Владислав Константинович Малыхлӧн 
чужаніныс – Бурятия. Комиӧ волӧма, кор татчӧс филармонияса баянист триоӧ ворсысьӧс корсьӧмаӧсь. Сэки пӧ и муні чужан муысь
да, веськыда кӧ шуны, ог майшась таысь. Улан-Удэын олігас Владислав Константинович велӧдлӧма сэтчӧс П.Чайковский нима музыка училищеын, а Сыктывкарӧ воӧм бӧрын и искусство гимназияын баянистъясӧс велӧдӧ.
– Велӧдчысьыд, тӧдӧмысь, тіян уна?
– Уна, и на пӧвстын эмӧсь гырысь вермӧм шедӧдысьяс, конкурсъясса лауреатъяс. И ме гӧрдитча наӧн.
– Владислав Константинович, тӧда, ті неважӧн юбилей пасйинныд? Кымын арӧс нин тіянлы, абу кӧ гуся?
– А, чайтанныд, кымын эськӧ? – воча юаліс сійӧ менсьым.
– Квайтымын, – падъявтӧг шуи ме.
– Меным кӧкъямысдас тырис, – ёна и чуймӧдіс менӧ Владислав Константиновичлӧн вочавидзӧмыс.
– И век на уджаланныд? Тыдалӧ, ті ыджыд вын-эбӧса морт?
– Да, и менам эм весиг педагоглӧн медвылыс квалификация.
– Гашкӧ, восьтанныд гусяторсӧ, мыйла велӧдысьӧн лоинныд?
– Сы вӧсна мый шылада училище помалі да, дипломын гижӧма: «Музыка школаын велӧдысь». Ачым жӧ некор эг велӧдчыв музыкальнӧй школаад. Сӧмын дас сизим арӧсӧн босьтчи баянӧн ворсны да нотаяс тӧдмавны. А сэтчӧдз жӧ асланым посёлокын трактористӧ велӧдчи, – висьтасис Владислав Константинович. – Олӧмыс ме дорӧ эз мелі вӧв, бать-мамӧс водз вошті да быдми детдомын. А детдом бӧрад туйыс ӧти вӧлі – ремесленнӧй училищеӧ. Сэні трактористӧ велӧдчигӧн завучкӧд вомӧ воим. А директорнас жӧ нывбаба вӧлі, сійӧ и аддзӧма меын мыйкӧ сэтшӧмӧс, мый вужвыйӧн вежис менсьым олӧмӧс. Шуис, тэныд пӧ музыкантӧн колӧ лоны. Босьтіс ки пӧлӧд да нуӧдіс шылада училищеӧ. Первой курсас ме вылын сералыштлісны на, сыӧдз ӧд музыкаас эг велӧдчыв да, но нёльӧд курсын нин дзик мӧд синмӧн ме вылӧ видзӧдісны.
А сэсся вузӧ пыри. Ӧкмыс во велӧдчӧмыс лоис тырмымӧн, медым ме лои музыкантӧн, а сэсся и педагогӧн. Оз ӧд весьшӧрӧ шулыны, педагогнад пӧ оз чужны, сыӧн лоӧны. Со татшӧм вӧлі менам велӧдысьӧн лоан туйыс.
– А музыка кындзи кутшӧмкӧ творчествоӧ сибӧдчанныд тшӧтш?
– Да, гижа кывбуръяс. Музыкантыдлы ӧд уна лоӧ ветлӧдлыны, и туйын нем вӧчигмоз босьтчи кывбуръястӧ лӧсьӧдны. Сёрӧнджык и сьыланкывъяс мӧді гижны. Медводдзаыс артмис тані, гимназияын, и сьыланкывсӧ гимназиялы жӧ сии.
Бӧрынджык композиторъяс пӧвстын конкурсын «Мчится поезд» сьыланкывйысь менӧ вермысьӧн шуисны. Ӧнӧдз на шензя, ӧд венласисны сэки меысь, чайта, енбиаджык авторъяс.
– Олӧманыд ті збыльысь унатор шедӧдӧмныд…
– Тыдалӧ, да. Меным шулӧны, зэв пӧ чӧскыда пусян. Тайӧ уджыс тшӧтш меным кажитчӧ.
* * *
Владислав Константиновичкӧд сёрнитӧм бӧрын кылі, мый висьталіс сійӧ велӧдчысьясыслы: «Йӧзыс кӧ сьылӧны, босьт киад баян да ворс налы. А кӧсъян кӧ гижны кывбуръяс – гиж. Ӧні кӧ оз артмы, верстямман, олӧмсӧ бурджыка тӧдмалан, сэки ставыс артмас». И мӧвпышті – аслас олӧмыс сылӧн петкӧдлӧ, мый збыльысь тадзи и эм.
<> Гижӧдсӧ дасьтіс Таисия Халина.
Снимокъясыс авторлӧн.