Менӧ шуӧны Ксения Пиманова. Мукӧдысь нинӧмӧн ог торъяв, прӧстӧй сиктса ныв. Чайта, тадзи и колӧ. Мыйла лоны мӧд пӧлӧсӧн?
Ола Скӧрӧдумын, а ичӧт чужанінӧй – радейтана Пузла грезд. Велӧдча Помӧсдінса школаын 9 классын. Ӧдйӧ тай челядьдырӧй колис.
Неважӧн мусмисны небӧгъяс. Медъёна радейта лыддьыны детектив да фэнтези. Ичӧт кадӧй вӧлі сьӧкыд, но некор вылӧ вунӧдлытӧм.
Медводдза нёль классын велӧдчигӧн радейті спорт. Ветлі лызьӧн, теннисӧн ворсі и весиг рытъяснас баскетбол вылӧ удитлі. Кӧсйи лоны бур спортсменӧн, но висьлӧслунысь лысьӧм песӧмысь ковмис ӧвсьыны.
Казьтыла, рытъяснас век окотиті мӧвпыштны мича гижӧд. Забеднӧ вӧлі, кор эз артмы. А кор медводдзаысь перӧ улысь петіс лӧсьыдкодь кывбур, сьӧлӧм вылын лои долыд. Окотиті и водзӧ гижны.
Ыста «Би кинь» лыддьысьяслы ассьым кык гижӧд. Аттьӧ йӧзӧдӧмысь да бура донъялӧмысь.
Пелыся ар
Таво пелысь вывті уна,
Лэбач чӧсмасьӧ на пыр.
Пелысь вотны вӧрӧ муна,
Медым тӧвнас тырмис дыр.
Ош нин пырӧ аслас гуас…
Певсӧ нёнялас вель дыр.
Сӧмын кӧин оз тӧр гуас,
Кӧдзыдысла кынмӧ ныр.
Верда
Бара со увтыштіс пон.
Шуӧ мен: «Вердыштан он?».
Сёянсӧ петкӧдны колӧ.
Ывлаыс кӧдзыд тай. Пола.
Мыйлакӧ дышӧдча, рода.
Бурджык ме крӧватьӧ вода.
Асывнас сёянсӧ сета,
Чечча кор, пасьтася, пета…
Сӧмын тай понйыд мен – жаль.
Пасьтася, кватита шаль.
Мыйла ме кӧдзыдсьыс рода?
Верда – и сэк сӧмын вода!
Серпасалісны Сыктывкарса 81-ӧд номера прогимназияӧ котралысьяс
Полина Николаевна Старцева веськӧдлӧм улын.
Дасьтіс Алёна Нестерова.