Республикаса правительстволӧн индӧд серти 2023 воын культураын да искусство юкӧнын зільӧм-водзмӧстчӧмысь Комиысь енбиа комын том специалистӧс шуӧма пасйыны сьӧма премияӧн.
Казьтыштам, творческӧй профессия тӧдчанлунсӧ кыпӧдӧм могысь мӧйму ноябрь 28 – декабрь 4 лунъясӧ республикаын вӧлі нуӧдӧма конкурс, кытчӧ пырӧдчӧм могысь воӧма регионса культура учреждениеяссянь, творческӧй котыръяссянь да торъя йӧзсянь 48 шыӧдчӧм.
Ставсӧ донъялӧм бӧрын конкурсын вермысьясӧн шуӧма литература юкӧнын, изобразительнӧй, декоративно-прикладнӧй, театральнӧй да шылада искусствоын, а сідзжӧ социально-культурнӧй удж вылын зільысь енбиа комын мортӧс. На лыдын том велӧдысьяс, библиотекаръяс, артистъяс, йӧзкостса художественнӧй прӧмыселӧ нырччысьяс, наука учреждениеса да музейса сотрудникъяс. На пиысь быдӧнлы мынтасны комын квайт сюрс шайт.
Казьтыштам, культураын да искусствоын зільысь-водзмӧстчысьясӧс ышӧдны шуӧма «Культура» нацпроект весьтӧ.
<> Гижӧдсӧ дасьтiс Александра Артеева.