Воркутаса «Олимп» спорткомплексын нуӧдісны Войвылын олысь войтырлысь «Заполярные игры» ставроссияса спартакиада.
Дас лун странаса 26 карысь да регионысь, а сідзжӧ Беларусьысь 1.500 спортсмен петкӧдлісны вын-эбӧссӧ 16 спорт сикасын.
Медшӧр кубоксӧ мӧдӧдысь шедӧдіс Ухтаса команда. Таӧдз тайӧ карсаыс вермылісны 2014 воын.
Воркута та пӧрйӧ мӧдӧд местаын, а Сыктывкар – коймӧдын. Кубок-медальысь ӧтдор командаяслы вичмисны 150, 100 да 50 сюрс шайта сертификатъяс.
Воркутаысь шайбаа хоккейӧн ворсысь зонъяслӧн да Ухтаысь мужичӧйяслӧн командаяслы спортинвентар ньӧбӧм могысь тшӧтш вичмӧдісны 60 сюрс шайтӧн.
Варччӧмын медбура петкӧдчисны Сыктывкарысь ныв-зон да Воркутаысь верстьӧ спортсменъяс.
Медся стӧча лыйсисны Воркутаса томулов да Ухтаса верстьӧ.
Волейболӧн медся бура ворсісны Ухтаса нывъяс, нывбабаяс да мужичӧйяс, а сідзжӧ Воркутаса зонъяс.
Баскетболын ставнысӧ пасьвартісны Ухтаса зонъяс да Усинскса нывъяс.
Куим морта командаын баскетболӧн медся бура петкӧдчисны Ухтаысь мужичӧйяс да нывбабаяс.
Художественнӧй гимнастикаын вермисны Сыктывкарысь нывъяс да нывбабаяс.
Киокусинкай-каратеын, боксын, дзюдоын некод эз вермы воркутасаӧс.
Медунаысь гира лэптісны Ухтаса зонъяс. Найӧ жӧ вермисны и грек да рим нога вермасьӧмын.
Тхэквондоын водзмӧстчисны Салехардса ныв-зон да Воркутаса спортсменъяс.
Мини-футболын ставнысӧ вермисны Воркутаса мужичӧйяс да Ухтаса зонъяс.
Ухтаысь мужичӧйяс да томулов медбура ворсісны и шахматӧн.
<> Гижӧдсӧ дасьтіс Николай Размыслов.
Снимокъясыс ӧтуввезйысь.