Таво Коми Республикаса медводдза юралысь Юрий Алексеевич Спиридонов чужӧмсянь тырӧ 85 во.
Март 29 лунӧ чукӧртчыліс тайӧ пас кежлас дасьтысян комитет, кытчӧ пырисны и Юрий Алексеевичлӧн уджъёртъяс: вӧр-ва видзан министерствоӧн вӧвлӧм веськӧдлысь Александр Павлович Боровинских, республикаса юралысьӧс вӧвлӧм вежысь Галина Васильевна Бутырева, йӧзлысь дзоньвидзалун видзӧм кузя вӧвлӧм министр Георгий Магометович Дзуцев, ортсыса йитӧдъяс министерствоӧн вӧвлӧм юрнуӧдысь Сергей Михайлович Катунин, Луздор районса администрацияӧн вӧвлӧм веськӧдлысь Василий Александрович Гуторов, Юрий Спиридоновлы отсасьысь Вера Антоновна Кузнецова да мукӧд.
– Нелямын сайӧ во Юрий Алексеевичлӧн олӧмыс да уджыс вӧлі йитчӧма Коми мукӧд, тані сійӧ горнӧй мастерсянь быдмис республикаса юралысьӧдз, – пасйис регионса правительствоӧн веськӧдлысьӧс вежысь Галина Габушева. – Медвойдӧр ми казьтыштам Юрий Алексеевич Спиридоновӧс, кор сёрнитам экономикаын да социальнӧй юкӧнын збыльмӧдан тӧдчана уджтасъяс йылысь. Тайӧ и Шӧр Тиманын боксит перйӧмкӧд, «Белкомур» кӧрт туй нюжӧдӧмкӧд, Вежа Степан нимӧн вежӧдӧм вичко, кардиодиспансер да искусство гимназиялы выль корпусъяс кыпӧдӧмкӧд йитчӧм да мукӧд проект.
Оргкомитетлӧн чукӧртчылігӧн Ю.А.Спиридоновлӧн юбилей кежлӧ дасьтысян уджтас балаӧн тӧдмӧдіс республикаса национальнӧй политика министерствоӧн веськӧдлысьлысь удж вӧчысь Станислав Бушков. Сійӧ висьталіс, мый индӧма нуӧдны конференцияяс, «гӧгрӧс пызанъяс», презентацияяс, выставкаяс, кӧні республикаын олысьяс, челядь да том йӧз тӧдмаласны, кутшӧм пай пуктіс Юрий Алексеевич перестройка да Сӧветскӧй Союз киссян воясӧ Комиӧс сӧвмӧдӧмӧ.
Ю.А.Спиридоновлӧн чужан лунӧ – ноябрь 1 лунӧ – нимӧдасны «Ю.А.Спиридонов и его время» небӧг, филармонияын котыртласны ыджыд концерт. Книгасӧ дасьтан удж йылысь висьталіс история наукаса доктор, профессор Александр Попов.
– Небӧг йӧзӧдӧм йылысь мӧвпыс чужис 2018 воын на Ю.Спиридоновлӧн чужӧмсянь 80 во тырӧмлы сиӧм конференция дырйи, – шуис сійӧ. – Книгаӧ лоӧ пыртӧма Юрий Алексеевичлӧн олӧм да удж йылысь нелямынысь унджык очерк.
Вузасян да промышленносьт палатаса президент Юрий Колмаков вӧзйис Сыктывкарса уличалы сетны Юрий Спиридонов ним, Усинскын сувтӧдны сылы памятник, Комиын экономика да культура сӧвмӧдӧмын вермӧмъясысь лӧсьӧдны Ю.А.Спиридонов нима премия.
Георгий Дзуцевлӧн видзӧдлас серти, республикаса медводдза юралысьлысь ним-сӧ колӧ сетны и кардиошӧринлы.
Сергей Катунин кӧсйысис снимайтны Юрий Алексеевич Спиридоновлӧн олӧм да шедӧдӧмторъяс йылысь документальнӧй фильм, а сідзжӧ вӧзйис нуӧдны школаясын «Спиридоновлы сиӧм часъяс».
Республикаса медводдза юралысьлӧн юбилей кежлӧ дасьтысян уджтасӧ вӧзйӧмъяс виччысьӧны и регионын олысьяссянь.
<> Гижӧдсӧ дасьтіс Павел СИМПЕЛЕВ.
Снимокыс ӧтуввезйысь.