Февраль тӧлысь Коми йӧзӧдчан керкаса зільысьяслы заводитчис тӧдчана лоӧмторсянь – пӧсь тшай юигмоз ёрта сёрни вылӧ волыны миянӧс корис Коми Республикаса юралысь Владимир Уйба.
Дзик пыр колӧ тӧдчӧдны, мый миянкӧд – коми газет-журналын веськӧдлысьяскӧд – татшӧм аддзысьлӧмыс вӧлі медводдзаысь на! И миянлы таысь торйӧн нимкодь!
Нӧшта на сьӧлӧмнымӧс мавтыштіс коми газет-журналнымӧс юралысьлӧн вылӧ донъялӧмыс.
– Ӧнія кадӧ ставныс, торйӧн нин челядь да томулов, «вӧйтчисны» сідз шусяна цифраа олӧмӧ: уна сикас гаджет, ӧтуввез, быдсикас сервис-служба да уна мукӧдтор, ставыс тайӧ быттьӧ бокӧ вештӧ да венӧ тіянӧс – газет дасьтысьясӧс, – висьталіс Владимир Викторович. – Но та вылӧ видзӧдтӧг ті вӧчанныд ставсӧ, медым газет-журнал вӧлі лыддянаӧн. А нӧшта на и ыджыд пай пуктанныд чужан кыв видзӧм-сӧвмӧдӧмӧ. И тайӧ збыльысь зэв тӧдчана! Ӧд асланыд водзмӧстчӧмӧн ті видзанныд и вужвойтырӧс.
Коми Республикаса правительствоӧн веськӧдлысьӧс вежысь Галина Габушева аддзысьлӧм дырйиыс пасйис, мый таво газет-журналын зільысьяслӧн лоас мича тшупӧда пас – Коми печатьлы тырӧ 105 во. И тайӧ тӧдчана лоӧмторсӧ колӧ кыпыда пасйыны.
«Зырянская жизнь» медводдза номер петӧмсянь, мыйсянь и пасъям «Коми му» газет артмӧмсӧ, таво тырӧ 105 во. Весиг республикаысь на верстьӧджык миян петасным! И чайтам да, сӧмын Коми йӧзӧдчан керкаын зільысьяслы татшӧм тӧдчана пассӧ котыртны-дасьтыны лоӧ сьӧкыд. Буретш та могысь и шыӧдчим Владимир Викторович дорӧ отсӧгла. Колӧ ӧтувтчыны и правительстволы, и велӧдан, нацполитика да культура министерствояслы, общественникъяслы, медым ӧтув дасьтыны да бура пасйыны тайӧ гажсӧ.
Зэв нимкодь, мый Галина Ивановна кӧсйысис отсавны миянлы да матысса кадӧ нин чукӧртны торъя уджалан котыр.
Таысь ӧтдор аддзысьлӧм дырйи сёрнитім и мукӧд мытшӧд-майшасьӧм йылысь. Том йӧзлы «Йӧлӧга» журналын шӧр редакторлысь удж вӧчысь Ирина Терентьева пасйис, мый ӧні вель сьӧкыд корсьны да корны удж вылӧ том специалистӧс.
– Чайтам, сӧмын на удж вылӧ пырысь коми журналистӧс колӧ мыйӧнкӧ ышӧдны, – юксис Ирина Андреевна. – Ёна эськӧ бур вӧлі, лоӧ кӧ том мортлы кутшӧмкӧ отсӧг, шуам оланін боксянь, мед кӧть ичӧт юр сюянін, но век нин вевт улын.
Юралысь индіс Галина Ивановналы мӧвпыштлыны тайӧ юалӧм кузяыс, гашкӧ пӧ, дасьтыны татшӧм том специалистъяслы кутшӧмкӧ кокньӧда ипотекаа уджтас.
Нӧшта ӧти майшӧдлана юр висьӧм Коми йӧзӧдчан керкалӧн – тайӧ «Ордым» небӧг лавка. Быдӧн тӧдӧ, мый татшӧм вузасянінад уна сьӧм он нажӧвит, мӧдарӧ на – ён «минусӧ» верман кольны. Лавка кутӧм вылӧ торъя сьӧм миян абу урчитӧма, и воысь-во та боксянь пыр сьӧкыдджык и сьӧкыдджык. Но стӧча тӧдам, «Ордым» вузасянін ёна колӧ, ӧд тані дзик ӧтилаын чукӧртӧма Коми Республикаса роч да коми гижысьяслысь небӧгъяс, позьӧ ньӧбны да гижӧдчыны газет-журнал вылӧ, велӧдысьяслы эм озыр методическӧй литература да уна мукӧдтор.
Владимир Викторович тшӧктіс республикаса правительстволы разьны и тайӧ мытшӧд-гӧрӧдсӧ.
Аддзысьлӧмсӧ сигӧртігӧн нӧшта ӧтчыдысь аттьӧалім Владимир Уйбаӧс миянӧс чукӧртлӧмысь. Сёрнитчим водзӧ вылӧ вонас кӧть ӧтчыд быть паныдасьлыны.
Торйӧн аттьӧалам Коми Республикаса национальнӧй политика министр Роман Вениаминович Носковӧс да ведомствоас зільысьясӧс тайӧ аддзысьлӧмсӧ дасьтӧмысь. Збыльысь, тайӧ миянлы ёна нин вӧлі колӧ. Кор юралыссянь да правительствосянь эм отсӧгыс, кор миянӧс кывзӧны да кылӧны, кор донъялӧны уджнымӧс, кор пыдди пуктӧны вужвойтырлысь кыв да культура – водзӧ на окота пуктыны чужан кыв видзӧм-сӧвмӧдӧмӧ ыджыд пай да нӧшта бурджыка водзмӧстчыны-уджавны. <>
Галина МАКАРОВА, Коми йӧзӧдчан керкаӧн веськӧдлысь.
Снимокыс ӧтуввезйысь.