Липецкын мини-футбол кузя Россияса чемпионатын «Ухта» кыкысь паныдасьліс сэтчӧс «ЛКС» командакӧд.
Медводдза матчас тшӧтсӧ восьтісны липецксаяс. Но Комиысь футболистъяс эз шӧйӧвошны да помся сюйисны нёль гол. Стӧча чужйисны Лукас Педала, Кирилл Козлов, Сергей Денисов да Роша Тьяго Гитта.
Кост бӧрын Сергей Денисов нӧшта ӧтчыдысь веськаліс «ЛКС» воротаӧ, но 31-ӧд минутын гол сюйисны и миянлы.
5:2 тшӧтӧн вермис «Ухта».
И мӧдысь аддзысьлігас сійӧ пасьвартіс Липецкса командаӧс 5:0 «кос» тшӧтӧн.
Медводдза таймас гол сюйис Лукас Педала. Мӧдас Фелипе Парадински кыкысь стӧча веськаліс «ЛКС» воротаӧ, ӧтчыдӧн тадзи вӧчисны Андрей Павлов да Дмитрий Прудников.
* * *
Сыктывкарысь «Новая генерация» Новокузнецкын кыкысь паныдасьліс сэтчӧс «Сиб-Транзит» командакӧд.
Медводдза матчас Комиысь футболистъяс 2:3 тшӧтӧн ворссисны.
16-ӧд минутын Роман Иванин сюйис гол. Кост бӧрын тшӧтсӧ содтіс Даниил Ковтун. Но сибырса выныштчисны да помся сюйисны миян воротаӧ куим мач.
Мӧдысь аддзысьлігас сыктывкарса 6:3 тшӧтӧн вермисны.
Медводдза минутас нин гол сюйис Александр Семуков, но и миян воротаӧ веськаліс кык мач. Та бӧрын Роман Иванин кыкысь ылӧдліс Новокузнецкса вратарӧс. Нёльӧд мачсӧ сюйис Александр Кузьминых.
28-ӧд минутас нин Даниил Ильин да Арсений Петросян содтісны кык мач. Миян воротаӧ сюйисны жӧ ӧти гол.
Октябрь 13-14 лунъясӧ «Ухта» гортас ворсас Москваысь «КПРФ» командакӧд, «Новая генерация» Сыктывкарын паныдасьлас Санкт-Петербургса «Кристаллкӧд». <>
Гижӧдсӧ дасьтiс Николай Размыслов.
Снимокъясыс ӧтуввезйысь.