«Дзоньвидзалун» нацпроект серти водзӧ кыпалӧны республикаса сикт-посёлокын выль ФАП-яс да бурдӧдчан амбулаторияяс.
Выль медучреждениеяс восьтӧма Удора, Сыктыв, Кулӧмдін, Кӧрткерӧс, Княжпогост, Изьва, Сыктывдін да Мылдін районъясын, а сідзжӧ Сыктывкар бердса Вылыс Максаковка посёлокын.
Регионын олысьяслысь дзоньвидзалун видзан министерствоӧн веськӧдлысь Сергей Булатовлӧн висьталӧм серти, кольӧм во ФАП-яссӧ да амбулаторияяссӧ вӧлі кыпӧдӧма модульясысь. Сэні ставыс нин дась, мед могмӧдны висьысь-нёрпалысьӧс колана медуслугаясӧн. Матысса лунъясӧ нин уджавны босьтчӧм могысь лицензия сетасны Мылдін районса Мылва посёлокын выль ФАП-лы.
Таво Комиын шуӧма кыпӧдны модульясысь дас куим ФАП. Такӧд йитӧдын уджыс мунӧ тыр ӧдӧн. Татшӧм медучреждениеясыс дасьӧсь нин да, лицензия босьтны лӧсьӧдчӧны Княжпогост районса Сереговын да Сыктывдінса Сёськаын.
Пытшкӧс уджъяс вӧчӧны Вуктыл районса Льӧмты, Мылдін районса Якша да Митрӧпандікост посёлокъясын, Луздорса Мутница сиктын да Черёмуховка грездын, а сідзжӧ Усинск районса Лыжавомын модуля ФАП-ясын.
Босьтчӧмаӧсь бурдӧдчанінъяс стрӧитны Мылдін районса Знаменка да Приуральскӧй, а сідзжӧ Усинск районса Парма посёлокъясын. Матысса кадӧ заводитасны кыпӧдны выль ФАП и Инта районса Абезьын.
<> Гижӧдсӧ дасьтіс Александра Артеева.
Снимокъясыс ӧтуввезйысь.