«Коми Республикалӧн командаысь» дас медбур «резервист» ветласны стажируйтчыны Сингапурӧ. А куимӧс, медся-медсясӧ, босьтасны чина удж вылӧ правительствоӧ. Та йылысь юӧртіс регионса юралысьлӧн пресс-служба.
Казьтыштам, «Коми Республикалӧн команда» конкурсыс муніс таво март 6 — май 31 лунъ-ясӧ. Регионса веськӧдлысьлӧн резервӧ веськалӧм могысь шыӧдчис куимсё гӧгӧр морт, кодъяслысь тӧдӧмлун да уджалан сям кындзи донъялісны и водзмӧстчыны да кывкутны дасьлунсӧ, сьӧкыдлун венны кужӧмсӧ, йӧз дорӧ сибыдлунсӧ да с.в.
Конкурслы кывкӧртӧд вӧчӧм бӧрын вермысьяссӧ, сё мортӧс, пыртісны куим во кежлӧ Коми Республикаса веськӧдлысьяслӧн резервӧ. Налы позяс босьтны торъя велӧдчан уджтас серти содтӧд бур тӧдӧмлун, волывлыны власьт тэчаслӧн сӧвещаниеяс да мукӧд чукӧртчылӧм-аддзысьлӧм вылӧ, лӧсьӧдны да сӧвмӧдны сідз шусяна делӧвӧй йитӧдъяс.
«Резервистъяс» пиысь быдӧнлӧн лоас республикаса министръяс, найӧс вежысьяс, муниципалитетъясса администрацияясӧн юрнуӧдысьяс да регионса гырысь предприятиеясысь топ-менеджеръяс пӧвстысь наставник.
Содтӧд пасъям, мый июль 12 лунӧ регионса юралысь Сергей Гапликов индіс «Коми Республикалӧн командаысь» «резервист» Константин Плеховӧс Коми Республикаын экономикаса министрлысь удж вӧчысьӧн.
«Коми му» газетысь, кодӧс позьӧ судзӧдны пошта пыр, позьӧ ньӧбны «Ордым» лавкаын. Медым лыддьыны электроннӧй версия, личкӧй татчӧ. Эмӧсь кӧ юалӧмӧяс, гижӧй komi-kerka@ya.ru.