2019 восянь Комиын збыльмӧдӧны «Культура» национальнӧй уджтас. Тайӧ уджсӧ син улас кутӧ Коми Республикаса юралысь Владимир Уйба.
Уджтас вылас подуласьӧмӧн челядьлы искусство школаяс могмӧдісны став колана эмбурӧн. Культураын содтӧд тӧдӧмлун сетан вит учреждениелы таво федеральнӧй сьӧмкудйысь вичмӧдісны 18 миллион шайт. Октябрын нин бӧръя козиныс – некымын пианино – вичмис Абъячойса челядьлӧн шылада школалы.
Мукӧд школаас ньӧбисны выль рояль, пианино, скрипка, баян, гитара, домра. Таысь ӧтдор урок лючки нуӧдӧм могысь велӧдчысьяс вӧдитчӧны интерактивнӧй экранӧн, компьютерӧн, ноутбукӧн, принтерӧн да мукӧд сикас оборудованиеӧн. Эм нин выль пызан-улӧс, быд специальносьт кузя велӧдчан небӧг-пособие.
–Искусство школаяс – зэв тӧдчана шӧринъяс, кӧні челядьлы да томуловлы отсалӧны казявны да восьтыны пытшканыс енбисӧ, пырӧдчыны классика искусствоӧ да мирса культура озырлунӧ. Тайӧ школаясас быдмӧны-велӧдчӧны культураын аскиа зільысьяс, композиторъяс да сьылысь-йӧктысьяс. Уджтас серти вичмӧдӧм федеральнӧй сьӧм вылӧ тӧдчымӧн бурмӧдӧма челядьлы тӧдӧмлун сетан уджсӧ. Ставыс тайӧ отсалас водзӧ сӧвмӧдны Комиысь челядьлысь енбисӧ, и ми виччысям насянь водзӧс, – тӧдчӧдіс регионын культураса министрлысь удж вӧчысь Мария Балмастова.
<> Гижӧдсӧ дасьтіс Николай Размыслов.
Снимокъясыс ӧтуввезйысь.