Комиын семьялы, кӧні 2011 вося январь 1 лунсянь чужис коймӧд да унджык кага, либӧ котырыс босьтіс быдтыны нывкаӧс ли детинкаӧс, мынтӧны 150 сюрс шайт – тайӧ семьялы вичмӧдан регионса капитал. Тавося ӧкмыс тӧлысьӧн республикаса бюджетысь та вылӧ вӧлі торйӧдӧма 154,9 миллион шайт.
–Семьялы регионса капитал мынтӧмыс тырвыйӧ лӧсялӧ «Демография» нацпроектын урчитӧм могъяслы, – висьталіс республикаса правительствоӧн веськӧдлысьӧс вежысь, удж, уджӧн могмӧдан да йӧзӧс социальнӧя доръян министерствоӧн юрнуӧдысь Екатерина Грибкова. – Во заводитчӧмсянь тшӧтш и тайӧ сьӧм отсӧгӧн 382 семья ньӧбӧма патера, 908 котыр дзоньталӧма оланінсӧ. Тавося август 1 лунсянь регионса капитал позьӧ видзны и машина да мукӧд транспорт ньӧбӧм могысь.
Тайӧ сьӧмнас позьӧ мынтысьны и жилищно-коммунальнӧй могмӧдӧмысь, детсадйын кага видзӧмысь, семьяӧн шойччыны ветлӧмысь, ныв-пиӧс школаӧ мунігкежлӧ дасьтӧмысь, а сідзжӧ семьяса эмбур да кагалысь дзоньвидзалун страхуйтігӧн.
<> Гижӧдсӧ дасьтіс Павел Симпелев.
Снимокыс ӧтуввезйысь.