Кодкӧ, гашкӧ, кусӧдчысьӧн лоас?

Кыдзи дорйыны мортӧс виччысьтӧм лоӧмторйысь? Мый вӧчӧны та могысь «112 тэчасын» зільысьяс? Тайӧ да мукӧд юалӧм вылӧ вочакыв тӧдмалісны Коми Республикаса кар-районъясысь кӧкъямысӧд классын велӧдчысь кадетъяс «Пожарно-спасательнӧй школаын», кӧні май 30 июнь 5 лунъясӧ котыртлісны ныв-зонлысь тӧдӧмлун-сям кыпӧдан профильнӧй смена.

Сэтчӧ мойвиис веськавны Изьва, Кӧрткерӧс, Сыктывдін, Емдін районъясысь, а сідзжӧ Сыктывкарысь да Усинскысь томуловлы.

Кадетъяслы «Пожарно-спасательнӧй школасӧ» медводдзаысь котыртлім кольӧмвося ноябрын. Водзӧ челядькӧд тайӧ уджсӧ кутам нуӧдны арнас да гожӧмнас. Медым веськавны татчӧ, ныв-зонлы коліс дасьтыны портфолио, а сідзжӧ гижны, мыйла буретш сылы колӧ тайӧ профильнӧй сменаыс. Шыӧдчисны 34 ныв-зон, но «Енбиа томуловлӧн академия» регионса шӧринын, кодлӧн водзмӧстчӧмӧн и восьтӧма школасӧ, бӧрйисны 22 кадетӧс, висьталіс Коми Республикаын биысь видзчысян да войтырӧс доръян управлениеын йӧзкӧд йитӧд кутан юкӧнысь медшӧр специалист Дмитрий Осипов.

Школаас унджык занятиесӧ нуӧдісны налӧн управлениеын учебно-методическӧй шӧринысь специалистъяс, кодъяс бура тӧдӧны, кыдзи дорйыны мортӧс быдсяма неминучаысь.

Ныв-зонлы воӧма сьӧлӧм вылас налӧн висьтасьӧмыс, а сідзжӧ экскурсияясыс. Найӧ тӧдмасисны гражданскӧй оборона да кусӧдчан удж историяӧн, велӧдчисны дорйыны асьнысӧ, суас кӧ виччысьтӧм лоӧмтор, а сідзжӧ видлісны лоны спасательӧн да сетны неминучаӧ веськалӧм мортлы медводдза отсӧг.

Котыртлісны налы и сідз шусяна интерактивнӧй экскурсияяс. Шуам, челядь волісны пӧжарнӧй охрана музейӧ, «112 тэчаслӧн» шӧринӧ, «Зарница» велӧдчан-тренируйтчанінӧ.

Вежоныс ӧдйӧ и коли. Быд лун ныв-зонмӧс виччысис мыйкӧ выльтор. Найӧ ӧні бура нин тӧдӧны, кыдзи вӧдитчыны противогазӧн, кутшӧм паськӧмӧн петӧ удж вылас кусӧдчысь, мый пасьтавлӧны химия сорасысь да мукӧд лёк гудрасысь видзчысьӧм могысь.

Чайта, кусӧдчысьяскӧд да спасательяскӧд татшӧм аддзысьлӧмыс челядьлы зэв колана, пасйис Коми Республикаын йӧзӧс виччысьтӧм лоӧмторъясысь доръян-видзан комитетӧн веськӧдлысь Александр Бурцев. Гашкӧ, школа помалӧм бӧрас кодъяскӧ на пиысь бӧръясны тайӧ сьӧкыд, кывкутана, но йӧзлы колана да зэв тӧдчана уджсӧ. <>

Екатерина МИКУШЕВА.

Снимокъясыс Коми Республикаса биысь видзчысян да войтырӧс доръян управлениелӧн.

Кодкӧ, гашкӧ, кусӧдчысьӧн лоас?

«Коми му» газетысь, кодӧс позьӧ судзӧдны пошта пыр, позьӧ ньӧбны «Ордым» лавкаын. Медым лыддьыны электроннӧй версия, личкӧй татчӧ. Эмӧсь кӧ юалӧмъяс, гижӧй komi-kerka@ya.ru.

Пролистать наверх