Кутшӧм уджсикаскӧд йитны олӧмтӧ? Тайӧ юалӧмыс школа помалысьясӧс ёна майшӧдлӧ. Кужан кӧ бӧрйыны колана нырвизь, сідзкӧ, и водзӧ вылӧ оз ковмы майшасьны, ӧд кажитчана уджыд кутас нимкодьӧдны сьӧлӧмтӧ. Со, шуам, юркарысь Данил Попов уджалӧ фотографӧн да ньӧти оз жалит, мый уна во сайын босьтӧма киас фотоаппарат.
– Во дас сайын Сыктывкарса университетын, кӧні ме сэк велӧдчи, студсӧвет корис вӧчны фоторепортаж. Сэк нин видлі ассьым сямӧс, но кывкутӧмӧн босьтчи тайӧ уджас 2017 воын. Буретш сэксянь и лыддя ачымӧс фотографӧн, – висьталӧ том морт.
Данил радейтӧ вӧчавны семьялы фотосессияяс, а сідзжӧ том гозъяӧс кӧлысь дырйиыс окотапырысь снимайтӧ. Фотографлӧн пӧ уджыс бур сыӧн, мый верман ачыд бӧрйыны уджалан кадтӧ. Таысь кындзи эм позянлун тӧдмасьны выль йӧзкӧд, да и сьӧмтӧ верман нажӧвитны, он кӧ дышӧдчы.
– Водзтіджык вӧлі спортсменӧн, радейті каратэ, лыжиӧн котралі, спортивнӧй туризмӧ пырӧдчи да бальнӧя йӧкті, но ӧні ме – фотограф. Тайӧ менам медшӧр да радейтана удж. Кора ставнытӧ мича да аслыспӧлӧс снимокъясла шыӧдчывны, – шуӧ том морт. <>
Екатерина МИКУШЕВА. Снимокыс Данил ПОПОВЛӦН.