Комиын водзӧ кыпӧдӧны да дзоньталӧны школаяс, а сідзжӧ мукӧд велӧдчан учреждение.
Та йылысь сёрни вӧлі Федеральнӧй Собрание дорӧ Россияса президентлысь шыӧдчӧмсӧ олӧмӧ пӧртӧм кузя Комиын «гӧгрӧс пызан» сайын республикаса юралысь Владимир Уйбалӧн веськӧдлӧм улын правительствоысь чина йӧзлӧн да министерство-ведомствоын уджалысьяслӧн чукӧртчылӧм дырйи.
Казьтыштам, регионын та могысь збыльмӧдны шуӧма «Образование» нацпроект да Коми Республикаса «Развитие образования» государственнӧй программа. Такӧд йитӧдын унатор нин вӧчӧма. Но сэк жӧ велӧдан юкӧнын медшӧр нырвизьяссӧ тӧд вылӧ босьтӧмӧн ыджыд удж колӧ бергӧдны 2030 воӧдз.
Талун республикаын кыпалӧ куим выль школа: Сыктывкарын, Сыктывдінса Выльгортын да Изьва сиктын, а сідзжӧ кык детсад: Изьва районса Бакур грездын да Печора районса Озёрнӧй посёлокын. Нёль школа да кык детсад кузя дасьтӧны колана кабала-документъяс, квайт велӧдчанін кузя – проектъяс.
–Ми водзӧ стрӧитам школаяс, медым челядьлӧн вӧлі позянлун велӧдчыны шоныд да югыд классъясын ӧти сменаӧн, медым выль микрорайонъясын быдлаын вӧлі татшӧм учреждениеыс, – висьталіс регионын велӧдӧм да наука кузя министр Наталья Якимова.
Артыштны кӧ 2014-ӧдсянь 2023 воӧдз, тайӧ каднас Комиын восьтӧма 51 школа да детсад. Кыдзи пасйис Наталья Якимова, республика сідзжӧ пырӧдчӧ детсадъяс, техникумъяс да колледжъяс капитальнӧя дзоньталан программаӧ.
–Миян регионын талун уджалӧ 264 детсад. Найӧ меститчӧны 300 сайӧ стрӧйбаын, и на пиысь сёысь унджыкас колӧ вӧчны капремонт. Ми кутам водзӧ зільны, мед миян челядьлӧн вӧлі став позянлуныс быдмыны-сӧвмыны да босьтны бур тӧдӧмлун ӧнія кадся выль детсад-школаясын, – тӧдчӧдіс велӧдӧм да наука кузя министр.
<> Гижӧдъяссӧ дасьтісны Александра Артеева.
Снимокыс ӧтуввезйысь.