И.А.Куратов нима педколледжын бур традицияӧн нин лоис нуӧдны «Пера-багатыр» конкурс.
Таво сэні вермасис вит зон: колледжсьыс Валентин Булышев, СГУ-ысь Василий Габов, вӧр институтысь Роман Черных, Коми Республикаса госслужба академияысь Родион Дёмин да Ухтаса государственнӧй техническӧй университет бердын кадет корпусын велӧдчысь Константин Кожевин.
Константинлӧн вужъясыс Изьва районса Чика грездысь. Кыдзи и сиктса быд зон, ичӧтсяньыс вӧчӧма гортгӧгӧрса удж, кыйӧма чери, спортӧ сибӧдчӧма. Конкурсын петкӧдчыны сылы, тӧдӧмысь, медсьӧкыд вӧлі, ӧд бӧръя лунъясас висьмӧм ёртсӧ вежны ковмӧма. Костяӧс унаӧн ошкисны таысь, тадзи пӧ и вӧчӧны бур йӧзыс, отсалӧны матыссаясыслы.
Луздорса Гурьёвчи сиктысь Роман Черных помалӧма нин Кировын юридическӧй колледж да ӧні велӧдчӧ вӧр институтын, кӧсъя пӧ лоны кусӧдчысьӧн.
Василий Габов чужӧма да быдмӧма-сӧвмӧма Кӧрткерӧс районса Мельнича Ӧзын грездын. Медбур велӧдысьясӧн пӧ менам вӧліны батьӧй да мамӧй. Тӧдсаяс да ёртъяс пӧ шуӧны, мый кужа аддзыны да донъявны олӧмсьыс медся ичӧтторъяссӧ.
Эжва йывса Ярашъюысь Родион Дёмин школаын велӧдчигас на водзмӧстчӧма общественнӧй уджын, ӧні жӧ юрнуӧдӧ Россияысь сиктса том йӧз ӧтмунӧмлӧн Сыктывкарса юкӧнӧн, зільӧ «МИ» котырын.
Кулӧмдін районса Керчомъя сиктын быдмӧма Валентин Булышев. Витӧд классын велӧдчигас на отсалӧма батьыслы кыпӧдны пывсян. А конкурс дырйи зонъяслы буретш коліс висьтавны, кыдзи коми йӧз бӧрйӧны керка-жытник лэптыны вӧр, туясьӧны-корсьӧны, кӧні стрӧитчыны, кытысь нитш перйыны, и батьсяньыс сэки на босьтӧм тӧдӧмлуныс, дерт, и ӧні ёна лӧсяліс Валентинлы ассьыс сям-кужӧмсӧ петкӧдлыны.
Керка-пывсян кыпӧдан традицияясӧн тӧдмӧдӧм кындзи коми багатыръяслы коліс и киподтуйнас ошйысьны. Роман Черных мутӧй вӧчӧма, а видеогижӧдысь позис аддзыны, кыдзи тайӧ мутӧйнас мамыс гудраліс няньшом да шаньга пӧжаліс.
Конкурсын ордйысьӧм кывкӧрталігӧн жюри шуис Романӧс традицияяс медбура тӧдысьӧн, пасйис Василий Габовлысь творчество боксянь петкӧдчӧмсӧ. Константин Кожевин лоис «Кужысь киа» нимпасын вермысьӧн, а Родион Дёминӧс шуисны медся шмонитысь да кыпыд лола мортӧн.
«Пера-багатыр» ним жӧ шедӧдіс Валентин Булышев.
Витнан зонмыслы вичмисны педколледжсянь дипломъяс, асланыс районъясса землячествояссянь да «Коми войтыр» ӧтмунӧмсянь козинъяс. <>
Павел АНОХИН.
Снимокъясыс ӧтуввезйысь.