Велӧдчысьяслӧн ӧні медся бур кад – каникулъяс. Унаӧн шойччӧны челядьлы шойччан да бурдӧдчан лагеръясын, спортплощадкаясын. Та йылысь тӧдӧмӧн да Россияын “Велӧдчы уявны!” акциякӧд йитӧдын МЧС-ысь инспекторъяс котыртлӧны челядькӧд аддзысьлӧмъяс, велӧдӧны видзны асьнысӧ ва вылын. Ӧти татшӧмсяма паныдасьлӧм вӧлі “Бумажник” спорткомплексын. Волісны Эжваса 31 номера, Пальысь да Зеленечысь школьникъяс.
Урок заводитчис теориясянь. Старшӧй инспектор Юлиана Молчанова висьталіс челядьлы, кыдзи кутны асьнысӧ ва вылын. Сідзжӧ пасйис, мый купайтчыны позьӧ сӧмын дасьтӧм-лӧсьӧдӧм инъясын, кӧні пыдӧссӧ видлалісны водолазъяс, зільӧны спасательяс, эмӧсь буйкаяс.
Таысь кындзи инспекторъяс стрӧжитісны ва вылын дурӧмъясысь да мый колӧ вӧчны, казяласны кӧ вӧйысьӧс. Челядьлы казьтыштісны и, кутшӧм номер кузя позьӧ корны спасательясӧс.
Инспекторъяслӧн кывъяс серти, быд мортлы колӧ велӧдчыны уявны. И медым тайӧ шуӧмыс эз ло прӧста сідз, челядьлы петкӧдлісны спассредствояс, быдӧн йылысь висьталісны, кыдзи да мый сійӧн пӧльзуйтчыны. Велӧдісны и сетны вӧйысьлы медводдза отсӧг.
Медбӧрын быдӧнлы инспекторъяс козьналісны памяткаяс, кӧні гижӧма, кыдзи кутны асьтӧ ва вылын да мый вӧчны неминуча дырйи.
Талунъя «Йӧлӧга» газетысь, кодӧс позьӧ судзӧдны пошта пыр, позьӧ ньӧбны «Ордым» лавкаын. Медым лыддьыны электроннӧй версия, личкӧй татчӧ. Эмӧсь кӧ юалӧмӧяс, гижӧй komi-kerka@ya.ru.