклысь ловсӧ тшӧтш колӧ мыйӧнкӧ бурдӧдны…

Торъя сёрни фестиваль вылӧ воӧм кузнечьяс йылысь. Тайӧ йӧзыс шензьӧдӧны асланыс пыді мӧвпаланногнас, олӧмыслысь уна пӧ-лӧс петкӧдчӧмсӧ донъяланног-нас. Мастеръяслы дорччан уджыс – налӧн лолыс да олӧ-мыс. Удж да нажӧтка кывъясыс татчӧ оз лӧсявны. Кузнечьяс ӧти вомысь шуӧны, мый ӧнія кадӧ челядьӧс колӧ велӧдны уджавны ки помысь. Сэк жӧ странаын сёйысь, пуысь, кӧртысь вӧчасьны дон босьттӧг велӧдчыны позянлуныс абу. Зэв жаль…

Таво Кӧрткерӧс район котыртӧмсянь тырӧ 80 во. Зэв нимкодь вӧлі видзӧдавны важся альбомъясысь снимокъяс, восьтывны выльӧн йӧзӧдӧм буклет-небӧг, пырӧд-чывны историялы сиӧм викторинаӧ. Гажлысь кӧрсӧ позис кывны и концерт пыр, кӧні петкӧдчисны тшӧтш миян районса томулов.

Ӧдйӧджык нин мед воас локтан воыс! Мед бара на тӧдмасьны выль йӧзкӧд, аддзысьлыны важ тӧдсаяскӧд да шыдӧса шаньгаӧн туруна тшай юигмоз юксьыны накӧд вобыдся юӧръясӧн!

Кӧрткерӧсса М.Н.Лебедев нима шӧр библиотека бердын «Медиаволонтёръяслӧн школаын» велӧдчысьяс.

«Коми му» газетысь, кодӧс позьӧ судзӧдны пошта пыр, позьӧ ньӧбны «Ордым» лавкаын. Медым лыддьыны электроннӧй версия, личкӧй татчӧ. Эмӧсь кӧ юалӧмӧяс, гижӧй komi-kerka@ya.ru.

Кӧртын – олӧмыс да лолыс

«Коми му» газетысь, кодӧс позьӧ судзӧдны пошта пыр, позьӧ ньӧбны «Ордым» лавкаын. Медым лыддьыны электроннӧй версия, личкӧй татчӧ. Эмӧсь кӧ юалӧмъяс, гижӧй komi-kerka@ya.ru.

Пролистать наверх