Регионса кар-районын водзӧ кыпӧдӧны шогмытӧм патераясын олысьяслы выль керкаяс.
Та йылысь республикаса правительствоӧн первой веськӧдлысь Эльмира Ахмеевалӧн юрнуӧдӧм улын быд вежонся совещание дырйи юӧртіс регионса правительствоӧн веськӧдлысьӧс вежысь – стрӧитчӧм да ЖКХ кузя министр Андрей Чибисов.
Сылӧн висьталӧм серти, Мылдін районын шогмытӧм оланінысь йӧзӧс вуджӧдӧм могысь кы-пӧдӧны кык керка. Помавны найӧс шуӧма таво августын.
Сыктывдінын Пичипашня микрорайонын татшӧм жӧ выль керка пӧшти дась нин. Майын сеталасны сэтчӧ вуджысьяслы патера ключьяс.
Тайӧ жӧ районас Паджга сиктын сідзжӧ лэптӧны выль олан керка. Дась джынвыйӧ на. Эштӧдны шуӧма таво декабрын.
Койгортын кыпӧдан керкаын бергӧдӧма коланасьыс 60 прӧчент уджсӧ. Ставсӧ, мый урчитӧма план серти, вӧчӧны ас кадӧ.
Кӧрткерӧс районын шогмытӧм оланінысь йӧзӧс вуджӧдны выль керкаяс кыпӧдӧны Пӧдтыбокын, Мордінын, Визябӧжын, Шойнатыын, Позтыкерӧсын да Калятыын.
Пӧшти дась нин Изьва районса Щельяюр посёлокын «Оланін да карса гӧгӧртас» нацпроект серти стрӧитан выль керка.
Тыр ӧдӧн зільӧны стрӧитчысьяс и Емдін районса Микуньын, Айкатылаын да Студенеч посёлокын.
Ухтаын сеталӧны нин 2017 вося январь 1 лунӧдз шогмытӧмӧн шуӧм керкаясын олысьяслы выль патераясысь ключьяс.
Киссянвыйын дас вит патераысь 43 морт вуджӧма бур оланінӧ.
Казьтыштам, киссянвыйын патераясысь йӧзлы выль керкаяссӧ стрӧитӧны социальнӧй тӧдчанлуна «Оланін да карса гӧгӧртас» нацпроект серти.
<> Гижӧдъяссӧ дасьтіс Александра Артеева.
Снимокъясыс ӧтуввезйысь.