Сыктывкарса «Лузалес-Аренаын» нуӧдісны баскетбол кузя Россияса XII гожся спартакиада.
Паркет вылын вермасисны Комиысь, Вӧлӧгда да Мурманск обласьтъясысь командаяс.
Миян республикаса сборнӧйын вӧліны Сыктывкар, Ухта да Сосногорск каръясысь баскетболистъяс.
–Став сертиыс медся ёсь вермасьӧм лоас миян да Вӧлӧгда обласьтса командаяс костын. Но колӧ видзчысьны и Мурманскса баскетболистъясысь. Найӧ эз на петкӧдчывны Россияса первенствоын, та вӧсна некод оз тӧд, мый насянь виччысьны, – пасйисны «Юность» спортшколаысь специалистъяс.
Сідзи и артмис. Медводзӧ петіс Вӧлӧгда обласьтса команда. Коми шедӧдіс эзысь, а бронза вичмис Мурманск обласьтса баскетболистъяслы.
* * *
Юркарын нуӧдісны и баскетбол кузя Николай Бережнойлы сиӧм Коми Республикаса первенство.
Вермасис Сыктывкар, Ухта да Инта каръясысь, а сідзжӧ Княжпогост, Емдін, Сыктывдін да Кулӧмдін районъясысь сизим команда.
Зарни шедӧдісны ухтаса, эзысь да бронза босьтісны юркарса да княжпогостса. Нёльӧдӧн лоис Интаса команда, витӧдӧн – Кулӧмдінса, квайтӧдӧн – Сыктывдінса, а сизимӧдӧн – Емдінса.
Медбур ворсысьясӧс чукӧртасны сборнӧйӧ, коді февраль 26 лунӧ петкӧдчас Череповецын Россияса спартакиадаын. Тайӧ вермасьӧмсӧ бара жӧ нуӧдісны «Демография» нацпроектлӧн «Спорт – норма жизни» уджтас серти.
<> Гижӧдсӧ дасьтіс Николай Размыслов.
Снимокъясыс ӧтуввезйысь.