Кытчӧ воштыны ковтӧм пластик дозмук, лемень банка, важ газет-журнал, пуксьӧм батарейка? Лӧп-ёг чукӧртанінӧ петкӧдны? Но ӧд быдӧн нин тӧдӧ, мый регыд татшӧм шыбласнас тырам, став вӧр-васӧ пежалам-няй-тӧсьтам. Торйӧн чукӧртам ставсӧ да петкӧдам та улӧ урчитӧм контейнеръясӧ? А кужам-ӧ ми торйӧдны, кутшӧм пластик доз шогмӧ переработайтны? А кутшӧм кабала позьӧ шуны макулатураӧн?
Буретш тайӧ юалӧмъяс вылас стӧча да гӧгӧрвоана вочавидзӧны юркарын олысьяслы да гӧсьтъяслы «Турунвиж субӧта» акцияяс дырйи. Кольӧм субӧтаӧ «Парма» вузасян да шойччан шӧрин дорын татшӧмсӧ котыртлісны коймӧдысь нин. И кыдз петкӧдчис, сэтчӧ пырӧдчысь-волысьыс вочасӧн содӧ.
Кӧть и шливгис-зэрис, урчитӧм кад кежлӧ йӧзыс воалісны «Парма» дорӧ водзвыв чукӧртӧм шыблас тыра сумкаясӧн. Быдса семьяясӧн. Вайӧмторсьыс быдӧнлы вичмис жетон, а сэсся лыд сертиыс — козин: дзоньвидзалун ёнмӧдан шӧринӧ да дона мичмӧдчанторйӧн вузасян лавкаӧ сертификат, дӧра сумка, термокружка да мукӧд коланатор. Ӧти кывйӧн, шыблас помысь аслыныс нимкодьлун шедӧдісны. Нӧшта на и шыблас чукӧртӧм кузя содтӧд тӧдӧмлун нажӧвитісны, Турунбаккӧд да диджейяскӧд сьылісны-йӧктісны-гажӧдчисны, фримаркетысь донтӧм донысь небӧг-чача ньӧбисны, мастер-классӧ пырӧдчисны.
А водзмӧстчӧ «Турунвиж субӧта» нуӧдӧмын «ЭкоТаймКоми» котыр. Та пӧрйӧ 4 часӧн сэтчӧс нырщикъяс босьтісны йӧзыслысь тонна шыблас: 100 килограмм пластик, 60 кг кӧрт, 40 кг батарейка да быдса 800 килограмм кабала. Став тайӧ лӧпсӧ переработайтӧм могысь нуас «КомиЭковтор» компания, а «УхтаЖилФонд» ас тшӧт весьтас ыстас пуксьӧм батарейкаяссӧ Челябинскса заводӧ.
«ЭкоТаймКоми» котырсаяс висьталісны, мый юркарын татшӧм акциясӧ нӧшта ӧтчыд нуӧдасны сентябрын, а матысса лунъясӧ — июль 20 лунӧ — сійӧ шыалас Выльгортса шӧр изэрдын. Сідзкӧ, заптӧй шыбластӧ, сыктывдінсаяс!
* * *
Кыдзи колана ног дасьтыны пластик-кабала да мукӧд шыблас сдайтігкежлӧ, позьӧ тӧдмавны «ВКонтактеын» лист бокын.
Елена Плетцер.
Снимокъясыс «ЭкоТаймКоми» котырлӧн.
«Коми му» газетысь, кодӧс позьӧ судзӧдны пошта пыр, позьӧ ньӧбны «Ордым» лавкаын. Медым лыддьыны электроннӧй версия, личкӧй татчӧ. Эмӧсь кӧ юалӧмӧяс, гижӧй komi-kerka@ya.ru.