Мойдысь:
Пуктiс сёркни ӧти пӧль,
Эз вӧв озыр, эз вӧв гӧль.
Сiйӧс киськалiс да быдтіс,
Сэсся сёркни гырысь быдмис.
Пӧль:
Но и сёркни, и, навернӧ,
Воис кадыс тэнӧ керны.
Ӧтнам сёркнисӧ ог перйы,
Колӧ корны. Эй, Лукерья!
Мойдысь:
А Лукерья, пӧрысь пӧч,
Нинӧм сэтшӧмсӧ оз вӧч.
Пӧч:
Локта-локта, тэрмася,
Энлы, энлы, пасьтася.
Мойдысь:
Пӧчыс кутчысьӧ пӧль сайӧ,
Пӧльыс горзӧ.
Пӧль:
Мый нӧ тайӧ?!
Кыкӧн перйыны ог вермӧй.
Горӧд Машӧтӧ, Лукерья.
Пӧч:
Нывка, Машӧ, кӧн нӧ тэ?
Мойдысь:
Машӧ горзӧ.
Машӧ:
Тані ме!
Муна отсасьны пӧч-пӧльлы,
Сёркни колӧ перйыны.
Зэв ыджыда быдмӧма,
Да перйыны оз вермыны.
Мойдысь:
Машӧ кутчысьӧ пӧч сайӧ,
Пӧчыс пӧльсӧ кутыштіс.
Пӧльыс горзӧ.
Пӧль:
Мый нӧ тайӧ?!
Мед неуна кӧть вӧрзьыштіс.
Мойдысь:
Тӧлкыс абу, колӧ отсӧг,
Сёркни пыдын пукалӧ.
Пӧль:
Машӧ, Жучкатӧ вай горӧд!
Прӧстӧ сідз жӧ омлялӧ.
Машӧ:
Ноко, Жучка, ӧдйӧ лок,
Ставӧн перъям гӧгрӧс бок!
Жучка:
Тяв-тяв-тяв,
Муна отсасьны град вылӧ,
Сёркни колӧ перйыны,
Зэв ыджыда быдмӧма,
Да перйыны оз вермыны!
Мойдысь:
Кутчысьӧ Жучка, кутчысьӧ внучка,
Пӧчыс кутчысьӧ пӧль сайӧ,
Сэсся горзӧ.
Пӧль:
Мый нӧ тайӧ?! Нёльӧн мырсям,
Перъям тайӧс.
Ноко, Жучка,
Горӧд каньӧс!
Жучка:
Тяв-тяв-тяв, муса каньӧй,
Лок вай, лок!
Ставӧн перъям гӧгрӧс бок.
Кань:
Няв-няв-няв,
Муна отсасьны град вылӧ,
Сёркни колӧ перйыны.
Зэв ыджыда быдмӧма,
Перйыны оз вермыны.
Мойдысь:
Витӧн сёркни перйӧны,
Перйыны оз вермыны.
Ӧти, кык, куим, нёль,
Киӧ чеччыштіс мозоль.
Мӧд вылас со тшӧтш мозоль.
Пӧль:
Дыр-ӧ танi мырсям ми:
Синмысь петалӧ нин би!
Кынӧм висьӧ, киыд орӧ.
Кысӧ, мун вай шырсӧ горӧд.
Мойдысь:
Каньыс горзӧ.
Кань:
Кӧн тэ, шырпи?!
Мяу-мяу, пыр на мырким.
Мойдысь:
Каньсӧ кывліс ичӧт шыр,
Локтіс сэтчӧ пырысь-пыр.
Шыр:
Но и сёркни! Но и но!
Татшӧм гырысь, как в кино!
Тэнӧ муысь перъям ми,
Кӧть и синмысь петас би.
Мойдысь:
Шырыс кутчысьӧ кань дорӧ.
Кань:
Менсьым бӧжӧс кӧть эн орӧд!
Мойдысь:
Каньыс кутчысьӧ пон дорӧ,
Жучка – Машӧлы бӧждорас.
Нывка пӧчсӧ кыскӧ дай,
Пӧчыс – пӧльсӧ.
Пӧль:
Перйӧй вай!
Мойдысь:
Кватитчисны, кыскыштісны,
Перйисны да гӧгыльтчисны.
Сёркни петіс! Слава Бог!
Ӧдва петiс гӧгрӧс бок!
Сёркни:
Дыр ме муын пукалі,
Шонді водзын шонтыси.
Пӧльӧ менӧ киськаліс,
Зэрыс менӧ мыськаліс.
Сӧмын менӧ оз позь сёйны.
Мойдысь:
Со и мойдлы воис пом.
Светлана Попова.
Серпасаліс Ирина Бенько.