Койгорт районса Грива сиктын да Зимовка посёлокын воссисны модельнӧй библиотекаяс.
Гриваын небӧг видзанінсӧ выльмӧдӧм могысь республикаса да районса бюджетъясысь вӧлі вичмӧдӧма куим миллион шайт. Тайӧ сьӧм вылас дзоньталӧма библиотека жыръяссӧ, ньӧбӧма выль пызан-улӧс, компьютеръяс, мультимедиа техника. Библиотекасӧ мичмӧдігӧн тӧд вылӧ босьтӧма сикт дорын олысь-рӧдмысь туриясӧс.
Гриваса войтыр да библиотекаын зільӧны видзны-сӧвмӧдны мам кывсӧ, пӧль-пӧч традицияяссӧ, туялӧны сиктса историясӧ. Небӧг видзаніныс ёртасьӧ «Койгорт» национальнӧй парккӧд да коми культура шӧринкӧд.
Зимовкаын библиотекасӧ выльмӧдӧма «Ёртъяслӧн тӧвъянін» («Зимовье друзей») проект серти, та могысь республикаса бюджетысь вӧлі торйӧдӧма 1,6 миллион шайт. «Ёртъяслӧн тӧвъянінса» камин дорӧ йӧзыс кутасны чукӧртчывны ӧтлаын шойччыштны, лыддьысьны, ворсны.
–Республикаын ӧні уджалӧ 43 модельнӧй библиотека. Нимкодь, мый кык татшӧм учреждение лоис и Койгорт районын. Эска, сэтчӧ окотапырысь мӧдасны волыны и верстьӧ, и том войтыр, – пасйис регионын культураса министрлысь удж вӧчысь Мария Балмастова.
Гриваын да Зимовкаын модельнӧй библиотекаясыс таво медводдзаяс на. Во помӧдз «Культура» нацпроект серти республикаын лоӧ восьтӧма ӧнія кадыслы лӧсялана нӧшта квайт татшӧм учреждение. <>
Гижӧдсӧ дасьтiс Павел Симпелев.
Снимокъясыс ӧтуввезйысь.