Мыйӧн ноксьылам ичӧтдырйиыд, тшӧкыда кольӧ сӧмын шуда казьтыланторйӧн. А республикаын бура тӧдса этноблогер Генрих Немчинов сыысь эз эновтчы, содтӧд на велӧдчис-сӧвмис. И со ӧні медводдза ролик снимайтӧмсяньыс квайт во мысти сійӧ босьтчис нуӧдны «Юрган» телекомпанияын томуловлы «Детали. Неформат» уджтас.
Бӧръя воясӧ Генрих некымынысь йӧзӧдчыліс «Арт» журналын, а 2022 вося январсянь сентябрӧдз корреспонденталіс «Йӧлӧга» журналын. Гижис чужан кывйӧн том войтырлы быдсикас статья, висьт, интервью. Сэк жӧ кызь арӧса блогер кузяла пӧжӧма съёмка-монтажӧн йитчӧм удж корсьӧм йылысь мӧвп. Сылы окота вӧлӧм лоны кадрын, сёрнитны видзӧдысь-гижӧдчысьыскӧд син на син.
«Юрганса» генеральнӧй директор Александр Кузнецовлӧн вӧзйӧмыс лоӧма виччысьтӧмӧн: сійӧ коралӧма Генрихӧс томуловлы «Детали. Неформат» уджтас дасьтысь-нуӧдысьӧн. Зон кӧсйысьӧма вежон кымын мӧвпыштлыны, а сэсся сетӧма сӧглас.
Ӧні Немчинов ветлӧ кар-районъясӧ, корсьӧ сэтысь вомъёртъясӧс, гижӧ да поездын нин монтируйтӧ программасӧ.
Аслыс медся ёна сьӧлӧм вылас воӧ Эжва йывса Донысь Артур Гарновкӧд аддзысьлӧмыс. Генрихлӧн висьталӧм серти, олӧм вылас видзӧдласыс налӧн ӧткодь.
Бӧръя уджтасын гӧсьтыс – Тогоысь музыкант Девид Боджон. Сійӧ тӧдӧ вит кыв, весиг комиӧн неуна сёрнитӧ.
Тӧдмасьӧмаӧсь найӧ Маньпупунёрӧ кольӧмвося гожӧмӧ ветлігӧн. Боджон кӧть олӧ Москваын, ассьыс сьыланкывъяссӧ гижны волывлӧ Сыктывкарӧ, тадзсӧ пӧ донтӧмджык.
Талун блогер Генрих Немчинов йӧзӧдӧ ассьыс уджъяссӧ став соцсетьын. Бӧръя выль лист бокыс – «Дзенын».
–Пыралӧй менам лист бокӧ. Ӧтлаын кутам волывлыны Коми муын да мукӧд регионын ылі пельӧсъясӧ, тӧдмасьны сёрнисикасъясӧн, вужвойтыр паськӧмӧн, оласногӧн, обычай-традицияӧн, – чуксалӧ водзмӧстчысь зон. – Матысса кадӧ кӧсъя волыны Интаӧ, кӧн эг на вӧв. Кута водзӧ сӧвмӧдны и журналисталан сям-кужанлунӧс.
<> Игорь КОЛЕСОВ. Комиӧдіс Елена ПЛЕТЦЕР.
Снимокыс Генрих НЕМНИЧОВЛӦН гортса архивысь.