Комиын эштӧданвыйынӧсь «Дзоньвидзалун», «Демография» да «Культура» нацпроектъяс весьтӧ кыпӧдан некымын ыджыд стрӧйба.
Регыд лоӧ восьтӧма Чилимдінын больнича, Абъячойын, Мылдінын да Ухтаын спорткомплексъяс, Сыктывдінса Паджга сиктын культура шӧрин, а сідзжӧ Печора районса Кӧджорӧмын кусӧдчан депо.
Та йылысь кольӧм вежонӧ регионса правительствоӧн веськӧдлысьӧс первой вежысь Эльмира Ахмеевалӧн юрнуӧдӧм улын министерство-ведомствоысь чина йӧзлӧн чукӧртчылӧм дырйи висьталіс Комиын стрӧитчӧм да ЖКХ кузя министр Андрей Чибисов.
Кыдзи юӧртлім нин, «Велӧдӧм» нацпроект серти республикаын босьтчӧмаӧсь кыпӧдны кык школа. Ӧтисӧ – Изьваын, артыштӧма 600 велӧдчысь вылӧ. Талун кежлӧ сэні вӧчӧмаӧсь урчитӧмсьыс 38 прӧчент уджсӧ. Зільӧ 59 морт, вӧдитчӧны сизим техникаӧн. Стрӧйбасӧ шуӧма помавны локтан воын тулыснас.
Сыктывкарса Емваль микрорайонын выль школа стрӧитанінын бергӧдӧма колана уджсьыс 68 прӧчентсӧ. Уджалӧ сэні 129 морт, техникаыс дас. Стрӧйбасӧ эштӧдны урчитӧма 2024 воын.
«Дзоньвидзалун» нацпроект серти таво босьтчӧмаӧсь кыпӧдны Сыктыв районса Визин сиктын бурдӧдчан корпус. Ӧні вӧчӧны мӧд судтаса стенъяссӧ, сюйӧмаӧсь кӧрт арматура да бетоналӧмаӧсь подувсӧ пеллетӧн ломтысян котельнӧйлысь, кысянь кутас воны больничаас шоныдыс. Эштӧдасны став уджсӧ локтан воын арнас.
Казьтыштам, странаса став регионас национальнӧй проектъяс збыльмӧдсьӧны Россияса президент Владимир Путинлӧн индӧд серти. Комиын найӧс олӧмӧ пӧртӧм бӧрся видзӧдӧ регионса юралысь Владимир Уйба.
Содтӧд пасъям, мый миян республикаын выль стрӧйбаяс кыпалӧны и регионса да меставывса бюджетъяс весьтӧ. Торйӧн кӧ, Мылдінын стрӧитӧма дзоньвидзалун ёнмӧдан спорткомплекс. Восьтӧм могысь став колана документыс дась нин. Сыктывкарын вуджан висьӧмысь бурдӧдан больнича стрӧитанінын колана уджсьыс вӧчӧмаӧсь 21,5 прӧчентсӧ. Ӧні кыпӧдӧны кӧрта-бетона монолит каркассӧ.
Печора районса Кӧджорӧмын поликлиника улӧ выль стрӧйбаыс дась джынвыйӧ. Уджыс сэн мунӧ тыр ӧдӧн.
Изьва районса Бакур грездын босьтчӧмаӧсь кыпӧдны выль детсад. Комиын социальнӧй тӧдчанлуна нӧшта некымын стрӧйба лэптӧм могысь дасьтӧны на проект-смета кузя документъяс.
<> Гижӧдсӧ дасьтіс Александра Артеева.
Снимокъясыс ӧтуввезйысь.