Июнь 10 лунӧ миян республикаын пасйӧны коми печать лун. Нимкодь, мый такӧд йитӧдын уна бур кыв висьталӧны миянлы коми газет-журнал лыддьысьысьяс. Чолӧмалана кывйӧн шыӧдчис и Лидия Храмович – Эжва районса «Светоч» библиотекаын уджалысь, Коми йӧзӧдчан керкалӧн бур ёрт.
Лидия Алексеевна тшӧкыда йӧзӧдӧ ассьыс гижӧдъяссӧ коми петасъясын, корлывлӧ миянӧс, журналистъясӧс, библиотекаас быдсяма аддзысьлӧм-гаж вылӧ, торйӧн нин, кор найӧ йитчӧмаӧсь чужан кыв сӧвмӧдӧмкӧд да вужвойтырлысь культура нимӧдӧмкӧд.
–Казялі, мый бӧръя кадӧ лыддьысьяс пӧвстысь пыр унджыкӧн босьтлывлӧны «Коми му» газет, «Йӧлӧга», «Би кинь», «Чушканзі» да «Войвыв кодзув» журналъяс, – висьталӧ Лидия Алексеевна. – Ме и ачым важысянь нин окотапырысь лыддя тайӧ петасъяссӧ, ӧд комиыс – менам чужан кыв. Меным нимкодь ёртасьны газет-журналын зільысьяскӧд, тшӧтш и ӧтув дасьтыны нималана йӧз да тӧдчана лоӧмторъяс йылысь гижӧдъяс.
Аттьӧалам Лидия Алексеевнаӧс да ставнысӧ, кодъяс лыддьӧны коми газет-журнал, окотапырысь гижӧны миянлы да отсалӧны вӧчны петасъяснымӧс йӧзлы коланаӧн да тӧдчанаӧн. Лача кутам, ёртасян йитӧдным водзӧ на ёнмас. <>
Екатерина МИКУШЕВА.
Снимокыс Лидия ХРАМОВИЧЛӦН гортса архивысь.