Апрель 3 лунӧ Луздор районса Абъячойын восьтісны 600 велӧдчысь вылӧ артыштӧм школа. Кыпӧдны сійӧс вӧлі индӧма «Образование» нацпроект серти.
– Ми ӧні олам шензьӧдана кадӧ – нуӧдам шуда аскиа лун вӧсна тыш да сэк жӧ восьталам выль школа, детсад, бурдӧдчанін, и водзті дорысь кыпӧдам татшӧмсӧ унджык. Ми козьналам челядьлы, педагогъяслы бур олӧм вылӧ лача сетан стрӧйбаяс. Татшӧм ногӧн пуктам томуловлӧн аскиа лунлы зумыд подув – тайӧ и Коми Республикаса правительстволӧн, и менам шӧр могыс, – висьталіс луздорсаӧс шуда лоӧмторйӧн чолӧмалігӧн республикаса юралысь Владимир Уйба.
Абъячойса школаын велӧдысьяс дорӧ шыӧдчигӧн сійӧ корис чужтыны-пестыны ныв-зон сьӧлӧмын чужан му дорӧ муслун, медым профессия босьтӧм бӧрас найӧ бергӧдчасны сиктас да воысь-во сӧвмӧдасны сійӧс. Владимир Уйба торйӧн пасйис, мый Коми Республикаса правительство и водзӧ кутас тӧждысьны сикт-грезд вӧсна, лӧсьӧдны сэні выль уджаланінъяс, вӧчны ставсӧ, медым сиктса войтыр вӧліны шудаӧсь.
– Ӧнія сьӧкыд кад вылӧ видзӧдтӧг ми зілям кыпӧдны унджык выль школа, – висьталіс Россияса йӧзӧс велӧдан министрӧс вежысь Андрей Николаев. – Ме вылӧ донъяла регионӧн веськӧдлысьяслысь та боксянь зільӧмсӧ. Россияса президент тшӧктыліс 2019-2024 воясӧ кыпӧдны странаын этша вылӧ 1.300 велӧдчанін, и Абъячойса школа пырӧ на лыдӧ. Сьӧлӧмсянь чолӧмала велӧдчысьясӧс, налысь бать-мамсӧ, педагогъясӧс нимкодь лоӧмторнас, сиа велӧдчӧмын да уджын выль вермӧмъяс.
Абъячойын школасӧ лэптӧмаӧсь буретш сэтчӧ, кӧні сиктсаяс ӧні зіля стрӧитӧны ассьыныс керкаяс.
Выль велӧдчанінын сувтӧдӧма ӧнія оборудование, компьютеръяс, мультимедиа техника, лӧсьӧдӧма лыддьысян жыръя да медиатекаа библиотека, челядьлысь водзмӧстчӧмъяс збыльмӧдан вежӧс, тренажёра зал, орччӧн – стадион.
Кыдзи висьталіс республикаса юралысь, гожӧмнас школа дорӧдзыс вӧчасны туй, пелькӧдасны йӧрсӧ.
Ӧнӧдз Абъячойса ныв-зон велӧдчисны кык сменаӧн сизим торъя стрӧйбаын. Тайӧ мытшӧдсӧ лои венӧма. Выльлаӧ вуджасны 5-11 классъясын велӧдчысьяс, а ичӧт ныв-зон и водзӧ кутасны ветлыны кирпичысь вӧчӧм школаӧ.
Республикаса йӧзӧс велӧдан министерствоӧн веськӧдлысьлысь удж вӧчысь Наталья Якимовалӧн кывъяс серти, Абъячойын школасӧ кыпӧдны федеральнӧй сьӧмкудйысь вӧлі вичмӧдӧма 450 миллион шайт, сы мында жӧ торйӧдіс и регион.
Школа восьтігӧн республикаса юралысь козьналіс велӧдчанінлы 250 сюрс шайта сертификат. Сьӧма козин вичмис и районса администрациясянь.
* * *
Колӧ пасйыны, 2022 вося сентябрь 1 лунӧ выль школа вӧлі восьтӧма Кулӧмдін районса Помӧсдінын. Таво ассьыныс ӧдзӧс восьтасны Изьва районса Изьвавомын школа-сад да Сыктывкарса Кӧджпом-Читын детсад. Юркарса Эжва районын босьтчисны кыпӧдны 825, а Изьва сиктын – 600 велӧдчысь вылӧ школаяс. Во помӧдз босьтчасны кыпӧдны и Сыктывдінса Выльгортын да Сыктывкарын школаяс, Изьва вожса Бакурын да Печора районса Озёрнӧй посёлокын детсадъяс.
<> Гижӧдсӧ дасьтіс Павел СИМПЕЛЕВ.
Снимокъясыс ӧтуввезйысь.