Понйӧс мыйӧкӧ велӧдӧм, налысь кутшӧмкӧ торъя пӧрӧда рӧдмӧдӧм, выставка кежлӧ дасьтысьӧм… Ставыс тайӧ да уна мукӧдтор на – кинологлӧн быдлунъя тӧжд-мог.
«Коми му» газет лыддьысьясӧс аслас уджӧн тӧдмӧдӧ Сыктывкарысь кинолог Анна Попова.
Уна во нин сійӧ зільӧ тайӧ специальносьт сертиыс да эскӧдӧ, пемӧстӧ радейттӧг пӧ сы дорӧ он и сибав.
Ас дорас унаӧн шыӧдчылӧны быдсикас юалӧмӧн. Кодкӧ оз тӧд, кутшӧм сёянӧн бурджык вердны радейтана понсӧ, кодӧскӧ нёль кокаыд дӧнзьӧдӧма сямнас, либӧ нӧшта мыйкӧ майшӧдлӧ.
Ӧтитор пӧ быть колӧ ставлы сюркнявны пель саяс – босьтін кӧ пон, сідзкӧ, дӧзьӧрит сы бӧрся, – тӧдчӧдӧ кинолог.
– Анна, кинологӧн уджаланныд да, гашкӧ, и асланыд эм пон?
– Школаын велӧдчигӧн, кыдзи и мукӧд челядь, кӧсйи жӧ лӧсьӧдны аслым пон. Зэв окота вӧлі! Юрын ӧтарӧ бергаліс ёсь пиня ротвейлер. Сӧмын ӧні гӧгӧрвои, мыйла сэки бать-мам эз отсавны збыльмӧдны дум-кӧсйӧмӧс. И таысь налы ыджыд аттьӧ. Оз позь ньӧбны-козьнавны челядьыдлы пон. Мыйла? Понйыд – абу чача, а пемӧс, код бӧрся колӧ бур дӧзьӧр, и код вӧсна збыльысь кывкутны вермас сӧмын верстьӧ морт. Понйыд ӧд, овлӧ, и керкаад пакӧститчӧ, и кӧмкоттӧ да весиг пызан-улӧстӧ йирӧ. И тайӧ абу на сэтшӧм ыджыд шог!
Бать-мам меным висьталісны-гӧгӧрвоӧдісны, понтӧ пӧ, быдман да, лӧсьӧдан, кор аслад лоӧ керка да семья. И верстяммӧм бӧрын нин куті пыр тшӧкыдджыка мӧвпавны гуся мӧвпӧс збыльмӧдӧм йылысь. 30 арӧсӧн дась нин вӧлі ньӧбны понпи, но мыйлакӧ бара на эновтчи таысь. Сэсся коркӧ тӧдсаӧй, кодкӧд тӧдмасьлім понъяслӧн выставка дырйи, ыстіс меным ӧти понпилысь гоз-мӧд снимок. Видзӧдлы пӧ, кажитчас оз. И куим лун мысти нин верӧскӧд мӧдӧдчим орчча регионӧ миян Хондала – 22 килограмм сьӧкта 4 тӧлысся ротвейлерла.
– Дӧзьӧрыс тырмымӧн сы бӧрся?
– Куим лун, позьӧ шуны, эг петав ӧтуввезйысь да видзӧдалі понпиӧс велӧдӧм-быдтӧм йылысь быдсяма видео. Ӧтуввезъяд мыйыс сӧмын абу, уна и ковтӧм юӧрыс, но сэк та йылысь эг на мӧвпыштлы. Бур, торъя специалистъяс уна юалӧм вылӧ вочакывсӧ отсалісны корсьны. И гӧгӧрвои, мый медвойдӧр колӧ сюркнявны пель саяд: эм кӧ тэнад понпи, коді зэв ӧдйӧ быдмӧ, во джынйӧн 20 килосянь 40-ӧдз содӧ, быть колӧ водзвыв ставсӧ тӧдмавны, кыдзи сы бӧрся дӧзьӧритны.
– Кыдзи воис мӧвп лоны кинологӧн?
– Ӧтчыд ӧтуввезйын отсалі сӧветӧн ӧти нывкалы, юасис пон кузяыс да. А сэсся нӧшта ӧтилы. А кор тӧдса кинолог вӧзйис меным туйдны-велӧдны пон видзысьӧс, кыдзи сылы нёль кока ёртсӧ ворсӧдны, вердны, воспитайтны, гӧгӧрвои – ме верма отсавны та кузя мукӧдлы. Коркӧ ӧд и ачым унатор эг тӧд.
Та бӧрын 10 тӧлысь велӧдчи кинологӧ. И воськовті аслам уджын паськыд туй вылӧ. На водзӧ на мӧвпала содтыны тӧдӧмлунӧс, туявны понъяслысь оласног-сямсӧ, мыйысь найӧ полӧны, дӧзмӧны, тшӧтш и вердӧм-юкталӧм кузяыс унатор на колӧ тӧдмавны. Колӧ и понъясӧс норматив сдайтны велӧдӧм кузя инструкторлысь «корочка» шедӧдны.
– Унаӧн шыӧдчылӧны отсӧгла?
– Унаӧн юасьӧны, мый вӧчны, пон кӧ асмогасьӧ керка-патераын либӧ ывлаын оз кывзысь: тракйысьӧ дом поводысь, быдтор босьтӧ вомас, мукӧд пемӧс вылӧ усьласьӧ. Ӧткымынлӧн понйыс, мӧдарӧ, полӧ ывлаӧ петны, либӧ бокӧвӧй вылӧ уськӧдчӧ, кор керкаас пырасны. Вермас лоны, пемӧс уськӧдчӧ-увтӧ либӧ курччасьӧ, мыйкӧ кӧ кутан сылысь босьтны-мырддьыны, улӧс-пызан йирӧ. Ӧти кывйӧн кӧ, оз кӧ мыйкӧ кажитчы тэныд аслад понйын, колӧ шыӧдчыны специалист дорӧ. Быд понйӧс позьӧ велӧдны лоны сэтшӧмӧн, кутшӧм колӧ кӧзяиныслы.
– Уджтӧ, тӧдӧмысь, ёна радейтанныд?
– Кинологӧн кажитчӧ уджавны. Бур, кор верма отсавны кӧзяинлы гӧгӧрвоны ассьыс гортса пемӧссӧ. Колӧ, мед понйыд долыд сьӧлӧмкылӧмъяс вайис, а эз сӧмын тӧжд-нок. Ме ставныслы вӧзъя, мися, заводитӧй велӧдны понтӧ ичӧтсяньыс, кор сійӧс вайинныд гортад. Эн виччысьӧй, кор велалас тіян дорӧ либӧ быдмыштас. Зільӧй, медым понйыдлӧн сямыс лӧсяліс тіянлы. Бӧрынджык та боксянь мыйкӧ вежны лоӧ ёна сьӧкыдджык. Шуам, ывлаын кыдз позьӧ унджык колӧ ноксьыны радейтана пемӧсыдкӧд, тшӧтш и ворсны сыкӧд. Сэк нёль кокаыд оз кут мый вынсьыс мӧд пон дорӧ котӧртны-тракйысьны – сылы лоӧ интереснӧ тэкӧд!
– Сикт-грездын пон видзысьлы мый вӧзъянныд?
– Сикт-грездад мӧд ногӧнджык видзӧны понтӧ. Тшӧкыда пуксьӧдӧны дом йылӧ, и матыстчылӧны сӧмын вердігас либӧ чом гӧгӧрсӧ идралігӧн. Некутшӧм сэсся тӧжд-нок абу, ӧд кӧзяиныс да понйыс оз ӧти вевт улын овны. Тадзинад кӧзяин да пон костын некутшӧм ёртасьӧм ни топыд йитӧд оз артмы. А тадзи оз позь, быть колӧ понйыдкӧд ноксьыны.
Нӧшта чайта, арӧсӧдз понйыд оз на вермы видзны-стӧрӧжитны керкатӧ, понпи на ӧд. Верстьӧлы колӧ кывкутны пемӧс пондаыс, колана ногӧн сійӧс дӧзьӧритны, вердны, ворсны сыкӧд, велӧдны кутны асьсӧ йӧз дорын. Сӧмын та бӧрын нин сысянь мыйкӧ виччысьны да корны, шуам, керка видзны. Ми кывкутам сы вӧсна, кодӧс босьтам ас борд улӧ.
– Мукӧд кар-сиктын олысьлы кыдзи позьӧ тіян дорӧ шыӧдчыны?
– «ВКонтактеын» менам эм «Дрессировка собак в Сыктывкаре» лист бок. Тшӧкыда сэні и аддзӧны менӧ. Аслам группаысь позьӧ аддзыны пон видзӧм кузя уна колана юӧр. Неважӧн на ме дорӧ шыӧдчисны гозъя, и ставыс накӧд артмӧ, кӧть и уджалам онлайн. Мукӧддырйи мортыслы колӧ сӧмын сӧвет, гӧгӧрвоӧдӧм, кыдзи сійӧ либӧ мӧд мытшӧд бырӧдны. Но онлайн пыр он вермы отсавны понйыслы сідз шусяна стрессысь, фобияысь, агрессияысь мынтӧдчыны. Но кыдзи да мыйӧн верма, пыр зіля отсавны. <>
Екатерина МИКУШЕВА.
Снимокъясыс Анна ПОПОВАЛӦН гортса архивысь.