Октябрь 28 лунӧ Сыктыв районса Палаззяын восьтісны «Найӧ дорйисны Айму» обелиск да торъя военнӧй операция дырйи пӧгибнитӧм Александр Михайлович Курошӧс казьтылан пӧв. Обелисксӧ выльмӧдӧма «Народнӧй бюджет» уджтас серти.
Александр чужлӧма уна челядя семьяын, Палаззяса школаын 9 класс помалӧм бӧрын велӧдчӧма 21-ӧд номера СПТУ-ын, сэсся служитӧма армияын. 2005 восянь уджалӧма сиктса администрацияын шоперӧн, гӧтрасьӧма.
Недыр мысти контракт серти медасьӧма военнӧй служба вылӧ, вӧлӧма Чечняын. Сэккості семьяыс вуджӧма овны Визинӧ, но регыд бӧр мунӧма служитны. Военнӧй операция нуӧданінын петкӧдлӧм повтӧмлунысь Александр Курошӧс наградитӧма Георгиевскӧй крестӧн да Мужество орденӧн.
Обелиск да казьтылан пӧв восьтігӧн палаззяса чӧв-лӧнь ланьтлӧмӧн казьтыштісны Айму дорйигӧн усьӧмаясӧс, пуктісны дзоридзьяс.
–Ми важӧн нин мӧвпалім выльмӧдны обелисксӧ да воськов бӧрся воськов вӧчим тайӧс. Сиктсаяс бокӧ эз кольччыны, чукӧртісны кырымпас, мед пырӧдчыны «Народнӧй бюджет» проектӧ, юӧртісны та йылысь соцсетьясын, тшӧтш и сьӧм чукӧртісны. Водзмӧстчан котырыс – сиктса депутатъяс да администрацияын уджалысь Виктор Сергамаскин – дасьтісны эскиз, – висьталіс администрацияӧн веськӧдлысь Ирина Зайцева. – Тулыснас ньӧбим колана материал, а кор кутім думайтны, коді босьтчас уджас, Виктор шуис, ачым пӧ вӧча. Веськыда кӧ, ме эг и шензьы, ӧд сійӧ зарни киа, и ставсӧ кывкутӧмӧн вӧчӧ. Отсасьысьяссӧ ачыс жӧ бӧрйис. Сиктсаяс сылӧн удж вылӧ видзӧдӧмӧн пыр ошкылісны Викторӧс, молодеч пӧ.
Виктор Сергамаскинлы отсасьӧмаӧсь Олег Попов, Иван Шишкин, Александр Пелевин, ӧтув разьӧмаӧсь важ обелисксӧ, вайӧмаӧсь лыа, мольӧдӧмаӧсь, вевттьӧмаӧсь плиткаӧн, подувсӧ бетонысь вӧчӧмаӧсь, кӧрт ыв-каркас лӧсьӧдӧмаӧсь.
–Фасад эжӧдсӧ, кӧрт ӧградасӧ ачым нин вӧчи, бисӧ нюжӧдім Олег Поповкӧд да Александр Пелевинкӧд, – висьталіс Виктор. – Кутшӧмӧсь лоасны лабичьясыс да лампаясыс, тӧді сӧмын ме, бӧръя здукӧдзыс некодлы та йылысь эг висьтав. Рӧмъяссӧ Георгиевскӧй лента кодьӧс бӧрйи. Медся сьӧкыдыс, тӧдӧмысь, вӧлі ставсӧ вӧчны мичаа, но кокньӧдчытӧг. И унаторйӧ медводдзаысь на босьтчылі, уджалігас ыджыд опыт шедӧді. А помланьыс поскӧд кайи обелиск вывладорас, мед мышсяньыс жӧч гартыштны, видзӧдлі гӧгӧр, да мӧвпыштсис – мыйта удж лои вӧчӧма, и со бӧръятор лӧсьӧда. Весиг ачым шензьышті.
Викторӧс да сылысь ёртъяссӧ уджсьыс аттьӧаліс и Сыктыв районса администрацияӧн веськӧдлысь Александр Попов. Ставсӧ пӧ вӧчӧма налӧн киӧн, налӧн техникаӧн.
–Дасӧд классын велӧдчигас на Виктор босьтчис кӧртысь вӧчасьны. Кыдзи механизатор, отсасьӧ сиктсалы и му гӧрны, турун заптыны, пес вайны, а кыдзи электрик, и орчча сиктсаяслы век воча мунӧ. И гитараӧн ворсӧ, – висьталіс Ирина Зайцева. – А ӧд сылы 26 арӧс на сӧмын, Палаззяысь мунны оз кӧсйы, мӧвпалӧ асшӧр уджӧ босьтчыны. И быдтор ӧд удитӧ. Олӧ бабыс дорын, мед пӧ сылы гажтӧм эз вӧв. Бабыс шуӧ, асывнас пӧ чечча, а Виктор абу нин, рытнас вода – сійӧ абу на.
Обелиск восьтӧмыс лоис палаззясалы тӧдчана лоӧмторйӧн, сійӧ нэммӧдас Айму дорйигӧн усьӧмаяс йылысь паметьсӧ.
<> Елена Вагнер, Павел Симпелев.
Снимокъясыс ӧтуввезйысь.