Комиысь волонтёръяс – «Народнӧй фронтса» томулов юкӧнысь дас кык морт – кык вежон уджалісны Ростов-на-Дону карса «Ставыс Победалы!» гуманитарнӧй отсӧг сетанінын, а сідзжӧ ветлісны Мариупольӧ да мукӧд кар-сиктӧ сэтчӧс олысьяслы отсалӧм могысь.
Тайӧ кадколастнас волонтёръяс ректісны-сӧвтісны машинаӧ 50 тонна сёян-юан да кӧлуй, дасьтісны гуманитарнӧй отсӧга куим сюрс гӧгӧр набор да чукӧртісны кад кежлӧ меститанінъясын олысьяслы паськӧм. Гожӧмнас на найӧ тӧдмасьлісны «Сомали» подразделениеысь «Рамзес» позывнӧя воинкӧд, и та пӧрйӧ аддзысьлігӧн ыстісны сыкӧд тышкасьысьяслы мыссигӧн колана кӧлуй.
Торъя военнӧй операцияын тышкасьысь волонтёръяслӧн нӧшта ӧти тӧдса бурдӧдчис Ростовса госпитальын. Ветлісны видлыны и сійӧс, аттьӧалісны да ышӧдісны бур кывъясӧн, сетісны сылы витамина сёян, мед ӧдйӧджык бурдас.
Волонтёръяс некымын лун вӧліны Мариуполь да Шахты каръясын, аддзысьлісны сэтчӧс войтыркӧд. Кольӧмвося сентябрын мобилизуйтӧмалӧн керкаын котыртлісны субӧтник да вайӧдісны пӧрадокӧ йӧрсӧ, ӧд гӧтырыс быдтӧ куим челядьӧс, медічӧт нылыс нёль тӧлыся на сӧмын, и гортгӧгӧрса уджас отсӧгыс аньлы зэв колана.
–Верӧсӧс мобилизуйтісны да, дерт, ӧтнамлы меным сьӧкыд. Вынӧй ни эбӧсӧй абу мыйкӧ горт дорын вӧчны. А волонтёръяс пелькӧдісны йӧрнымӧс. Ылысь ӧд найӧ локтӧмаӧсь, некымын сюрс километр сайысь, – аттьӧаліс отсасьысьясӧс ань.
Мариупольын волонтёръяс юксьылісны кык пельӧ. Ӧтияс уджалісны челядьлы ворсанінын – вӧрӧг бомбитӧм бӧрын сэні чукӧрмӧма уна лӧп-ёг, сійӧс и весалісны. Мӧдъяс жӧ субӧтникалісны посёлокса сӧвет керка дорын.
Уджалісны найӧ и «Азовец» стадионын, кӧні меститчас гуманитарнӧй отсӧг сетан штаб. Мариупольӧ волысь доброволечьяс отсалӧны дзоньтавны войнаӧн жуглӧм стрӧйбаяс, кыпӧдны выль керкаяс.
–Мариупольын ми кодь жӧ том волонтёръяс вель унатор нин удитӧмаӧсь вӧчны. Ӧткымынӧн и пӧгибнитӧмаӧсь Донецк Народнӧй Республикаӧ гуманитарнӧй отсӧгӧн волігас, – висьталіс «Народнӧй фронтын» водзмӧстчысь Денис Сметанин.
Таво мартсянь странаса уна республика-обласьтысь «Народнӧй фронтса» томулов юкӧнысь войтыр кык вежон кежлӧ волывлӧны Россияса выль регионъясӧ. Сэні уджалісны нин Москваысь, Ставрополь, Пенза, Саратов, Самара, Астрахань, Воронеж, Оренбург обласьтъясысь, Ингушетия, Удмуртия, Марий Эл, Якутия республикаясысь доброволечьяс. Комиысь волонтёръясӧс вежис Смоленск обласьтысь котыр.
<> Гижӧдсӧ дасьтiс Павел Симпелев.
Снимокъясыс ӧтуввезйысь.