Январь 23 лунӧ Сыктывкарса коми культура шӧринын воссис Удора районысь вӧвлӧм фотокорреспондент Александр Селивановлӧн «По следам районки «Выль туйӧд» фотовыставка.
Александр Селиванов уна во зілис-уджаліс Удора районса «Выль туйӧд» газетын фотокорреспондентӧн. Аслас фотоаппаратӧн кытшовтіс, и эз ӧтчыдысь, ставнас Удорасӧ да, кыдз шуласны, бура тӧдӧ сэтысь быд пельӧс, сикт-грездын олысьясӧс.
Воясӧн, дерт, чукӧрмис вель уна снимок, кӧні мыччысьӧ Удоралӧн чужӧмбаныс, историяыс. Тані и вӧр-ва, и нималана спортсменъяс, ветеранъяс, пыдди пуктана да енбиа йӧз…
– Ме ичӧтсянь радейті снимайтчыны, и нимкодь, мый олӧм-уджӧй йитчис фотографиякӧд. Комын во да дас квайт лун зіли газетын да ветымын сюрс гӧгӧр снимок вӧчи. Тані, дерт, ставсӧ петкӧдлыны эг вермы. Менам уна сикас эм. Кыдз шуласны, кутшӧм олӧмыс, сэтшӧмӧсь и снимокъясыс. Эм и нелючки эрдӧданаыс. Фотокорреспондент кудйын натӧг некыдз. Выставка вылӧ вӧзйи кыпыдджыкъяссӧ.
Мукӧдыс зэв нин важся. Шуам, медводдзаяс лыдын 1985 вося гожся страда дырйи турун пуктӧм йылысь снимок. «Сералысь» вӧлӧс снимайті Изьва районӧ командировкаӧ ветлігӧн, – висьталіс Александр Евгеньевич.
Александр Селивановлӧн фото-уджъясӧн позьӧ тӧдмасьны февраль 7 лунӧдз.
Снимокъясыс Сыктывкарса коми культура шӧринысь.
<> Лист боксӧ дасьтіс Екатерина Макарова