Марья видӧ Ӧльӧш пӧльсӧ:
– Лоыштӧма ноутбук!
Ыджыд дивӧ… Мый тась пӧльза?
Шыд он паняв сыысь, тшук.
Лун-лун дізьвидзӧмӧн олан,
Он кӧ пасьтась пырысь-пыр!
Пестӧ поткӧдлыны колӧ,
Либӧ ва кӧть ӧтчыд пырт.
Ӧльӧш гусьӧн вӧчлӧ пига,
Кыв вылас жӧ шуӧ тадз:
– Букыс ми ног лоӧ нига.
Гӧгӧрвоан, кӧчамач?!
Тэ со судзӧдан газеттӧ…
Эськӧ абу ыджыд дон.
Кутшӧм пӧльза сійӧ сетӧ?
Коркӧ лыддьылан ли он?
Пачтӧ ломзьӧдан, и ставыс.
Шыдтӧ панялан, и пӧт…
Мыйджык мирас вӧчсьӧ таво,
Войдӧр вӧлі мый, он тӧд.
Но а тані мыйыс абу:
Лыддян – бергӧдчылӧ юр,
Сымда дивӧ! Кылан, бабӧ?
Миян сиктыд быттьӧ нюр,
Синтӧ нинӧмӧн он гажӧд,
Весиг клуб и то эз ло.
Тан жӧ: кӧсъян – Эрмитажӧ
Позьӧ пырны, либӧ со
Ковент-Гарденӧ кӧть мӧдам!
Эм пӧ нӧшта Мулен Руж,
Сӧмын этшаджык на тӧда,
Сайтас пырны ог на куж.
Сідзжӧ позьӧ корсьны сьылан
Либӧ кутшӧмкӧ кино –
Важ кӧть выль… Тэ, бабӧ, кылан?
«Василейтӧ» корсьла, но?!
Бабыс пыр на мыйкӧ броткӧ,
Пачысь кыскӧ яя шыд:
– Тэ кодь йӧйыс эм-ӧ кодкӧ?
Вечмасян сэн рытывбыд!
Но кор тӧдса шыяс кылӧ,
Пыр и вежсьӧ чужӧмбан:
– Со ӧд, Логинова сьылӧ!
Ачыс ставнас быттьӧ тан!
…Тайкӧ пырас ноутбукӧ,
Весиг пӧльсӧ вештіс:
– Лэдз!
Тадзтӧ рытывбыд кӧть пукав!
Ак, и Лида! Молодеч!
Збыль тай лӧсьыд. Дедӧ, кылан?
Эм кӧ сэтшӧм позянлун,
Корсьлы кутшӧмкӧ бур сьылан,
Пока водны эг на мун…
«Триньдзи-бриньдзи, балалайка,
Истӧг тувъя деревня…»
– Лида бӧрад увтчӧм тайкӧ,
Аддзин кутшӧмкӧ фигня!
…Мӧд рыт сибӧдчыліс бара,
Корис восьтны сьӧлӧм гаж
(тадзи шуӧ «… с лёгким паром»,
бур кино пӧ, кӧть и важ).
Весиг пыраліс онлайнӧ
(лавкасянь оз ылын ов,
но мыйсюрӧ корис вайны –
петавны пӧ оз нин ков!).
Ӧти кывйӧн – олӧм пуксис!
Век жӧ бурлань вежсьӧ кад:
Ӧльӧш гозъя чуть эз юксьӧй,
Ӧні ставыс бур и лад.
Ен пельӧсын видзанторйӧн
Лои налӧн ноутбук:
Мый нӧ, зыксьӧмысь кӧ дорйӧ,
Ассьыс донсӧ вештӧ, тшук…
Емеля Пилич
Серпасаліс Арсений Булышев