Комын во школаын велӧдi коми кыв да литература. Бура тӧда гижысьяслысь олан туйсӧ, налысь гижӧдъяссӧ. Волывлiм Виктор Савинлӧн чужанiнӧ, Нёбдiнӧ, Агния Сухановалӧн рӧдинаӧ – Вомынӧ, Михаил Лебедевлӧн оланiнӧ – Кӧрткерӧсӧ, таысь кындзи нӧшта на и Удораса Косланӧ – Юрий Васютов кӧнi овлiс.
Та пӧрйӧ окотитiм ветлыны Сыктыв районса Куратов (Кебра) сиктӧ, кӧнi чужис да быдмис коми литературалы подув пуктысь Иван Алексеевич Куратов. Биографиясӧ да творчествосӧ ве-лӧдiгӧн век вӧлi мӧвпала, кутшӧм сьӧкыда овсис сэки йӧзыслы, челядьыслы. Но бур мам окотитiс, мед пияныс вӧлiны грамотаа йӧзӧн, да ачыс нуис Иван Куратовӧс велӧдчыны. Сэки тӧдӧмлун босьтны ичӧтик сиктъясысь мунлiсны ылі, бокиса муясын приходскӧй школаясӧ.
Июль 7 лунӧ – Иван лунӧ – Кебраӧ миянӧс вайӧдіс Иван Куратовлы сиӧм гаж. Йӧзыс чукӧрмис уна. Воисны юрсиктсаяс, юркарсаяс, весиг ми Одыб сиктсянь ветлiм, туйным шогмытӧм, но кыдзкӧ тай петiм жӧ.
Аслым меным вӧлi окота аддзывны тӧдсаясӧс. И збыль, паныдасьлiм Павел Лимеровкӧд, кодкӧд Сыктывкарса университетын тшӧтш велӧдчылiм; Павел Симпелевкӧд, коді сетӧ тӧдӧмлун миян школаса челядьлы Гожся университетын. А медся нимкодьыс – аддзысьлім асланым радейтана велӧдысь Раиса Ивановна Вагнеркӧд. Сiйӧ синмыслы абу эскӧма «Нившера» гижӧдсӧ аддзигӧн. Ме пӧ шемӧсми, кыдзи та ылна-ӧдзыс да абутӧм туйнас воӧдчӧмаӧсь одыбсаясыс. А сӧ-мын зэв ёна окотитысьяс, мися, писькӧдчӧны татшӧминад, вочавидзи. Ёна и варовитiм Раиса Ивановнакӧд. Кор ветлам вӧлi юркарӧ курсъяс вылӧ, сэки сiйӧ искусствояс гимназияын нин уджа-лiс, пыр кывзылiм Раиса Ивановналысь интереснӧй урокъяссӧ. На серти вӧлi аддзам-гӧгӧрвоам, кыдзи колӧ видлавны шӧр геройсӧ гижӧдъясысь. Аттьӧ ставсьыс тіянлы, Раиса Ивановна! Ёна на велӧдӧй ичӧт войтырсӧ, югдӧдӧй налысь юр вежӧрсӧ.
Уна сьылан котыр петавлiс сцена вылӧ, уна сьыланкыв юргис тайӧ лунӧ Куратовын. Бур вермӧмъяс шедӧдiс куим котыр, ӧти на пиысь – Кӧрткерӧс сиктысь. А кор Гран-присӧ шуисны сетны миян Одыб сиктысь «Сипертас» котырлы, ёна жӧ и кекӧначасим да нимкодясим. Но мичаа жӧ ӧд и сьылӧны енбиа войтыр! Тайӧ котырас ветлӧны тшӧтш ветеранъяслӧн сӧветысь ёртъяс: Зоя Григорьевна Жижева, Лидия Яковлевна Ларукова, Надежда Григорьевна Подорова.
Ывла вылын вӧлi лӧсьӧдӧма вузасян местаяс, окотитысьяс вермисны ньӧбны пӧжас, чӧскыд яй, кӧм-пась, кӧртысь-сёйысь вӧчӧм да дӧраысь кыӧмтор, сюмӧдысь дозмук. Лидия Михайловна да Ольга Модестовна Пӧдтыбокса ветеран ёртъяскӧд волic-ны жӧ Кебраӧ. Зэв бур кывъ-яс висьталiсны налӧн уджъяс йылысь. Збыльысь, зэв лӧ-сьыд дозмук да мичмӧдчан сикӧтшъяс тайӧ аньясыслӧн.
Пуксьылiс шондiа да гажа лун. Гаж дырйиыд кадыд кольӧ ӧдйӧ. Челядьӧс ёна вор-сӧдiсны быдсяматорнас. Сьылысьясӧс вердicны, вузасьысьясӧс сiдзжӧ гӧститӧдiсны пӧсь тшай-рокӧн. Эг и казявлӧй, кад воис гортӧ мӧдӧдчыны.
* * *
Сыктыв вожӧ ветлӧм йылысь миян сьӧлӧм-лолын колины сӧмын шоныд казьтылӧмъяс. Аттьӧ гажсӧ котыртысь-нуӧдысьяслы! Водзӧ на казьтылӧй бурӧн Иван Алексеевич Куратовӧс!
Галина Ногтева, Одыб сиктса ветеранъяс сӧветӧн юрнуӧдысь.
Кӧрткерӧс р.
Снимокъясыс «ВКонтактеын» «Сысольский район: вчера, сегодня, завтра» котырлӧн.
«Коми му» газетысь, кодӧс позьӧ судзӧдны пошта пыр, позьӧ ньӧбны «Ордым» лавкаын. Медым лыддьыны электроннӧй версия, личкӧй татчӧ. Эмӧсь кӧ юалӧмӧяс, гижӧй komi-kerka@ya.ru.